މި ފެންނަނީ ރައީސް ނަޝީދަށް ބާރުލިބޭ ކޮންމެ ފަހަރަކު ޚުދުމުހުތާރު ކަން އިތުރުވާތަން: ޝަފީގު

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ބާރު ލިބޭ ކޮންމެ ފަހަރަކުވެސް ދައްކަވަނީ ޚުދުމުހުތާރުކަން ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އަބްދުالله ޝަފީގު ވިދާޅުވެއްޖެއެވެ.

ރައްޔިތުންގެ މަޖިލީހުގެ ތިންވަނަ ދައުރުގެ ދެވަނަ ޖަލްސާގައި ކޮމިޓީތައް އެކުލަވާލުމާއި ގުޅޭގޮތުން ވާހަކަދައްކަވަމުން ޝިފާގު ވިދާޅުވީ, މަޖިލީހުގެ ރައީސް، ނަޝީދު ޢަމަލުކުރައްވަމުންދާ ގޮތާއިމެދު ވަރަށް ބޮޑަށް ކަންބޮޑުވެލައްވާ ކަމަށެވެ.

އެގޮތުން ތިންވަނަ ދައުރުގެ ޖަލްސާ އިއްޔެ ފެށިފައިވާއިރު، އެ ޖަލްސާއަށްވެސް އެޖެންޑާ ކޮށްފައި އޮތީ ނިމިދިޔަ ޖުލައި މަހުގައި ކޮށް ނިންމާފައިވާ މަސައްކަތެއް ކަަމަށް ޝަފީގު ވިދާޅުވި އެވެ.

"ސަބަބެއް ކަމަށް މި ވިދާޅުވަނީ، އަނެއްކާވެސް ސިޔާސީ ޕާޓީއަކުން މަޖިލީހުގެ ދަފްތަރުގައި ހިމެނި ތިން މެންބަރަކު އެ ޕާޓީގެ ދަފްތަރުގައި ހިމެނިވަޑައިގަންނަވާފިއޭ. ދާއިމީ ކޮމިޓީތަކުގެ ނިސްބަތް އެބަ ބަދަލުވެޔޭ. އެހެންވީމާ ބަދަލުކުރަން އެބަ ޖެހެއޭ. މިއީ މި ދައްކަވާ ބަހަނާ އަކީ. މިކަމާހުރެ މި އޮންނަނީ މަޖިލީހުގެ ދާއިމީ ކޮމިޓީތަކުގެ މަސައްކަތް ހުއްޓިފައި."

މުހައްމަދު އަބްދުالله ޝަފީގު

ޝަފީގު ވިދާޅުވީ، ކޮމިޓީތައް ހުއްޓުމާއި ގުޅިގެން އިލެކްޝަންސް ކޮމިޝަންގެ މެންބަރެއްގެ މުއްދަތު ހަމަވީއިރުވެސް މެންބަރެއް އައްޔަން ނުކުރެވޭ ކަމަށާ، ފަަސް މެންބަރުން އެކުލެވޭ އެ ކޮމިޝަން މިހާރު ހިނގަމުންދަނީ ހަތަރު މެންބަރުންނާއި އެކު ކަމަށެވެ. ހަމަ އެހެންމެ ބްރޯޑްކާސްޓިން ކޮމިޝަންގެވެސް މަގާމު ހުސްވެ އެ މަގާމަށް މީހަކު ނުލެވިވެސް އެތައް ދުވަހެއް ވެފައިވާ ކަން އޭނާ ފާހަގަކުރެއްވިއެވެ. އަދި އެފަދަ އެތައް ކަމެއް ކޮމިޓީތައް ހުއްޓުމުގެ ސަބަބުން ނުކުރެވިފައިވާ ކަމަށް ޝަފީގު ވިދާޅުވި އެވެ.

މިއާއެކު ޝަފީގު ވިދާޅުވީ އެފަދައިން މަޖިލިސް ހުއްޓުވާފައި އޮތް ނަމަވެސް، މަޖިލީހުގެ ރައީސާއި، ނާއިބު ރައީސްގެ މައްޗަށް އިތުބާރު އޮތް ކަމަށް ނުވާނެ ކަމަށާ، އެ ދެ ބޭފުޅުންނަށް އިތުބާރު ނުކުރާކަމަށް ސޮއި ކުރެއްވި މެންބަރުންގެ ވިސްނުން ބަދަލު ނުވާ ކަމަށެވެ. އެހެން ކަމުން، އެ މައްސަލަ ދިގުލައި ދެންމި ނަމަވެސް އެ ދެ ބޭފުޅުންގެ މައްޗަށްވެސް އިތުބާރު އޮތް ކަމަށް ނުވާނެ ކަމަށް ޝަފީގު ވިދާޅުވި އެވެ.

"އަޅުގަނޑުގެ އެދުމަކީ އެ މައްސަލަތައް ކުރިއަށް ގެންދިޔުން. ޚުދުމުހުތާރު ކަމާއި އެކު ރައްޔިތުންގެ މަޖިލިސް ހިންގުމަށް ރައްޔިތުންގެ މަޖިލީހުގެ ރައީސް އެ ކުރާ މަސައްކަތް ހުއްޓަވާ ލައްވައި، ގާނޫނު އަސާސީ އާއި މަޖިލީހުގެ ގަވާއިދުގެ ތެރެއިން އެމަސައްކަތް ކުރިއަށް ގެންދަވަން. "

"އިއްޒަތްތެރި ރައީސް، އަޅުގަނޑުމެންނަށް މިފެންނަނީ ބާރުލިބޭ ކޮންމެ ފަހަރަކު، ޚުދުމުހުތާރުކަން އިތުރު ކުރައްވާތަން. އަޅުގަނޑު މި ދަންނަވަނީ މައްޗަންގޮޅީ މެދު ދާއިރާގެ މެންބަރު މަޖިލީހުގެ ރައީސް އެއްގެ ގޮތުގައި އިންނަވާ، އަމަލު ކުރައްވަމުންދާ ގޮތް." ރައީސް ނަޝީދު ރިޔާސަތުގައި އިންނަވައިގެން ޢަމަލުކުރައްވަމުންދާ ގޮތާއި މެދު ނުރުހުން ފާޅުކުރައްވައި ޝަފީގު ވިދާޅުވި އެވެ.