އިސްލާމް ދީނުގެ މެދުމިން ފެތުރުމަށް މިނިސްޓްރީން ސުކޫލުތަކުގައި ވޯކްޝޮޕް ބާއްވަނީ!

އިސްލާމް ދީނުގެ މެދުމިން ދަރިވަރުންގެ މެދުގައި ފެތުރުމަށް އިސްލާމިކް މިނިސްޓްރީ އާއި އެޑިއުކޭޝަން މިނިސްޓްރީ ގުޅިގެން ސުކޫލުތަކުގައި ސެމިނާރ ބާއްވަން ފަށައިފިއެވެ.

މިފަދަ ސެމިނަރ އެއް މަޖީދިއްޔާ ސުކޫލުގެ ދަރިވަރުންނަށް އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ކަމަށް އެ ސުކޫލުން ބެލެނިވެރިންނަށް ވަނީ އަންގާފައެވެ.

އެގޮތުން، އެންގި އެންގުމުގައި ބުނެފައިވަނީ، އިސްލާމް ދީނުގެ މެދުމިން ފެތުރުމަށާއި، އަޚްލާގީ ގޮތުން ތަހުޒީބު މުޖުތަމައު އެއް ބިނާ ކުރުމަށްޓަކައި އިސްލާމިކް މިނިސްޓްރީއާއި އެޑިއުކޭޝަން މިނިސްޓްރީ އާއި ގުޅިގެން ސެޕްޓެމްބަރު 24 ވާ ހޮނިހިރު ދުވަހު ވޯކްޝޮޕް އެއް ހިންގުމަށް ހަމަޖެހިފައިވާ ކަމަށެވެ. އަދި މި ވޯކްޝޮޕް ބޭއްވުމަށް ހަމަޖެހިފައިވަނީ ގުރޭޑް 10 ގެ ދަރިވަރުންނަށް އަމާޒުކޮށްގެން ކަމަށްވެސް އެ އެންގުމުގައި ބުނެފައިވެއެވެ.

ހޮނިހިރު ދުވަހު ހެނދުނު 7:15 އިން ފެށިގެން ހަވީރު 15:30 އިސްލާމިކް މިނިސްޓްރީގެ ހޯލުގައި ބާއްވާ މި ވޯކްޝޮޕް ގެ ސެޝަންތަކުގައި ކިޔަވައި ދޭނީ، ޝަރީޢަތުގެ މަގުސަދާއި، މެދުމިނާއި، އިސްލާމްދީނާއިމެދު އުފެދިފައިވާ ކުށް ހީ ތަކާއި ރިވެތި އަޚްލާގުގެ މައްޗަށް ކަމަށްވެސް އެ އެންގުމުގައި ވެއެވެ.

އިސްލާމް ދީނުގެ މެދުމިން ދަރިވަރުންނަށް ކިޔަވައި ދިނުމުގެ ނަމުގައި މިފަދަ ވޯކްޝޮޕެއް ހިންގުމަށް މިނިސްޓްރީން ނިންމާފައިވާ އިރު، ދީނުގެ މެދުމިން ދަރިވަރުންނަށް ކިޔައި ދިނުމުގެ ނަމުގައި، ދަރިވަރުން ދީނާއި ދުރުކޮށް، ލާދީނިއްޔަތު ކުދިންގެ މެދުގައި ފަތުރަށް މަސައްކަތް ކުރާ ކަމަށް ބުނެ އާއްމުން އަންނަނީ އަބަދާއި އަބަދު ކަންބޮޑުވުން ފާޅުކުރަމުންނެވެ.

އަދި ދަރިވަރުންގެ އަޚްލާގު މިހާރު ދަށް ވަމުން ދަނީ، އިސްލާމް ދީނުގެ ރިވެތި އުސޫލުތައް ދޫކޮށް، އިސްލާމް ދީނާއި ބީރަށްޓެހި, ހުޅަނގުގެ ގޮތްތަކަށް ކުދިން ލޯބި ޖެއްސުމަށް ދުރާލާ ރާވައިގެން، ތައުލީމީ ނިޒާމް ކޮކަޑި ކުރަމުންދާ ދިއުން ކަމަށްވެސް ގިނަ ބަޔަކު ދެކެއެވެ.