ރައީސް ނަޝީދު ހިމެނޭހެން ޑިމޮކްރެޓްސްއާ ގުޅުނުކަން މަޖިލީހަށް ނާންގާ 11 މެންބަރުން!
ދަ ޑިމޮކްރެޓްސް ޕާޓީއާއި ގުޅުނު 14 މެމްބަރުންގެ ތެރެއިން، ރައްޔިތުންގެ މަޖިލީހަށް އެކަން އަންގަވާފައި ވަނީ ތިން މެމްބަރަކުކަމަށާއި ޕާޓީ ބަދަލްވިކަން މަޖިލީހަށް ނާންގާ 11 މެންބަރަކު ތިއްބެވިކަން މަޖިލީހުގެ ރައީސް މުހައްމަދު ނަޝީދު ހާމަކުރައްވައިފިއެވެ.
މިއަދު ކުރިއަށްދިޔަ ރައްޔިތުންގެ މަޖިލީހުގެ ތިންވަނަ ދައުރުގެ ފުރަތަަމަ ޖަލްސާގެ އެޖެންޑާގައި އޮތީ ކޮމިޓީތައް އެކުލަވާލުމުގެ މަސައްކަތް ކުރިއަށް ގެންދިޔުމެވެ.
އެގޮތުން، މަޖިލިސް ފަށްޓަވަމުން ރިޔާސަތުގައި އިންނެވި، މަޖިލީހުގެ ރައީސް މުހައްމަދު ނަޝީދު ވަނީ އެކަން އަންގަވައި، މީގެ ކުރީން އެމްޑީޕީން ކެނޑުމުގެ ސަބަބުން މިނިވަން މެންބަރުންގެ ގޮތުގައި ތިއްބެވި ބައެއް މެންބަރުން ދަ ޑިމޮކްރެޓްސް އަށް ސޮއި ކުރައްވާފައިވާ ކަން ފާހަގަކުރައްވައި އެ މެންބަރުން މަޖިލީހުގައި ދަ ޑިމޮކްރެޓްސް ތަމްސީލު ކުރާކަން އަންގާފައިވާ ކަމަށް ވިދާޅުވެފައެވެ. އެގޮތުން ޑިމޮކްރެޓްސް އާއި ގުޅިވަޑައިގެންފައިވާ ކަމަށް މަޖިލީހަށް އަންގަވާފައިވަނީ ތިން މެންބަރުން ކަމަށް ނަޝީދު ވިދާޅުވި އެވެ.
އެ މެންބަރުންނަކީ މެދު ހެންވޭރު ދާއިރާގެ މެންބަރު ޢަލީ އާޒިމް އާއި، މަޑަވެލި ދާއިރާގެ މެންބަރު ހުސެއިން ފިރުޝާންގެ އިތުރުން މާފަންނު އުތުރު ދާއިރާގެ މެމްބަރު އިމްތިޔާޒު ފަހްމީ ކަމަށް ނަޝީދު ވިދާޅުވި އެވެ.
“އެ މެމްބަރުން ދަ ޑިމޮކްރެޓްސްއާ ގުޅިވަޑައިގެން އެ ޕާޓީގެ ނަމުގައި މަޖިލީހުގައި ތަމްސީލު ކުރެއްވުމަށް ވަނީ އެދިވަޑައިގެންފަ. އަދި މަޖިލީހުގެ ގަވާއިދުގައި ބަޔާންކުރާ ލިޔުންތައް ވަނީ މަޖިލީހަށް ލިބިފަ،”
މަޖިލީހުގެ ރައީސް މުހައްމަދު ނަޝީދު
ނަޝީދު މިފަދައިން ވިދާޅުވެފައި ވާއިރު، ޑިމޮކްރެޓްސް އާ ގުޅުނު ކަން ނާންގާ މެންބަރުންގެ ތެރޭގައި އެމަނިކުފާނު ވެސް ހިމެނިވަޑައިގަންނަވައެވެ.
ޑިމޮކްރެޓްސްއާއި ގުޅި މަޖިލީހަށް ނާންގާ މެމްބަރުން
1) މަޖިލީހުގެ ރައީސް މުހައްމަދު ނަޝީދު
2) މަޖިލީހުގެ ނައިބު ރައީސް އީވާ އަބްދުالله
3) އުނގޫފާރު ދާއިރާގެ މެމްބަރު މުހައްމަދު ވަހީދު
4) ތޮއްޑޫ ދާއިރާގެ މެމްބަރު ހަސަން ސިޔާން
5) ވިލުފުށީ ދާއިރާގެ މެމްބަރު ހަސަން ލަތީފު
6) ގައްދޫ ދާއިރާގެ މެމްބަރު އަހުމަދު ޒާހިރު
7) ހުޅުދޫ ދާއިރާގެ މެމްބަރު އިލްޔާސް ލަބީބު
8) ހިތަދޫ މެދު ދާއިރާގެ މެމްބަރު އަހުމަދު ރަޝީދު
9) މާފަންނު މެދު ދާއިރާގެ މެމްބަރު އިބްރާހިމް ރަޝީދު
10) މައްޗަންގޯޅި އުތުރު ދާއިރާގެ މެންބަރު މުހައްމަދު ރަޝީދު
11) ހެންވޭރު ހުޅަނގު ދާއިރާގެ މެމްބަރު ހަސަން ލަތީފު
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
