ޕޮލިސް ބޯޑުގެ ހަރަދު ބޮޑުވެފައި ޝަކުވާ ވެސް ބޮޑު؛ ބޯޑުގެ "ބޭނުން ރަނގަޅަށް ނުހިފޭ": ޢިމްރާން
ފުލުހުންގެ ބޯޑުގެ ޝަކުވާ ބޮޑުވެފައި ޚަރަދުވެސް ބޮޑު އިރު، އެ ބޯޑުގެ ބޭނުން ރަނގަޅަށް ނުހިފޭ ކަމަށް ހޯމް މިނިސްޓަރ ޢިމްރާން ވިދާޅުވެއްޖެއެވެ.
އިމްރާން މިފަދައިން ވިދާޅުވީ މިއަދު އޮތް ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމިޓީގައި ވާހަކަ ދައްކަވަމުންނެވެ.
މިއަދުގެ ކޮމިޓީއަކީ ސިއްރު ކޮމިޓީއެއް ގޮތަށް ގެންދަން ފާސްކުރިނަމަވެސް، މަޖިލީހުގެ އިދާރާއިން ވަނީ ކޮމިޓީ ލައިވް ކޮށްފަ އެވެ.
ކޮމިޓީގައި ވާހަކަ ދައްކަވަމުން އިމްރާން ވިދާޅުވީ ފުލުހުންގެ ބޯޑުން ބޭނުންވާ ގިނަ ކަންކަމަށް މިނިސްޓްރީއަށް އެއްބަސްނުވެވޭކަމަށާއި އެ ބޯޑުން ބޭނުން ވަނީ މިނިސްޓްރީގެ ދަށުން ވަކިވެ މިނިވަން ގުނަނެއްގެ ގޮތުގައި ހިންގައި، އަމިއްލަ ވެބްސައިޓަކާއި ސިއްކައެއް ބޭނުން ކުރުމަށް ކަމަށެވެ.
އިމްރާން އިތުރަށް ވިދާޅުވީ ފުލުހުންގެ ބޯޑަކީ މިނިވަން ބޯޑަކަށް ހެއްދުމަށް އެ ބޯޑުން އަހަރެއްހާ ދުވަސް ވަންދެން މަސައްކަތް ކޮށްފައިވާ ކަމަށާ، އަދި އެކަމުގެ ސަބަބުން ބޯޑުގެ ބޭނުން އެންމެ ރަނގަޅަށް ނުހިފި ބޯޑަކީ އިފެކްޓިވް ބޯޑަކަށް ނުވެގެން ދިޔަ ކަމަށް ގަބޫލުފުޅު ކުރެވޭކަމަށް އިމްރާން ވިދާޅުވިއެވެ.
"އެ ބޭފުޅުން އެ ބޯޑަކީ މިނިވަން ބޯޑަކަށް ހެއްދެވުމަށް މަސައްކަތް ކުރެއްވި އަހަރަކާ ގާތަށް، އަސްލު އެކަމާ ހުރެ ބޯޑުގެ ބޭނުން އެންމެ ރަނގަޅަށް ނުހިފި ބޯޑަކީ އިފެކްޓިވް ބޯޑަކަށް ނުވެގެން ދިޔަ ކަމަށް އަޅުގަނޑަށް ބޮޑަށް ގަބޫލުކުރެވެނީ،" އިމްރާން ވިދާޅުވި އެވެ.
މީގެއިތުރުން މިނިސްޓަރު އިމްރާން ވިދާޅުވީފުލުހުންގެ ބޯޑު މިހާރު ހިނގަމުން އަންނަ ގޮތުން ބޯޑުގެ "ބޭނުން ރަނގަޅަށް ނުހިފޭ" ކަމަށާއި އެ ބޯޑުން މިނިސްޓްރީއަށް ދޭން ޖެހޭ އެއްބާރުލުން ވެސް ނުލިބޭކަމަށެވެ. އަދި އެ ބޯޑުގެ ހަރަދު ބޮޑުވެފައި ޝަކުވާ ވެސް ބޮޑުކަމަށާއި ބޯޑުން މީޓިން ރޫމް ސައުންޑު ޕްރޫފު ކުރުން ފަދަ ހަރަދު ކުރަން ވެސް އެދިފައިވާކަމަށެވެ.
"އަޅުގަނޑުގެ ސެކެޓެރިއޭޓަށް ވުރެ 10 ގުނަ ހަރަދާއި ވަސީލަތްތައް ދީގެން މިހުރީ، އެކަމަކު އަދިވެސް އެ ބޭފުޅުންނަށް ކަމެއް ކޮށްދެވޭ ކަމަކަށް ނުވޭ،" އިމްރާން ވިދާޅުވިއެވެ.
އިމްރާން ވިދާޅުވިގޮތުގައި ޕޮލިސް ބޯޑުގެ މި މައްސަލަ ހައްލު ކުރެވޭނީ އެ ބޯޑަކީ މިނިސްޓަރު ޗެއާ ކުރައްވާ ބޯޑަކަށް ވެގެންނެވެ. އެހެންނޫންނަމަ ބޯޑުން ދޭ އެއްވެސް ލަފަޔަކީ މިނިސްޓްރީން ގެންގުޅޭ ހަމަތަކާ އެއްގޮތް ކަމަކަށް ނުވާނެ ކަމަށާއި ނަތީޖާއަކަށް ވެގެންދާނީ ލަފާތަކަށް އަމަލު ނުކުރެވުން ކަމަށެވެ.
ފުލުހުންގެ ބޯޑަކީ ހަތް މެންބަރުންގެ މައްޗަށް އެކުލެވޭ ގޮތަށް އުފައްދާފައިވާ ބޯޑެކެވެ. އޭގެ ތެރޭގައި ހިމެނެނީ ރައީސް އިބްރާހިމް މުހައްމަދު ސޯލިހް އައްޔަން ކުރާ ދެ މެންބަރުންނާއި އާންމުންގެ ފަރާތުން ދެ މެންބަރުންނާއި ފަންނީ ތިން މެންބަރުންނެވެ.
މި ބޯޑަކީ، ވަރަށް ބޮޑެތި ބާރުތަކެއް ލިބިގެންދާނެ ބޯޑެވެ. އެގޮތުން ތަހުގީގީ އުސޫލުތައް ކަނޑައެޅުމާއި ފުލުހުންގެ ތަމްރީނުތަކުގެ އޮނިގަނޑު އެކަށައެޅުން ފަދަ މުހިންމު ބާރުތަކެއް ބޯޑަށް ލިބެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
