މަޖިލިސް ހިނގައިގެން މި ނުދަނީ، އަސްލަމް ރިޔާސަތަށް ވެރިވަން މަސައްކަތް ކުރައްވާތީ: ޠާރިގު

ރައްޔިތުންގެ މަޖިލީސް ތަޅު އެޅުވި، މަޖިލިސް ހުއްޓުމަކަށް އައީ، މަޖިލީހުގެ މެޖޯރިޓީ ލީޑަރ އަދި، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ރިޔާސަތަށް ވެރިވަން މަސައްކަތް ކުރައްވާތީ ކަމަށް މަހިބަދޫ ދާއިރާގެ މެންބަރު އަހުމަދު ޠާރިގު ވިދާޅުވެއްޖެއެވެ.

ރައްޔިތުންގެ މަޖިލީސް ހުއްޓިފައި އޮންނަތާ ގާތްގަނޑަކަށް ހަފްތާއެއް ވެފައި ވަނިކޮށް، މިއަދު، މަޖިލީހުގެ ރައީސް މުހައްމަދު ނަޝީދު ރިޔާސަތާއި ހަވާލުވެވަޑައިގެން، ޖަލްސާއެއް އަންނަނީ ކުރިއަށް ގެންދަވަމުންނެވެ.

އެގޮތުން މިއަދުގެ އެޖެންޑާގައި އޮތީ ކޮމިޓީތައް އެކުލަވާލުމާއި ގުޅޭގޮތުން ބަހުސް ކުރުމެވެ.

އެ ބަހުސްގައި ބައިވެރިވެ ވަޑައިގެން ވާހަކަ ދައްކަވަމުން، ޠާރިގު ވިދާޅުވީ، މަޝްވަރާކޮށްގެން ހައްލެއް ހޯދޭތޯ މަސައްކަތް ކުރައްވާ ކަމަށް މެޖޯރިޓީ ލީޑަރ އަސްލަމް ވިދާޅުވި ނަމަވެސް، އެފަދައިން ކަން ނުކުރައްވާ ކަމަށެވެ.

އަޅުގަނޑަށް މިއަދު ފެންނަނީ މެޖޯރިޓީ ލީޑަރަކީ މަޝްވަރާ ކޮށްގެން ކަންކަން ނިންމުމުގެ ގާބިލުކަން ނެތް ބޭފުޅެއްގެ ގޮތުގައި. އަޅުގަނޑަށް ދެން ބޮޑަށް ފެންނަނީ މެޖޯރިޓީ ލީޑަރގެ އުއްމީދު ރިޔާސަތަށް ހުރީމާ، މުޅި މައްސަލަ ޑެޑްލޮކަކުންވެސް، ރިޔާސަތަށް ވެޑުވުމަށްޓަކައި މަސައްކަތް ކުރާތަން. އެހެންވީމާ މަޖިލިސް ހިނގައިގެން މި ނުދަނީ މި ދެންނެވި ސަބަބުތަކާހުރެ.

މަހިބަދޫ ދާއިރާގެ މެންބަރު އަހުމަދު ޠާރިގު

މިއާއެކު، މަޖިލީހުގެ ކޮންމެ މެންބަރެއްވެސް މަޖިލީހުގެ ކޮންމެވެސް އެއް ކޮމިޓީއެއްގައި ހުންނަންޖެހޭ ކަމަށް ގަވާއިދުގައި އޮންނަކަން ފާހަގަކުރައްވައި ޠާރިގު ވިދާޅުވީ، ގަވާއިދުގައި އެފަދައިން އޮތް ނަމަވެސް، އެމްޑީޕީީން ދާދިފަހުން ވަކިވި މެންބަރުންގެ ތެރޭގައި ތިއްބެވީ މަޖިލީހުގެ އެއްވެސް ކޮމިޓީއެއްގެ މެންބަރަކަށް ނުވާ މެންބަރުން ކަމަށެވެ.

ޠާރިޤް އިތުރަށް ވިދާޅުވީ، ބަންޑާރަ ނާއިބު އާއި ފޮރިން މިނިސްޓަރުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅިފައި އޮތް އިރު، ރައީސުލްޖުމްހޫރިއްޔާ ގެ އިތުބާރު ނެތް ކަމުގެ މައްސަލަ ހުށަހެޅުމަށްވެސް އިދިކޮޅުން ތައްޔާރު ވަމުން އަންނަ ކަމަށެވެ. އަދި އެމްޑީޕީން އިސްވެ ތިބެ، މަޖިލިސް ހުއްޓުވުމަކަށް ގެނައީ އެ މައްސަލަތައް ކުރިއަށް ނުގެންދަވަން ކަމަށްވެސް ޠާރިގު ވިދާޅުވިއެވެ.