ޤުރުއާން އަށް އިހާނަތިކޮށް ހިތި މައްސަލަ ހަރުކަށި އިބާރާތުން ކުށްވެރި ކުރަން: ޝާހިދު
ސްވިޑެން ގެ ފާ-ރައިޓް، ސިޔާސީ ޕާޓީއެއްގެ ލީޑަރަކު ކަމަށްވާ ރަސްމުސް ޕަލުޑާން ޤުރުއާން އަށް އިހާނަތިކޮށް ހިތި މައްސަލަ ހަރުކަށި އިބާރާތުން ކުށްވެރި ކުރައްވާ ކަމަށް ރާއްޖޭގެ ޚާރިޖީ ވަޒީރު ޝާހިދު ވިދާޅުވެއްޖެއެވެ.
ފާ- ރައިޓް ޕާޓީގެ ހަރުކަށި ލީޑަރު ރަސްމުސް ޕަލުޑާން އިސްވެ ހުރެ އެ ޕާޓީގެ މެމްބަރުން ތަކެއް ގުރުއާން ލިޔެފައިވާ ޚަތިމުތަކެއް ސްވިޑެން ގައި ހުންނަ ތުރުކިޔޭ އެމްބާސީ ކުރިމަތީގައި އަންދާފައިވަނީ އިއްޔެގެ ވަގުތެއްގައެވެ.
ސްވިޑެން ގެ ސަރުކާރުގެ ހުއްދައާއި އެކު ފުލުހުންގެ ފުރިހަމަ ހިމާޔަތުގެ ދަށުގައި ހިންގި މި ހަރުކަށި އަމަލު ގާތްގަޑަކަށް ގަޑި އިރެއްހާ އިރުވަންދެން ކުރިއަށް ދިޔަ އިރު، މި ހަރަކާތުގެ ތެރެއިން، ހަތިމުތަކެއް އެންދުމުގެ އިތުރުން ތުރުކިޔޭ އާއި ދެކޮޅަށް އަޑު އުފުލައި އިސްލާމް ދީނަށް ފުރައްސާރަ ވެސް ވަނީ ކޮށްފައެވެ.
މިކަމާއި ގުޅިގެން ގިނަ އަދަދެއްގެ މުސްލިމް ގައުމު ތަކުންވެސް އަންނަނީ ނުރުހުން ފާޅުކުރަމުންނެވެ. އެގޮތުން، ތުރުކިޔޭ، ސައުދީ އަރަބިއްޔާ، ޖޯޑަން އަދި ކުވޭތުން ވަނީ އެކަން ކުށްވެރިކޮށް ބަޔާން ވެސް ނެރެފައެވެ.
މި މައްސަލާގައި ދިވެހި ސަރުކާރުން ވަކި އެއްޗެއް ހާމަ ނުކުރާތީ ގިނަ ބައެއްގެ ފާޑުކިޔުންތައް ސަރުކާރަށް އަމާޒުވަމުންދަނިކޮށް، ޝާހިދު ކުރެއްވި ޓްވީޓެއްގައި އޭނާ ވަނީ، ރަސްމުސް ޕަލުޑާން ގެ ޢަމަލު ހަރުކަށި އިބާރާތުން ކުށްވެރި ކުރައްވާ ކަމަށް ވިދާޅުވެފައެވެ.
ސްވިޑެން ގެ ސަރުކާރުގެ ހުއްދަ އާއި އެކު ރަސްމުސް ޕަލުޑާން ކުރިއަށް ގެންދިޔަ މި ހަރަކާތަކީ ސްވިޑެން ނޭޓޯގެ މެންބަރަކަށް ވުމަށް ތުރުކިޔޭ އިން ހުރަސް އަޅަމުން ގެންދާތީ ހިންގި ހަރަކާތެއް ކަމަށް އެމީހުން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
