އާރަށު މައްސަލަ: ރައީސް ޔާމީންގެ ފަރާތްޕުޅުން އިސްތިއުނާފީ ނުކުތާތައް ހުށައަޅައިފި

ވ. އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް މިދިޔަ ޑިސެމްބަރު މަހުގެ 25 ގައި ކްރިމިނަލް ކޯޓުން ކުރި 11 އަހަރު ޖަލުހުކުމް އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކުރި މައްސަލައިގެ އަޑުއެހުމެއް ހައި ކޯޓުގައި ކުރިއަށް ގެންގޮސްފި އެވެ.

އިއްޔެގެ އަޑުއެހުމުގައި ކުރިއަށް ގެންގޮސްފައިވަނީ ރައީސް އަބްދުالله ޔާމީން އަބްދުލްގައްޔޫމުގެ ފަރާތްޕުޅުން ހުށައަޅާ އިސްތިއުނާފީ ނުކުތާތައް ހުށައެޅުމެވެ. އެގޮތުން ޖުމްލަ 14 ނުކުތާތެއް އެމަނިކުފާނުގެ ފަރާތްޕުޅުން ވަނީ ހައިކޯޓަށް ހުށައަޅާފަ އެވެ.

ރައީސް ޔާމިނުގެ ފަރާތްޕުޅުން ހުށައެޅި ނުކުތާތަކުގެ ތެރޭގައި ހިމެނެނީ؛

1. ޝަރީއަތުގެ ކުރީގެ ހުށައެޅުންތައް ހުށައެޅުމުގެ މުއްދަތު ކްރިމިނަލް ކޯޓުން ނުގައިފައިވާ ގުޅޭގޮތުން ހުށައެޅި ނުކުތާ

2. އެކަށީގެންވާ ޝައްކެތް ނެތި ކުށުގެ ރުކުންތައް ދައުލަތުން ސާބިތުކޮށްފައި ނުވި ނަމަވެސް، ކުށްސާބިތުކޮށްދީފައިވާ ކަމަށް ބުނެ ހުށައެޅި ނުކުތާ

3. ކުށުގެ އުންސުރުތައް ނުބައިކޮށް މާނަކޮށް، ނުބައިކޮށް ތަތުބީގުކޮށް ކުށް ސާބިތުވާކަމަށް ބުނެ ހުށައަޅާފައިވާ ނުކުތާ

4. ސުޕްރިމް ކޯޓުގެ ބައެއް ގަޒިއްޔާތަކާއި، ހައިކޯޓުގެ ގަޒިއްޔާތަކުގައި ކަނޑައަޅާފައިވާ އުސޫލުތަކާއި ކުށުގެ ބައިވެރިންނާއި، އަދާވާތްތެރިންގެ ހެކިބަސް ބަލައިގަތުމާއި ގުޅޭ އުސޫލުތަކާއި ޚިލާފަށް، އަހުމަދު އަދީބާއި އަބްދުﷲ ޒިޔަތުގެ އިތުރުން އަހުމަދު ނާޒިމުގެ ހެކިބަސް ބަލައިގަނެ، ކުށް ސާބިތުކޮށްފައިވާ ކަމަށް ބުނެ ހުށައެޅި ނުކުތާ

5. ޖިނާއީ އިޖުރާއަތުގެ ގާނޫނާއި ޚިލާފަށް ދައުލަތުން ހާމަކުރި ހެކިތައް ބަލައިގަނެ ކުށް ސާބިތުކުރުމުގައި އެ ހެކިތަކަށް ރިއާޔަތްކޮށްފައިވާކަމަށް ބުނެ ހުށައެޅި ނުކުތާ

6. ދިފާއުން ހުށައަޅާ ހެކިންގެ ހެކިބަސް ނެގިފަހުން، އާ ހެކި ހުށައެޅުމަށް ދައުލަތަށް ފުރުސަތުދީ، ދިފާއުގެ ހެކިންނާއި ގުޅޭގޮތުން ސުވާލު އުފެއްދުމަށް ފުރުސަތު ދީފައިވާކަމަށް ބުނެ ހުށައެޅި ނުކުތާ

7. ޤާނޫނު ބަޔާންކުރުމާއި ނުލާ ދިފާއީ ބައެއް ހެކިންގެ ހެކިބަހަށް ބުރަދަން ނުދީ ބައެއް ހެކިން ދީފައިވަނީ ދޮގު ހެކި ކަމަށް ކަނޑައަޅާ ދިފާއުން ހެކި އުފައްދާފައިވާކަމަށް ބުނެ ނިންމާފައިވާ ނިންމުމާއި ގުޅިގެން ހުށައެޅި ނުކުތާ

