ނޫމަރާ ބަނދަރު ތަރައްޤީ ކުރުމުގެ މަޝްރޫޢު ސަރުކާރުން އެމްޓީސީސީއާއި ހަވާލުކޮށްފި

ށ. ނޫމަރާ ބަނދަރު ތަރައްޤީ ކުރުމުގެ މަޝްރޫޢު ސަރުކާރުން މިއަދު އެމްޓީސީސީއާއި ހަވާލުކޮށްފިއެވެ.

މި މަޝްރޫޢު ހަވާލުކުރުމަށް މިއަދު ބޭއްވި ރަސްމިއްޔާތުގައ،ި އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ އާދަމް އާޒިމްއެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ، ޕަރމަނަންޓް ސެކްރެޓަރީ، ޒީނިޔާ ހަމީދެވެ.

މިކަމާައި ގުޅިގެން އެމްޓީސީސީއިން ނެރުން ނޫސް ބަޔާނުގައި ބުނެފައިވަނީ އެރަށު ކައުންސިލުން ވަނީ މަޝްރޫއުގެ މަސައްކަތް ނިމުމާއެކު ވަރަށް ބޮޑު ލުއިފަސޭހައަކާއި ހިތްހަމަޖެހުމެއް ރަށު ރައްޔިތުންނަށް ލިބިގެންދާނެ ކަމަށް ބުނެފައި ކަމަށެވެ.

އެގޮތުން މީގެ ކުރިން ދިމާވަމުން އަންނަ ބޭރުތޮށީގެ މައްސަލަތަކާއި ކުއްލި ކުއްލިއަށް ނެރު ފުންކުރަން ޖެހުމުގެ މައްސަލަތަކަށް ހައްލެއް ލިބި، ޖާގަ ތަނަވަސް ޒަމާނީ ބަނދަރެއް ރައްޔިތުންނަށް ލިބިގެން ދިޔުމުގެ ފަރަށް އެރުމުގެ ހާދިސާތަކަށް ނިމުމެއް އަންނާނެ ކަމަށް އެމްޓީސީސީއިން ވަނީ ބުނެފައެވެ.

މި މަޝްރޫޢުގެ ދަށުން ކުރުމަށް ހަމަ ޖެހިފައިވާ މަސައްކަތްތައް:

-5076 ކިއުބިކް މީޓަރުގެ ސަރަޙައްދެއްގެ ކުރިން ފުންކޮށްފައިވާ ފަޅު އަލުން ފުންކުރުން

-34,386 ކިއުބިކް މީޓަރުގެ ސަރަޙައްދެއްގެ އައު ހާބަރ ބޭސިން ފުންކުރުން

-2920 ކިއުބިކް މީޓަރުގެ ސަރަޙައްދެއްގެ ނެރު ފުންކުރުން

-302.60 މީޓަރުގެ ސަރަޙައްދެއްގައި ބޭރުތޮށިލުން

-64 މީޓަރުގެ ސަރަޙައްދެއްގައި ރިވެޓްމެންޓް ޖެހުން

-177 މީޓަރުގެ ސަރަޙައްދެއްގައި އެއްގަމުތޮށިލުން

-32 މީޓަރުގެ މިހާރު ހުރި އެއްގަމުތޮށި މަރާމާތު ކުރުން

-މޫރިންގ ބޯއީސް ހަރުކުރުން

-11 މީޓަރު ދިގު 11 މީޓަރު ފުޅާ ރޭމްޕެއް ހެދުން

-ދެ ޖެޓީއެއް ހެދުން

-ބަނދަރު ބައްތި ހަރުކުރުން

-1652 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުން

-311 މީޓަރުގެ ސަރަޙައްދެއްގައި ކާރބްސް ހަރުކުރުން

މި މަޝްރޫޢަކީ 53.33 މިލިއަން ރުފިޔާއަށް 455 ދުވަސް ތެރޭ ނިންމުމަށް އެމްޓީސީސީއާއި ހަވާލުކޮށްފައިވާ މަޝްރޫޢުއެކެވެ.

މި މަޝްރޫޢުގެ އަމަލީ މަސައްކަތް ފެށުމަށް ހަމަޖެހިފައިވަނީ އެންވަޔަރަންމަންޓަލް އިމްޕެކްޓްއެސެސްމަންޓެއް ހެދުމަށްފަހުގައި ކަމަށްް އެެކުންފުނިން ވަނީ ބުނެފައެވެ.