ހެޔޮ ވެރިކަމެއް ކުރެއްވީ ރައީސް ޔާމީން އެކަނި: ނާޒިމް

ރައްޔިތުންނަށް ހެޔޮ ވެރިކަމެއް ގެނެސް ދީ، ވައުދުތައް ފުއްދައި މެނިފެސްޓޯ ފުރިހަމަ ކުރެއްވި ވެރިއަކީ ކުރީގެ ރައީސް ޔާމީން އަބްދުލްގައްޔޫމް ކަމަށް، ކުރީގެ ހެލްތް މިނިސްޓަރު އަދި ޕީޕީއެމްގެ ސެނެޓަރ ނާޒިމް ވިދާޅުވެއްޖެ އެވެ.

ރޭގެ ބޭއްވި ޕީޕީއެމްގެ ޖަގަހަ ޖަލްސާގައި ވާހަކަފުޅުދައްކަވަމުން ނާޒިމް ވިދާޅުވީ މިއަދު ރާއްޖޭގައި މި އޮތް ސަރުކާރަކީ އޮތް ކަމަށް ބުނި ނަމަވެސް ނެތް ސަރުކާރެއް ކަމަށެވެ. އެހެނީ ސަރުކާރެއްގައި ހުންނަން ޖެހޭ ވަރަށް ގިނަ އަސާސީ ސިފަތައް މި ސަރުކާރުގައި ނެތް ކަމަށާ، އަދި ރައްޔިތުންނަށް ހިދުމަތް ކުރުމުގައިވެސް ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ފެއިލްވެފައިވާކަމަށް ނާޒިމް ވިދާޅުވި އެވެ.

"ކޯލިޝަންގައި ތިބެގެން މިސަރުކާރުވަންތަ ނެތް ސަރުކާރުގައި ތިބި ކޮންމެ ލީޑަރަކީ މިގައުމަށް ހިޔާނާތްތެރިވަމުންދާ ވަގެއް މިއަދު ގައުމުގެ ދިފާއުގައި ރައްޔިތުންގެ ހައްގުގައި ސަރުކާރެއް ހަމަ މަގަށް އެޅުވުމުގައި ސަރުކާރުވަންތަކަން ގެއްލިފައިވާ ސަރުކާރެއް ހަމައަކަށް އެޅުވުމުގައި ހަމައެކަނި މަސައްކަތް ކޮށްފައިވާ ސަރުކާރަކީ ޕީޕީއެމްގެ ސަރުކާރުގައި ރައީސް ޔާމީންގ ޒައާމަތުގައި." ނާޒިމް ވިދާޅުވިއެވެ.

މިއާއެކު، ނާޒިމް ވިދާޅުވީ ކޮންމެ ވެރިއެއް ވެސް ވެރިކަމަށް އަންނަނީ، ވައުދުތަކެއް ވެ މެނިފެސްޓޯއެއްގެ ދަށުންކަމަށެވެ. އެގޮތުން މި މެނިފެސްޓޯތަކުގެ ދަށުން ވެރިކަމަށް އަންނަ މީހުން އަމަލު ކުރާ ތިން އުސޫލެއް އޮންނަކަމަށާއި އެއީ ވައުދު ވެ ވައުދު ފުއްދުމާއި ވާ ވައުދުތައް މަތިން ހަނދާން ނެތޭ ވެރިން ކަމަށެވެ. އަދި ސަރުކާރުގެ ސަރުކާރު ވަންތަކަމުގެ ސިފަތައް ގެއްލިދާ ވެރިން ތިބޭކަމަށް އޭނާ ވިދާޅުވި އެވެ.

ނާޒިމް ވިދާޅުވީ ރައްޔިތުންނަށް ހެޔޮ ވެރިކަމެއް ގެނެސް ދީ، ވައުދުތައް ފުއްދައި މެނިފެސްޓޯ ފުރިހަމަ ކުރެއްވި ވެރިއަކީ ރައީސް ޔާމީން ކަމަށެވެ. އަދި އެމަނިކުފާނުގެ އަމާޒަކަށް ވީ ރައްޔިތުންނަށް ތަނަވަސް ހެޔޮ ދިރިއުޅުމެއް ހޯދައިދޭންކަމަށް އޭނާ ވިދާޅުވި އެވެ.

ރައްޔިތުންނަށް ވީ ވައުދުތައް ފުއްދުމަށް ސަރުކާރުން ނުކުޅެދިފައިވާ ކަމާއި އަދި މި ސަރުކަާރުން ކަން ކުރަމުން ދަނީ ވީ ވައުދު ތަކާއި ދިމާ އިދިކޮޅަށް ކަން ފާހަގަކުރައްވައި ނާޒިމް ވަނީ މި ސަރުކާރުން ވީ ވައުދާއި، ކަން ކުރަމުން އަންނަ ގޮތާއި އަޅައި ކިޔާފައެވެ.

އެގޮތުން އޭނާ ވިދާޅުވީ، މި ސަރުކާރުން ވައުދުވީ ދަރަނި ކުޑަކުރަން ކަމަށާއި ނަމަވެސް މިހާރު ދައުލަތުގެ ދަރަނި 100 ބިލިއަނަށް ވުރެ ބޮޑުވެފައިވާ ކަަމަށް ނާޒިމް ވިދާޅުވިއެވެ. ދަރަނީގެ 50 އިންސައްތަ ނުވަތަ 50 ބިލިއަނަށް ވުރެ ބޮޑު އަދަދަކީ މި ސަރުކާރުން އުފެއްދި ދަރަނި ކަމަށް ނާޒިމް ވިދާޅުވިއެވެ. އަދި ވިދާޅުވީ ސަރުކާރު މިއަދު އޮތީ ސަރުކާރު މެނޭޖްކުރަން ނުކުޅެދިފައި ކަމަށެވެ. ވެރިމީހާގެ އާރެއް ބާރެއް ނެތް ކަމަށާއި ވަޒީރުންނާއި މުއައްސަސާތަކުން އަމަލު ކުރަމުން ދަނީ އެބަޔަކު ބޭނުން ގޮތަކަށް ކަމަށެވެ.