ރައީސްގެ މޮޓޯކޭޑަށް ހުރަސްއަޅައިގެން ބަންދުކުރި މީހުންނަށް މުއްދަތު ޖަހައިފި

ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު ދަތުރުކުރައްވަމުން ދިޔަ މޮޓޯކޭޑަށް ހުރަސްއަޅިކަމުގެ ތުހުމަތުގައި ހައްޔަރުކުރި 4 މީހުން ބަންދުގައި ބޭތިއްބުމަށް މުއްދަތު ޖަހައިފި އެވެ.

ބައިނަލްއަޤްވާމީ އަންހެނުންގެ ދުވަސް ފާހަގަކުރުމަށް ހުޅުމާލޭގައި ހުންނަ ޢުމަރު ޒާހިރު އޮފީސް އިމާރާތުގައި ބޭއްވެވި ޖަލްސާގައި ބައިވެރިވެ ވަޑައިގެންނެވުމަށްފަހު ރައީސުލްޖުމްހޫރިއްޔާ ގެކޮޅަށް ވަޑައިގެންނެވި މަގުމަތިން އިދިކޮޅު މުޒާހަރާގެ ބައިވެރިން ވަނީ ޕީޕީއެމް އޮފީސް ސަރަހައްދުން ރައީސްގެ މޮޓޯކޭޑަށް ހުރަސް އަޅާފައެވެ.

މޮޓޯކޭޑަށް ހުރަސް އެޅިކަމުގެ ތުހުމަތުގައި 4 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. މީގެ ތެރެއިން 2 މީހެއްގެ ބަންދަށް ވަނީ 5 ދުވަސް ޖަހާފައެވެ. ބަންދުގެ މުއްދަތަށް 5 ދުވަސް ޖަހާފައިވަނީ އަންހެނަކާއި ފިރިހެނަކަށެވެ. އަދި އިތުރު 2 ފިރިހެނުންގެ ބަންދަށް ވަނީ 15 ދުވަސް ޖަހާފައެވެ.

ޕީޕީއެމްގެ ރައީސް އަބްދުﷲ ޔާމީން އަބްދުލްގައްޔޫމު މިނިވަންކުރުމަށް ގޮވާލާ އެރޭ ޕީޕީއެމްއިން ކުރިއަށް ގެންދިޔަ މުޒާހަރާއިން ފުލުހުންގެ ބެލުމުގެ ދަށަށް ގެންދިޔަ 17 މީހުން ގެންގޮސްފައިވާއިރު، އެމީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ކޯޓުންވަނީ ޝަރުތު ކުރުމަށްފަހު އެމީހުން ދޫކޮށްލާފައިވާކަމަށެވެ.

ރައީސްގެ މޮޓޯކޭޑަށް އިދިކޮޅުގެ މުޒާހަރާގެ ބައިވެރިންނަށް ހުރަސްއަަޅަން ފުރުސަތު ލިބުނު މައްސަލައިގައި ސަލާމަތީ ބާރުތަކުން އަމަލުކުރި ގޮތާއިގުޅޭ ތަފްސީލީ މައުލޫމާތު ހޯދުމަށް، ސަލާމަތީ ބާރުތައް، މަޖިލީހުގެ ސަލާމަތީ ޚިދުމަތްތަކާއި ބެހޭ 241 ކޮމެޓީއަށް ހާޒިރުކުރަންވަނީ ނިންމާފައެވެ.

އޭގެ އިތުރުން ދިފާއީ ބާރުން ވަނީ އެ މައްސަލަ ބެލުމަށް ޚާއްސަ ކޮމިޓީއެއް ވެސް އެކުލަވާލާފައެވެ.