މަޖިލީސް ހިޞާރުކޮށްގެން ތިބީ މަޖިލީހުގައި ތިބި ނުފޫޒުގަދަ މެމްބަރުންތަކެއް: ޝަރީފު

ރައްޔިތުންގެ މަޖިލީސް ހިޞާރުކޮށްގެން ތިބީ މަޖިލީހުގައި ތިބި ނުފޫޒުގަދަ މެމްބަރުންތަކެއް ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެ އެވެ.

ޝަރީފު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ.

ޝަރީފު ވިދާޅުވީ ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ މެމްބަރުންތަކެއް އެ ޕާޓީން ވަކިވުމާއި ގުޅިގެން މަޖިލީހުގެ ކޮމެޓީތަކުގެ ކޮމްޕޮސިޝަނަށް ބޮޑެތި ބަދަލުތަކެއް ގެންނަން ޖެހި، ކޮމެޓީތައް އަލުން އެތުރުމުގެ މަސައްކަތްތައް ކުރަން ޖެހިފައި އޮތް އިރު އެކަން ނުކޮށް ހުއްޓުވާފައި އޮތް ކަމަށެވެ.

މަޖިލީހުގެ ކޮމެޓީތައް އެކުލަވާނުލާ އޮތުމަކީ ކޮމެޓީޓަކުގެ މަސައްކަތް ހުއްޓި، މަޖިލީހުގެ މަސައްކަތްތަކަށް ވަރަށް ބޮޑަށް ބުރޫއަރާ ކަމެއްކަން އޭނާ ފާހަގަކުރެއްވި އެވެ. އަދި އެކަމުގެ ޒިންމާ މަޖިލީހުގެ ރައީސް ނަންގަވަން ޖެހިވަޑައިގަންނަވާނެ ކަމަށް އޭނާ ވިދާޅުވި އެވެ.

އެއާއެކު ޝަރީފު ވިދާޅުވީ މަޖިލީސް ހިޞާރުކޮށްގެން ހުންނެވީ ރައީސުލްޖުމްހޫރިއްޔާ ނޫން ކަމަށެވެ. މަޖިލީހުގެ މަސައްކަތްތައް ހުއްޓުވާ މަޖިލީސް ހިޞާރުކޮށްގެން ތިއްބަވަނީ މަޖިލީހުގައި ތިއްބަވާ ނުފޫޒު ގަދަ މެމްބަރުންތަކެއް ކަމަށް ޝަރީފުވަނީ ވިދާޅުވެފަ އެވެ.

"މި މަޖިލީސް ތެރެއިން މަޖިލީހުގެ ބާރުގަދަ ބޭބޭފުޅުން މިއަދު މަޖިލީސް ހިޞާރުކުރައްވައިގެން ލޮކު އަޅުވައިގެން އެ އުޅުއްވަނީ"

މަރަދޫ ދާއިރާގެ މެމްބަރު ޝަރީފު

ޝަރީފު ވިދާޅުވީ މިއަދު ފެންނަމުން މިދަނީ މަޖިލީހުގެ ހަޔާތުގައި ކުރިމަތިވި އެންމެ ކަޅު ދުވަސްތައް ކަމަށެވެ.

އޭނާ މިފަދައިން ވިދާޅުވެފައިވާއިރު، މަޖިލީހުގެ ރައީސް އާއި ނައިބު ރައީސްގެ އިތުބާރު ނެތްކަމުގެ މައްސަލަ އެކުއެކީގައި މަޖިލީހަށް ހުށައެޅުމާއި ގުޅިގެން، އެ ދެބޭފުޅުން މަޖިލީހުގެ ރިޔާސަތު ބަލަހައްޓަވަން އުޒުރުވެރިވެ މަޖިލީހުގައި ވަނީ މަރުތަޅު އެޅުވިގެން ގޮސްފައެވެ.

އަދި މަޖިލީހުގެ ވަރަށް ގިނަ ޖަލްސާތަކެއް ކުރިއަށް ނުގެންދެވި ހުއްޓާލަން ޖެހުނެވެ.