ވެރިއަކަށް ގެންނަންވީ ރައްޔިތުންގެ އަތުގައި އޮންނަ ހައްޤު އަތުނުލާނެ ވެރިއެއް: ޢަލީ ވަޙީދު

ވެރިއަކަށް ގެންނަންވީ ރައްޔިތުންގެ އަތުގައި އޮންނަ ހައްޤުތައް އަތުނުލާނެ ވެރިއެއް ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް ބްރާހިމްގެ އިންތިޚާބީ މަންދޫބު ޢަލީ ވަޙީދު ވިދާޅުވެއްޖެއެވެ.

ޢަލީ ވަޙީދު މިހެން ވިދާޅުވީ ޖުމްހޫރީ ޕާޓީގެ ރިޔާސީ ކެންޑިޑޭޓުގެ ކެމްޕޭނަށް ށ ފުނަދޫ އަށް ވަޑައިގެން އެރަށު ރައްޔިތުންންއި އެކު ބޭއްވެވި ބައްދަލުވުމުގައެވެ.

"ސެޕްޓެމްބަރ 9 ވަނަ ދުވަހު ތިބޭފުޅުން މިޤައުމުގެ ވެރިއަކަށް ގެންނަންވީ ޣައިރު ޤާނޫނީ އަމުރު ނުކުރާނެ ވެރިއެއް، ތިބޭފުޅުންގެ އަތުގައި އޮންނަ ހައްޤު ނިގުޅައިގަނެގެން ނުދާނެ ވެރިއެއް، އިތުރު ސުވާލެއް ދެބަސްވުމެއް އޮތް ކަމެއް ނޫން، މިރާއްޖޭގަ މިފަހަރު ރިޔާސީ އިންތިޚާބަށް ކުރިމަތިލައްވާފަ ތިބި ކެންޑިޑޭޓުންގެ ތެރެއިން އިސްލާމް ދީނަށާއި،  ޤާނޫނު އަސާސީއަށާއި، ޤާނޫނާއި ޤަވާއިދުތަކަށް އަދި ދުރޫސުލް އަޚްލާޤާއި ސުލްޙަ މަސަލަސްކަމަށް ލޯބިކުރާ ހަމައެކަނި ކެންޑިޑޭޓަކީ އޭނާގެ މުޅި ޚަޔާތުގެ ޞަފްޙާ ތަކަށް ބަލާއިރު އަޅުގަނޑުމެންގެ ކެނޑިޑޭޓު އޮނަރަބަލް ޤާސިމް އިބްރާހިމް" ޢަލީ ވަޙީދު ވިދާޅުވިއެވެ.

ޢަލީ ވަޙީދު ވިދާޅުވީ ނޮވެމްބަރު 17 ވަނަ ދުވަހު ރާއްޖޭގެ ރައީސް ކަމާއި ޤާސިމް އިބްރާހިމް ހަވާލުވެވަޑައިގަންނަވާނެ ކަމާއި މެދު މިހާރު އެބޭފުޅުން ޝައްކުނުކުރައްވާ ކަމަށެވެ.

"ސަބަބަކީ އަޅުގަނޑު މެންނާއި އެކު ކޯލިޝަން ހަދާފައި ތިބީ ރާއްޖޭގެ ރައްޔިތުން، ރާއްޖޭގެ ރަށްރަށުން ޤާސިމްގެ ފަހަތަށް އަރައިފިކަން މިދިޔަ ދެދުވަހެއްހާ ދުވަހުގެ ތެރޭގައި  އަޅުގަނޑުމެންގެ ކެމްޕޭނުން އަޅުގަނޑު މެންނަށް ފަހުމް ވަމުން އެބަދޭ، އަޅުގަނޑު މެން މިދައްކާ ވާހަކަ ޓީވީތަކުން މީހުން ބަލާ ކަމާ އަޑުއަހާކަމާއި ވިސްނާކަން އަޅުގަނޑުމެންނަށް އެބައިނގޭ، ދިވެހިންނަކީ މޮޔަބައެއް ނޫން، ދިވެހިންނަކީ ގަޅިހެއްދޭނެ ބައެއް ނޫން" ޢަލީ ވަޙީދު ވިދާޅުވިއެވެ.

ޢަލީ ވަޙީދު ވިދާޅުވީ މިއަދަކީ ބައެއްގެ ފައިދަށަށް ވެއްޓި ދިވެހިންގެ މިނިވަންކަން ބަލައި ދިވެހި ބައެއް ވެރިން އައިސް އޮތް ދުވަހެއް ކަމަށެވެ. އަދި ރާއްޖޭގެ ކަންކޮޅުތަކުގައި އެހެން ޤައުމެއްގެ ސިފައިން ތިބި ވާހަކަ އަޑު ނާހައި ތިމަންނަމެންނަށް މުހިންމީ ރަށްރަށުގައި ބޮޑު ހިލަ ޖެހުން ކަމަށް ބުނެ އެކަން "އޯކޭ" ވެއްޖެނަމަ މީގެ ދެތިން އަހަރުފަހުން އެބޮޑު ހިލަތަކަށް އަމުރު ކުރަން އަންނަނީ ބޭރު ބައެއް ކަމަށް ވާނަމަ ރައްޔިތުން ކަރުނަ އަޅާނެ ކަމަށެވެ.

ޤާސިމަށް ވެރިކަން ދޭން ދެހަފްތާއެއްހާ ދުވަހަށް ވެފައި އޮއްވައި އެހެން ޤައުމެއްގެ ބަޔަކަށް ވެރިކަން ދިނުންފަދަ ބަޔަކަށް ވެރިކަން ދީފިނަމަ އުމުރުދުވަހު ކަރުނައަޅައި ރޯން ޖެހޭނެ ކަމަށެވެ.

ރިޔާސީ އިންތިޚާބުގެ ކެމްޕޭނުގައި ކެންޑިޑޭޓުންނާއި ކެންޑިޑޭޓުންގެ ރަނިންގމޭޓުން ދަނީ ރާއްޖޭގެ އެކި ކަންކޮޅުތަކުގައި ކެމްޕޭނު ކުރައްވަމުންނެވެ.