ދުވާފަރު އަތުން މޮޅުވެ އިނގުރައިދޫ ލީގު ބުރު ނިންމާލީ އެއްވަނައިގައި!

ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2023 ގެ،  ރ. އަތޮޅު ލީގު ބުރުގެ ފަހު މެޗުގައި މިރޭ އިނގުރައިދޫއާއި ދުވާފަރު ވާދަކުރި މެޗު 5-1 ގެ ނަތީއްޖާއަކުން އިނގުރައިދޫ ކާމިޔާބުކޮށްފިއެވެ.

މިރޭގެ މެޗަށް ނުކުތުމުގެ ކުރިން ދެޓީމަށް ވެސް އަތޮޅު ބުރު ފައިނަލްގެ ޖާގަ ކަށަވަރުވެފައި އޮތުމުން ދެ ޓީމުން ވެސް ނުކުތީ ބަދަލުތަކަކާއި އެކުގައެވެ. ހާއްސަކޮށް ދުވާފަރު ޓީމުން މި މެޗުގައި ބޭނުންކުރީ އެޓީމުގެ ބެންޗު ޓީމެވެ. މެޗުގެ ފުރަތަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މި މެޗުގައި ފުރަތަމަ ލަނޑުޖަހައި ކުރިހޯދީ އިނގުރައިދޫ ޓީމުންނެވެ.

މި ލަނޑު އެޓީމަށް ކާމިޔާބުކޮށްދިނީ މުހައްމު މަންދޫހް އެވެ. އޭނާ ވަނީ މި މުބާރާތުގައި އިނގުރައިދޫ ކުޅުނު ހަތަރު މެޗުގައި ވެސް އެޓީމަށް ލަނޑުޖަހައިދީފައެވެ. ފުރަތަމަ ހާފު ނިމުމުގެ ކުރިން ދުވަފަރު ޓީމަށް ނަތީއްޖާ އެއްވަރުކޮށްދިނީ މުހައްމަދު ޖުމާން އެވެ.

މެޗުގެ ދެވަނަ ހާފުގައި އިނގުރައިދޫ ޓީމުން އިތުރު ހަތަރު ލަނޑު ކާމިޔާބުކުރިއެވެ. އެޓީމުގެ ދެވަނަ ލަނޑާއި ތިންވަނަ ލަނޑު އައިހަމް ކާމިޔާބުކޮށްދިން އިރު ހަތަރު ވަނަ ލަނޑު ކާމިޔާބުކޮށްދިނީ މަސީދު އެވެ. އަދި އެޓީމުގެ ފަސްވަނަ ލަނޑު ކާމިޔާބުކޮށްދިނީ ކެޕްޓަން ހާފިޒް އެވެ.

މިރޭގެ މެޗަށް ފަހު ވޮއިސް އަށް މައުލޫމާތް ދެމުން އިނގުރައިދޫ ޓީމުގެ ކޯޗު އަހުމަދު ވިސާލް (އަންދު) ބުނީ މިރޭގެ މެޗަކީ ދެޓީމަށް ވެސް އެހާ މުހިންމު މެޗެއް ނޫންކަމަށާއި، ފައިނަލުގައި ދުވާފަރާއި ދެކޮޅަށް ކުޅޭ މެޗަކީ ވަރަށް އުނދަގޫ މެޗަކަށް ވާނެކަމަށެވެ. މިޓީމުގެ ވަރަށް މުހިންމު ތިން ކުޅުންތެރިއެއް ހޯގާ ހުމުގެ ސަބަބުން ވަރަށް ބަލިކޮށް އުޅެނީ. ފައިނަލް މެޗަށް އެކުޅުންތެރިން ފިޓްވޭތޯ މިބަލަނީ، މިވަގުތު އިނގުރައިދޫ ޓީމަށް ދިމާވެފައިވާ އެންމެ ބޮޑު ގޮންޖެހުމަކީ އެއީ އަންދު ބުންޏެވެ.

ދުވާފަރު ޓީމުގެ މެނޭޖަރ އިބްރާހިމް ޖަލީލް ވޮއިސް އަށް މައުލޫމާތް ދެމުން ބުނީ މިރޭގެ މެޗަކީ ފައިނަލް މެޗަށް ތައްޔާރުވުމުގެ ގޮތުން އެޓީމުގެ ވީހާވެސް ގިނަ ކުޅުންތެރިންނައް ފުރުސަތު ދީގެން ކުޅުނު މެޗެއްކަމަށެވެ. އިތުރަށް ވާހަކަދައްކަމުން ޖަލީލު ބުނީ ފުޓްސަލްގައި މި ދެޓީމަކީ ވަރަށް ވާދަވެރި ދެޓީމު ކަމަށާއި މިރޭގެ މެޗަށް ޓީމަށް ބޮޑެތި ބަދަލުތަކެއްގެނައީ ފައިނަލުގެ ޖާގަ ޔަގީންވެފައި އޮތުމުންކަމަށެވެ. އަދި ދުވަފަރު ޓީމު އަންނަނީ ފައިނަލް މެޗަށް ވަރަށް ރަގަޅަށް ތައްޔާރުވަމުން ކަމަށެވެ.

މި ދެޓީމު ވާދަކުރާ ފައިނަލް މެޗު ކުޅަމަށް ހަމަޖެހިފައިވަނީ ފެބުރުއަރީ 25 ވާ ހޮނިހިރު ދުވަހު ހަވީރު އެވެ.