މިއަހަރު ހިނގާފައިވާ އަލިފާނުގެ ހާދިސާތަކަށް 1.1 މިލިއަން ރުފިޔާގެ އެހީ ފޯރުކޮށްދެވުނު: އެންޑީއެމްއޭ

މިއަހަރުގެ މިހާތަނަށް ހިނގާފައިވާ އަލިފާނުގެ ހާދިސާތަކުގައި ލިބުނު ގެއްލުންތަކަށް ފައިސާގެ އެހީ ފޯރުކޮށްދެވިފައިވާ ގޮތުގެ އަދާހަމަ ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.

އެގޮތުން އެންޑީއެމްއޭ އިން ބުނެފައިވަނީ މިއަހަރުގެ މިިހާތަނަށް ހިނގި އަލިފާނުގެ ހާދިސާތަކުގައި 8 ރަށަކުން 8 ގެއަކަށް ބޮޑެތި ގެއްލުންތަކެއް ލިބި އެ އޮތޯރިޓީއަށް ރިޕޯޓްކޮށްފައިވާ ކަމަށެވެ.

މިއާއިއެކު އަލިފާނުގެ ހާދިސާގެ ސަބަބުން ލިބުނު ގެއްލުންތަކުން އަރައިގަތުމަށް އެހީގެ ގޮތުގައި އެފަރާތްތަކަށް ޖުމްލަ 1،125940.96 ރުފިޔާ އެންޑީއެމްއޭ އިން ފޯރުކޮށްދީފައިވާ ކަމަށް ވަނީ ބުނެފައެވެ.

އެގޮތުން ފައިސާގެ އެހީ ފޯރުކޮށްދެވުނު 8 ރަށާއި ފައިސާގެ އަދަދުގެ ތަފްސީލު:

-ރ. އުގޫފާރު: 86630

-ސ. ފޭދޫ: 179400

-ހދ.މަކުނުދޫ: 160441.6

-ހދ. ނެއްލައިދޫ: 35655

-ސ. ހިތަދޫ: 191640

-ހއ. ފިއްލަދޫ: 227872

-ގދ. ގައްދޫ: 81281

-އއ. ތޮއްޑޫ: 163020

މިހާދިސާތަކުގައި 17 ފަރާތަކަށް ވަގުތީ ބޯހިޔާވަހިކަމާއި، އަންނައުނާއި، ކައްކައި ކެވޭނެ އިންތިޒާމް ހަމަޖައްސައިދެވުނު ކަމަށް އެންޑީއެމްއޭ އިން ވަނީ ބުނެފައެވެ.

މީގެ އިތުރުން އެންޑީއެމްއޭ އިން ވަނީ ވޭތުވެދިޔަ 5 އަހަރަށް ބަލާއިރު އަލިފާނުގެ ހާދިސާތަކުގައި ގެދޮރަށް ބޮޑެތި ގެއްލުންތަކެއް ލިބިގެން ރިޕޯޓް ކޮށްފައިވާ މިންވަރު އިތުރުވެފައިވާ ކަމަށާއި މީގެ ތެރެއިން އަތޮޅު ތެރެއިން ރިޕޯޓް ކުުރާ މިންވަރު އިތުރުވަމުންދާ ކަމަށް ފާހަގަކޮށްފައެވެ.

އެގޮތުން 2019 ގައި 14 ހާދިސާ، 2020 ގައި 8 ހާދިސާ، 2021 ގައި 16 ހާދިސާ، 2022 ގައި 65 ހާދިސާ އަދި މިއަހަރުގެ ޖޫން މަހާއި ހަމައަށް 31 ހާދިސާ ރިޕޯޓްކޮށްފައިވާ ކަމަށް އެންޑީއެމްއޭ އިން ވަނީ ފާހަގަކޮށްފައެވެ.

މިއާއިއެކު ވޭތުވެދިޔަ 5 އަހަރު ހިނގާފައިވާ އަލިފާނުގެ ހާދިސާތަކުގައި ގެއްލުން ލިބުނު ފަރާތްތަކަށް "ކާރިސާތަކުގައި އެހީ ދިނުމުގައި ގެންގުޅޭ މިންގަނޑު" ދަށުން 19،023،144.29 ޖުމްލަ ރުފިޔާގެ އެެހީ ފޯރުކޮށްދީފައިވާ ކަމަށް އެ އޮތޯރިޓީއިން ވަނީ ބުނެފައެވެ.

އެހެންކަމުން، އަލިފާނުގެ ހާދިސާތަކުން ރައްކާތެރިވުމަށްް އަޅަންޖެހޭ ސަލާމަތީ ފިޔަވަޅުތައް އެޅުމާއި، ގޭސް އަދި ކަރަންޓު ބޭނުން ކުރުމުގައި ރައްކާތެރިވުމާއި، ގޯތި ގެދޮރާއި އަގު ބޮޑު މުދަލުގެ އިތުރުން ވިޔަފާރިތައް އިންޝުއަރެންސް ކުރުމަށް އެންޑީއެމްއޭ އިން ވަނީ އިލްތިމާސް ކޮށްފައެވެ.