40 ޕާޓީ ހެދިޔަސް ނަޝީދަށް ދެން ވެރިކަމަކަށް ނާދެވޭނެ: މޫސާ އަލީ މަނިކު

ކިތަންމެ ގިނަ ސިޔާސީ ޕާޓީއެއް އުފެއްދިޔަސް އެމްޑީޕީގެ ރައީސް މުޙައްމަދު ނަޝީދަށް ދެން ދިވެހިރާއްޖޭގެ ވެރިކަމަށް ނާދެވޭނެކަމަށް ރޯޑު ޑިވެލޮޕްމަންޓު ކޯޕަރޭޝަންގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ވިދާޅުވެއްޖެ އެވެ.

މޫކޭ މިފަދައިން ވިދާޅުވެފައިވަނީ އެމްޑީޕީގެ ތެރޭގައި ތިއްބެވި ރައީސް ނަޝީދަށް ތާއީދުކުރައްވާ މެމްބަރުންތަކެއް ޕާޓީން ނިކުމެވަޑައިގެން "ދި ޑިމޮކްރެޓްސް" ގެ ނަމުގައި އާ ސިޔާސީ ޕާޓީއެއް އުފައްދަން ހުށައަޅާފައިވާ ދަނޑިވަޅުގައި އެކަމަށް ފާޑުވިދާޅުވެ ކުރެއްވި ޓްވީޓެއްގަ އެވެ.

ޕާޓީ އުފެއްދުމަށް އެމްޑީޕީން ނިކުމެ ވަޑައިގެންނެވި ބޭފުޅުން ވިދާޅުވަމުން ދަނީ އެ ޕާޓީ އުފެއްދުމުގެ ހުރިހާކަމެއް ކުރަމުންދަނީ ނަޝީދަށް އެނގިވަޑައިގެން އެމަނިކުފާނުގެ ލަފާފުޅު ހޯއްދަވައިގެން ކަމަށެވެ.

އެ ޕާޓީއާއި ގުޅިވަޑައިގަތުމުގެ ފުރުސަތު ރައީސް ނަޝީދަށް އޮންނާނެ ކަމަށާއި، އަދި އެމަނިކުފާނު ބޭނުންފުޅުވެލައްވާ ނަމަ ޕާޓީގެ ރިޔާސީ ޓިކެޓު ހޯއްދެވުމުގެ މަސައްކަތް ކުރެއްވޭނެ ކަމަށާއި، އެކަމަށްޓަކައި ޕާޓީގެ އިސް ސަފުން އެހީތެރިވާނެކަމަށް ދި ޑިމޮކްރެޓްސްއިން ވަނީ ބުނެފައެވެ.

އެކަމަށް އަލިއަޅުވާލައްވާ މޫކޭ ވިދާޅުވީ ދި ޑިމޮކްރެޓްސްގެ އިތުރުން 40 ސިޔާސީ ޕާޓީ އުފެއްދިދާނެ ކަމަށެވެ. އެހެން ނަމަވެސް ސިޔާސީ ޕާޓީތަކެއް އުފައްދައިގެން ރައީސް ނަޝީދު ދެން ދިވެހިރާއްޖޭގެ ވެރިކަމަށް ހޮވޭނެ ގޮތެއް ނޯންނާނެކަމަށް މޫކޭ ވިދާޅުވި އެވެ.

އެއާއެކު އޭނާ ވިދާޅުވީ ރައީސް ނަޝީދަށް ކުރީގެ ރައީސް ޑރ މުހައްމަދު ވަހީދު ހަސަންމަނިކަށް ވީ ވަރުވެސް ރިޔާސީ އިންތިޚާބެއްގައި ދެން ނުވާނެ ކަމަށެވެ.

"ބޮޑާ ހާކާފަ ޓިކެޓް ލިބެންދެން ޕާޓީ ހަދަން ވާނެ. ސާޅީސް ޕާޓީ ހެދިޔަސް އަންނި ދިވެހިންގެ ވެރިއަކަށް ހޮވޭނެ ގޮތެއް ނެތް. ހީވާ ގޮތުން ވަހީދަށް ވީ ވަރުވެސް ނުވާނެ"

އާރުޑީސީގެ މެނޭޖިން ޑިރެކްޓަރު މޫސާ އަލިމަނިކު

އެމްޑީޕީގައި ތިއްބެވި ނަޝީދުގެ ވަފާތެރިން ޕާޓީ ދޫކުރައްވާފައި ވަޑައިގެން އާ ސިޔާސީ ޕާޓީއެއް އުފެއްދުމުގެ މަސައްކަތް ފެށީ، އެމްޑީޕީގެ ރިޔާސީ ޕްރައިމަރީގައި ނަޝީދަށް ނާކާމިޔާބުވުމުންކަމަށް އެމްޑީޕީގެ އިސް ބޭފުޅުން ދަނީ ވިދާޅުވަމުން ނެވެ.

ރިޔާސީ ޕްރައިމަރީއާއި ގުޅިގެން ދެ ރައީސުންގެ ދެމެދުގައި އޮތް ވާދަވެރިކަން ބޮޑުވެ، ދެ ރައީސުންނަށް ތާއީދުކުރާ މެމްބަރުންގެ މެދުގައި އޮތް ނުތަނަވަސްކަން ވެސް އިތުރުވެގެން ދިޔައެވެ. އަދި މެމްބަރުންގެ މެދުގައި ބަހުގެ ހޫނު ހަމަލާތަކެއް ވެސް ބަދަލުކުރެވިގެން ދިޔައެވެ.

އެފަހުން ނަޝީދަށް ތާއީދުކުރާ ބައެއް މެމްބަރުން ފޯޅަވަހި މައްސަލައިގައި ސަރުކާރާއި ދެކޮޅަށް މަސައްކަތް ކުރަން ފެށުމުން ޕާޓީން ވަކިކޮށްފައިވާއިރު، އެމްޑީޕީގައި ތިބި ނަޝީދަށް ތާއީދުކުރާ މެމްބަރުން ޕާޓީން ވަކިވި ދަނޑިވަޅުގައި، ޕާޓީން ވަނީ 2023 ވަނަ އަހަރުގެ ރިޔާސީ އިންތިޚާބަށް އެމްޑީޕީން ނެރޭ މެނިފެސްޓޯ ތައްޔާރުކުރުމަށް ބޭނުންވާ މައުލޫމާތު ހޯދުމަށް އަތޮޅުތެރެއަށް ދަތުރުތައް ފައްޓާފަ އެވެ.

އަދި ރިޔާސީ އިންތިޚާބަށް ތައްޔާރުވުމުގެ ގޮތުން ކޮންމެ ރަށެއްގައި އެމްޑީޕީގެ ދިދަ ނެގުމުގެ ހަރަކާތެއް ކުރިއަށް ގެންގޮސްފަ އެވެ.

ޕާޓީން މެމްބަރުންތަކެއް ވަކިވެގެން ދިޔަ ނަމަވެސް އަންނަ ރިޔާސީ އިންތިޚާބު އެމްޑީޕީ ކާމިޔާބުކުރާނެ ކަމަށާއި، އެކަމަށްޓަކައި ކުރަން ޖެހޭ މަސައްކަތްތައް ޕާޓީން ވަރަށް ފުރިހަމަޔަށް ކުރަމުން ގެންދާނެކަމަށް އެމްޑީޕީގެ ލީޑަޝިޕުން ވަނީ ބުނެފަ އެވެ.