މަހަށް ނުކުމެ އުޅުނު ދޯންޏެއް ބިންދައިގެން ގޮއްސި!
މަހަށް ނުކުމެ އުޅުނު ދޯންޏެއް ބިންދައިގެން ގޮސް ދެފަޅިވެއްޖެއެވެ.
ގއ. ދާންދޫ ކަނޑުމަސްވެރިކަން ކުރާ "ފަހި" ނަމަކަށް ކިޔާ މި ދޯނި ބިންދައިގެންގޮސް ދެފަޅި ވެފައިވަނީ، ރޭ ފަތިހު ގާތްގަނޑަކަށް 3:30 ހާއިރު މަހަށް ނުކުމެ އުޅެނިކޮށް ކަމަށް، އެ ދޯނީގެ އިސް ފަރާތެއް ކަމަށްވާ ޒުބައިރު "ވޮއިސް" އަށް މައުލޫމާތު ދެއްވައެވެ.
ޒުބޭރު އިތުރަށް ވިދާޅުވީ، ދޯނި ބިންދައިގެން ދިޔައިރު ދޯނީގައި ޖުމުލަ 19 މީހުން ތިބި ކަމަށާއި، އެތަނުން އެކަކަށް ކުޑަ ވަރެއްގެ އަނިޔާވެފައިވާ ކަމަށެވެ. އެހެންނަމަވެސް، ލިބިފަނީ ސީރިއަސް އަނިޔާ ތަކެއް ނޫން ކަމަށްވެސް އޭނާ މައުލޫމާތު ދެއްވައެވެ.
ޒުބޭރު އިތުރަށް ވިދާޅުވީ، ދޯނީގައި ތިބި ފަޅުވެރިން ރަށަށް ގެނައުމުގެ މަސައްކަތް ކުރަމުންދާ ކަމަށެވެ. އަދި ދޯނީގެ ކުރީކޮޅު ކަނޑުހުޅުދޫ ދޯންޏެއްގެ ކަހަތުގައި ޖަހައިގެން އަދި ފަހަތުކޮޅު ގެމަނަފުށީ ދޯންޏެއްގެ ކަހަތުޖަހައިގެން ރަށަށް ގެނައުމުގެ މަސައްކަތް ކުރަމުންދާއިރު، ފަހަތުކޮޅު ރަށާއި ހަމައަށް ފޯރާނީ ހަވީރު ކަމަށްވެސް އޭނާއަށް މައުލޫމާތު ލިބިފައިވާ ކަމަށް ޒުބޭރު ވިދާޅުވިއެވެ.
މި ހާދިސާ ހިނގުމަށް މެދުވެރިވި ސަބަބެއް މިހާތަނަށް ދެނެގަނެވިފައި ނުވާއިރު، ހާދިސާގެ ސަބަބުން ދޯނީގައި ހުރި ތަކެއްޗަށާއި ދޯންޏަށް ވެސް ލިބިފައިވާ ގެއްލުން ދެނެގަނެވިފައި ނުވާކަމަށް ޒުބޭރު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
