ޗުއްޓީ އަށް ފުރުމުގެ ކުރިން ގެދޮރު ރަނގަޅަށް ތަޅު ލެވުނުތޯ ބަލައި ރައްކާތެރިކަމުގެ ފިޔަވަޅު އަޅަން ފުލުހުން އެދިއްޖެ!

މިއަދު ފެށުނު ސްކޫލް ޗުއްޓީއާއި އެކު ރަށްރަށަށް ފުރުމުގެ ކުރިން ރައްކާތެރިކަމަށްޓަކައި ބައެއްކަންކަމަށް ސަމާލުވުމަށް ފުލުހުން އިލްތިމާސް ކޮށްފިއެވެ.

ފުލުހުން ބުނެފައިވަނީ ޗުއްޓީއަށް ދިއުމަށް ރަށުން ބޭރަށް ފުރަންދާން ގެއިން ނުކުތުމުގެ ކުރިން ގެދޮރު ރަނގަޅަށް ތަޅުލެވުނުތޯ ޔަގީންކޮށްލުމަށެވެ. އަދި ފެންލައިޓް، ވައިގޮޅި، ގޭގެ ކުޑަދޮރުތައް އަދި ބެލްކަނި ދޮރުވެސް ތަޅުލެވުނުތޯ ޔަގީންކުރުމަށްވެސް ފުލުހުން އިލްތިމާސްކުރައްވައިފައިވެއެވެ.

އަދި ގޭ ދޮރުމަތީގައި އޮންނަ ފައިފުހި ދަށުގައި ނުވަތަ ފައިވާން ހަރުގައި ހުންނަ ބޫޓު ތެރެއަށް ލާފައި ތަޅުދަނޑި ނުބޭއްވުމަށައި، ދުވާލަކު އެއްފަހަރު ނަމަވެސް ގެދޮރު ބެލޭނެ އިންތިޒާމު ހަމަޖައްސާފައި ދިއުމާ އަދި ގޭގައި އަލިކަން ބެހެއްޓުމަށް ފުލުހުން އިލްތިމާސް ކޮށްފައިވެއެވެ.

ލެޕްޓޮޕް، އައިޕެޑް، ޓެބްލެޓް، ގަހަނާ އަދި އެހެނިހެން ތަކެތި، ތަޅުލެވޭ ތަނެއްގައި ރައްކާކުރުމަކީވެސް މުދަލުގެ ރައްކާތެރިކަމަށް އެޅޭނެ މުހިންމު ފިޔަވަޅެއް ކަމަށާއި ގޭގައި ފައިސާ ނުބަހައްޓުމަށް ފުލުހުން އިލްތިމާސް ކޮށްފައިވެއެވެ.

ޗުއްޓީއަށް ފުރަންދިއުމަށް ގެއިން ނުކުތުމުގެ ކުރިން، ގޭތެރޭގައި ހިނގާފާނެ އަލިފާނުގެ ހާދިސާއަކުން ރައްކާތެރިވުމަށް ފިޔަވަޅު އެޅުމަސް ފުލުހުން އިރުޝާދު ދީފައިވެއެވެ. އެގޮތުން ގޭސް ލީކުވާގޮތަށް ހުރިނަމަ އެކަން ރަނގަޅު ކުރުމަށާއި ނުވަތަ ގޭސްފުޅި ރެގިއުލޭޓަރ ނައްޓައިލުމަށް ފުލުހުން އިލްތިމާސްކޮށްފައިވެއެވެ.

އަދި ގޭތެރޭގެ ކަރަންޓުގެ ހާލަތު  ރަނގަޅުތޯ ކަށަވަރުކުރުމާއެކު ކަރަންޓު ޝޯޓޭޖެއް އައިސްގެން ނުވަތަ އެނޫންވެސް ގޮތަކުން ވިޔަސް އަލިފާނުގެ ހަދިސާއެއް ނުހިނގާނެ ފަދަ ގޮތަކަށް ގޭތެރޭގެ ކަންކަން ހަމަޖައްސުމަށާއި، ބޭނުންނުކުރާ ހުރިހާ ތަނެއް ކަރަންޓު ސުވިޗް އޮފްކޮށް ކަރަންޓުގެ ސަބަބުން ނުރައްކާތެރި ހާލަތަކަށް ކަމެއް ދިއުން ހުއްޓުވުމަށް ކުރަންޖެހޭ ކަންކަން ކުރުމަކީ މުހިންމު ކަމެއް ކަމަށް ފުލުހުން ބުނެފައިވެއެވެ. އަދި އޭގެ އިތުރުން، ފެން ލީކުނުވާނޭހެން އިސްކުރުތައް ރަނގަޅަށް ބަންދުކުރުމަށްވެސް ފުލުހުން އިރުޝާދު ދީފައިވެއެވެ.

އަދި ތިމާ ދުއްވާ ސައިކަލު ނުގެއްލޭނެ ފަދަ ގޮތަކަށް، ރައްކާތެރިކަން ކަށަވަރު ކުރުމަށްޓަކައި ސީސީޓީވީ އެއް ހުންނަ ހިސާބެއްގައި ޕާކު ކުރުން ފަދަ ކަންމަށް ސަމާލުވުމަށް ފުލުހުން އެދިފައިވެއެވެ.

މީގެ އިތުރުންވެސް ފުރުމުގެ ކުރިން ފުރަން އަޅާ އުޅަނދުގެ ރައްކާތެރިކަން ކަށަވަރު ކުރުމާއި، މޫސުމަށް ބަލައިގެން ދަތުރު ކުރުމަށް ފުލުހުން އިލްތިމާސް ކޮށްފައިވެއެވެ.