8. ނާއީ އިޖުރާއަތުގެ ގާނޫނުގެ 47 ވަނަ މާއްދާގެ (ބ) ނުބައިކޮށް މާނަކޮށް ތަތުބީގުކޮށްފައިވާކަމަށާއި، ހަނު ހުރުމުގެ ހައްގަށް އުނިކަން އަންނަ ގޮތަށް މާނަކޮށްފައިވާކަމަށް ބުނެ ހުށަހެޅި ނުކުތާ

9. އެއްކުށެއްގެ އަމަލުން ފުރިހަމަވެގެންވާ އެހެން ކުށެއްގެ ދައުވާ ސާބިތުކޮށްފައިވާކަމަށް ބުނެ ހުށައެޅި ނުކުތާ

10. ދައުލަތުން ހުށައެޅި ބައެއް ހެކިތަކުގެ ޗެއިން އޮފް ކަސްޓަޑީ ބެލެހެއްޓިފައި ނެތްކަން ހާމަވާން އޮތް ނަމަވެސް ހެކިތަކުގެ ސައްހަކަން ކަށަވަރު ނުކުރެވޭ ހެކިތަކެއް ބަލައިގެންފައިވާކަމަށް ބުނެ ހުށައެޅި ނުކުތާ

11. ވ. އާރަށް ކުއްޔަށް ދޫކުރުމަށް ޓުއަރިޒަމް މިނިސްޓްރީއަށް ބަދަލުކުރުމަށް ރައީސް ޔާމީން އެދިވަޑައިގެންފައި ނުވި ނަމަވެސް އެކަން ސާބިތުވާކަމަށް ކަނޑައަޅާފައިވާކަމަށް ބުނެ ހުށައަޅާފައިވާ ނުކުތާ

12. ސުޕްރިމް ކޯޓުން ރައީސް ޔާމިނުގެ މައްސަލައިގައި ކުރިން ނިންމާފައިވާ ނިންމުމެއް ނުބައިކޮށް މާނަކޮށް ތަތުބީގުކޮށްފައިވާ ކަމަށް ބުނެ ހުށައެޅި ނުކުތާ

13. ބައެއް ހެކިތައް ވަޒަންކުރުމުގައި ގާނޫނު ނުބައިކޮށް މާނަކޮށް އެ ހެކިތަކަށް ބުރަދަންދީ ރައީސް ޔާމިނުގެ މައްޗަށް ކުށް ސާބިތުވާކަމަށް ކަނޑައަޅާފައިވާކަމަށް ބުނެ ހުށެއިޅު ނުކުތާ

14. ރައީސް ޔާމިނުގެ މައްޗަށް އާރަށު މައްސަލައިގައި އިއްވި ހުކުމާއި، ލިޔުމުގައި އޮތް ހުކުމުގައި ފުށުއެރުންތަކެއް ހުރިކަމަށް ބުނެ ހުށައަޅާފައިވާ ނުކުތާ

މިއަދުގެ އަޑުއެހުމުގައި ރައީސް ޔާމިނުގެ ފަރާތްޕުޅުން ހުށައަޅާ ހުރިހާ ނުކުތާއެއް ވަނީ ހައިކޯޓަށް ހުށައަޅާފަ އެވެ.

ދެން އޮންނާނީ އެ މައްސަލައިގައި ރައީސް ޔާމީން ހުށައަޅާފައިވާ ނުކުތާތަކާއި ގުޅިގެން ދައުލަތުން ޖަވާބުދާރީވުމެވެ.

ރައީސް ޔާމިނުގެ ފަރާތްޕުޅުން ވަނީ އެ މައްސަލައިގެ އަޑުއެހުމެއް އީދު ބަންދުގެކުރިން މިއަދަށް ތާވަލުކޮށްދިނުމަށް އެދިވަޑައިގެންފަ އެވެ.

އެހެން ނަމަވެސް ފަނޑިޔާރު ނިންމެވީ މިހާރު އެ މައްސަލަ ކުރުއަށް ގެންދިއުމަށް ތާވަލުކޮށްފައިވާ ގޮތަށް މައްސަލަ ކުރިއަށް ގެންދިއުމަށެވެ. އަދި ދެން އެންމެ އަވަހަށް އޮންނަ އަޑުއެހުމެއްގައި ދައުލަތަށް ޖަވާބުދާރީވާން ފުރުސަތުދީ މައްސަލައިގެ އަޑުއެހުންތައް ކުރުކޮށްލުމަށް މަސައްކަތްޕުޅު ކުރައްވާނެކަމަށް ކޯޓުން ވަނީ ބުނެފައެވެ.