ޤައުމެއް ތަރައްޤީ ވާނީ އެޤައުމެއްގެ މީހުންދިރިއުޅޭ ހުރިހާތަނެއް ތަރައްޤީވެގެން: ޢިމްރާން

ޤައުމެއް ތަރައްޤީ ވާނީ އެޤައުމެއްގެ މީހުންދިރިއުޅޭ ހުރިހާތަނެއް ތަރައްޤީވެގެން ކަމަށް ދާޚިލީ ވަޒީރު އަދި ޢަދާލަތު ޕާޓީގެ ރައީސް ޢިމްރާން އަބްދުالله ވިދާޅުވެއްޖެއެވެ.

ޢިމްރާން މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް ބ ތުޅާދޫގައި ބޭއްވުނު ރައީސް ޞާލިޙްގެ ކެމްޕޭނު ޖަލްސާއެއްގައި ވާހަކަދައްކަވަމުންނެވެ.

"ޤައުމެއް ތަރައްޤީވާނީ އެޤައުމެއްގެ ރައްޔިތަކު ދިރިއުޅޭ ހުރިހާ ސިޓީ އެއް ހުރިހާ އަވަށެއް، ހުރިހާ ބައެއް ތަރައްޤީވެގެން، މި ޤައުމު ތަރައްޤީވާނީ މި ޤައުމުގެ މީހުން އުޅޭ ހުރިހާ ރަށެއް ތަރައްޤީކޮށްގެން، ހުރިހާ ރަށަކަށް ކުރިއެރުން ހޯދައިގެން، ހުރިހާ އެންމެންގެ ދިރިއުޅުމުގެ ފެންވަރު މައްޗަށް ޖައްސައިގެން" ޢިމްރާން ވިދާޅުވިއެވެ.

އޭގެ އިތުރުން ޢިމްރާން ވިދާޅުވީ ރާއްޖެ ތަރައްޤީވާނީ މިރާއްޖޭގައި ދިރިއުޅޭ ކޮންމެ މުވާޠިނެއްގެ ވިސްނުމާއި ފިކުރާއި ދިރިއުޅުމުގެ ފެންވަރު މައްޗަށް ޖައްސައި ދީގެން ކަމަށެވެ.

ޢިމްރާން ވިދާޅުވީ އެކަމަށްޓަކައި ރައީސް ޞާލިޙް ހިންގަވާ ހުރިހާ ޕްރޮގްރާމްތައް އޮތީ ވަރަށް ޝާމިލްކޮށް ވަށައިޖެހޭގޮތައް ކަމަށެވެ. އެގޮތުން ކިޔަވައިދިނުމާއި، އުނގަންނައި ދިނުމާއި، ތަމްރީނު ދިނުމާއި، ހުނަރުވެރިކަމާއި، މަސައްކަތްކުރެވޭނެ ގޮތާއި ލޯނާއި ހުރިހާ އެއްޗެއް ވަށައިޖެހޭގޮތައް މިގެންދެވެނީ މުޅި ރާއްޖެ ތަރައްޤީ ކޮށްގެންކަމަށް އޭނާ ވިދާޅުވިއެވެ.

ޢިމްރާން ވިދާޅުވީ މިއަދު ފެންނަނީ ވާދަވެރި ކެންޑިޑޭޓުން ނުކުމެ ކޮންމެވެސް އެއްތަންކޮޅެއް ތަރައްޤީ ކުރުމަށް ހިފައިގެން އުޅޭ ތަން ކަމަށެވެ.

"ވަރަށް ސާފުކޮށް އަޅުގަނޑުމެންނަށް އެބަ އިނގޭ ރައީސުލް ޖުމްހޫރިއްޔާ މިޤައުމު ތަރައްޤީ ކުރުމަށް މިގެންގުޅުއްވާ ވަރުގެ ފުރިހަމަ ޝާމިލް ތަޞައްވުރެއް އޮތް ތަރައްޤީގެ ފުރިހަމަ މެނިފެސްޓޯ އެއް އޮތް އެއްވެސް ކެންޑިޑޭޓަކު ނެތް" ޢިމްރާން ވިދާޅުވިއެވެ.

މީގެ އިތުރުން ޢިމްރާން ވިދާޅުވީ ރާއްޖޭގެ ހުރިހާ ރައްޔިތުންނެއް ތަރައްޤީ ކުރާނެ މެނިފެސްޓޯއެއް އޮތީ ރައީސް ޞާލިޙްގެ އަތުގައި ކަމަށެވެ.

ބ. އަތޮޅަށް ރައީސް ޞާލިޙާއި ޓީމުން ކުރައްވަމުން ގެންދަވާ ކެމްޕޭނު ދަތުރުފުޅުގައި މިއަދުވެސް ބ.އަތޮޅުގެ ބައެއް ރަށްރަށަށް ވަޑައިގަތުމަށް ވަނީ ހަމަޖެހިފައެވެ.