ޔޯގާ ހަރާންކޮށްގެން ނިކުތީ ރިޔާސީ އިންތިޚާބު ބޯމަތިވީމަ: ވަހީދު

ޒަމާންތަކެއް ވަންދެން ދިވެހިރާއްޖޭގައި ކަސްރތުގެ ގޮތުގައި ކުރަމުންދިޔަ ކަމެއްކަމަށްވާ ޔޯގާ ހަރަކާތް ހުއްޓުވުމަށް ނިކުތް ބަޔަކު ނިކުތީ ރިޔާސީ އިންތިޚާބު ބޯމަތިވެފައި އޮތުމުންކަމަށް މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.

ވަހީދު މިފަދައިން ވިދާޅުވެފައިވަނީ ގައުމީ ފަތުވާ މަޖިލިސް އެކުލަވާލުމަށް ގޮވާލާ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ހުށައެޅުއްވި މައްސަލައަށް ވާހަކަދައްކަވަމުންނެވެ.

ވައްޑެގެ ވާހަކަ ފައްޓަވަމުން ވިދާޅުވީ، ދީން ހަތިޔާރަކަށް ބޭނުންކުރާ މީހުންނާއި، ދީނީ ޖަމުއިއްޔާތައް ހަދައިގެން ސިޔާސީ މަންފާތައް ހާސިލުކުރަމުންދާ އިލްމުވެރިން ރާއްޖޭގައި ހަރަކާތްތެރިވަމުން ދާކަމަށެވެ. އެގޮތުން ވަކި މަގްސަދެއް ހާސިލްކުރުމަށް ކަންކަން ހަރާމްކޮށް މީހުންގެ މެދުގައި ބިރުވެރިކަމާއި ނަފްރަތު އުފެއްދުމަށް މަސައްކަތް ކުރަމުންދާކަމަށް އޭނާ ވިދާޅުވިއެވެ.

ބައިނަލްއަގުވާމީ ޔޯގާ ދުވަސް ފާހަގަކުރުމަށް ޔޫތު މިނިސްޓްރީއާއި، އިންދިއާ ހައިކޮމިޝަން އަދި އިންޑިއާގެ ކަލްޗަރަލް ސެންޓަރު ގުޅިގެން ގަލޮޅު ދަނޑުގައި ކުރިއަށް ގެންދިޔަ ހަރަކާތަކީ ދައުލަތުގެ ރަސްމީ އިންތިޒާމުގެ ތެރެއިން ކުރިއަށް ގެންދިޔަ ހަރަކާތެއް ކަމަށާއި، އެކަން ހުއްޓުވުމަށް ބަޔަކު ނިކުތީ ރިޔާސީ އިންތިޚާބު ކައިރިވަމުން އަންނާތީ ސަރުކާރާއި މެދު ރައްޔިތުންގެ ހިތުގައި ނަފްރަތު އުފައްދާ ސިޔާސީ މަންފާއެއް ހާލިކުރުމަށްކަމަށް ވަހީދު ވިދާޅުވިއެވެ.

"ދައުލަތުގެ ރަސްމީ އިންތިޒާމުތަކުގެ ތެރެއިން ރަޖިސްޓްރީކޮށްގެން (ޔޯގާ) ހިންގާ އެތައް ތަނެއް އެބަހުރި. އެތަންތަނަށް ފީ ދައްކައިގެން ކަސްރަތެއްގެ ގޮތުގައި އެތައް ސަތޭކަ ބަޔަކު އެތަންތަނުން ޚިދުމަތް ހޯދާތާ އެތައް ޒަމާނެއް ވެއްޖެ. ކުއްލިޔައަށް ރިޔާސީ އިންތިޚާބު އަނެއްކާވެސް ބޯމަތި ވީމާ ޔޯވާ ވެއްޖެ މާ ބޮޑު ހަރާމް ކަމަކަށް"

އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ)

ވަހީދު ވިދާޅުވީ ރައްޔިތުންގެ ދީނީ އިލްމުވެރިންގެ މެދުގައި ޚިޔާލު ތަފާތުވުންތައް އުފެދި، ރައްޔިތުންގެ މެދުގައި އޮތް ދީނީ އެއްބައިވަންތަކަމަށް ބުރޫ އަރާ ހިސާބަށް ދަނީ، ޚިޔާލު ތަފާތުކުރުންތައް އެއްގޮތް ކުރާނެ، އަދި އެކަންކަމާއި މެދު ގޮތް ކަނޑައަޅާނެ ދައުލަތުގައި ނެތުމުންކަމަށެވެ.

ގައުމީ ފަތުވާ މަޖިލީހުގެ ދައުރު ހަމަވެގެން ދިޔައިރުވެސް އެކަމަށް އަޅާ ނުލެވި، އެ މަޖިލީސް ހުސްކަމެއްގެ ތެރޭގައި ގިނަ ދުވަސްތަކެއް ވަންދެން ބާއްވާފައި އޮތުމަކީ ހިތާމަ ކުރާކަމެއްކަމަށާއި، މުޖުތަމައުގައި ހަމަޖެހުން ގާއިމުކޮށް، ދީނީ ގޮތުން އުފެދޭ ޚިޔާލު ތަފާތުވުންތައް ނައްތާލުމަށް އެ މަޖިލީސް ވީ އެންމެ އަހަކަަށް އެކުލަވާލުމަށް ވަހީދު ވަނީ ގޮވާލައްވާފައެވެ.