ޕީއެޗްޕީ ވެބް ޓެކްނޮލޮޖީއަށް ދިމާވި ސަލާމަތީ މައްސަލަތަކަކާ ގުޅިގެން ސަރުކާރުގެ ޑިޖިޓަލް ނިޒާމުތައް ވަރުގަދަކުރުމުގެ މަސައްކަތް ފަށައިފި

ވެބް ޓެކްނޮލޮޖީތަކުގައި ބޭނުންކުރާ ޕީއެޗްޕީ ނިޒާމަށް ދިމާވި ނުރައްކާތެރި ސަލާމަތީ މައްސަލަތަކަކާ ގުޅިގެން، ރާއްޖޭގެ ރަސްމީ ޑިޖިޓަލް ޚިދުމަތްތަކުގެ ރައްކާތެރިކަން ކަށަވަރުކުރުމަށްޓަކައި އަޅަންޖެހޭ ފިޔަވަޅުތައް އަޅަން ފަށައިފިއެވެ.

މޯލްޑިވްސް ޑިޖިޓަލް ސާވިސް (އެމްޑީއެސް) އިން ހާމަކޮށްފައިވާ ގޮތުގައި، ނޭޝަނަލް ސައިބަރ ސެކިއުރިޓީ އެޖެންސީ (އެންސީއެސްއޭ) އާ ގުޅިގެން މި ފިޔަވަޅުތައް އަޅަން ފަށާފައިވަނީ ޕީއެޗްޕީގެ ސިސްޓަމްތަކުން ދާދިފަހުން ފާހަގަކުރެވުނު 'CVE-2026-109618' އަދި 'CVE-2026-109619' ގެ ނަމުން ނަންދީފައިވާ ނުރައްކާތެރި ދެ މައްސަލައަކާ ގުޅިގެންނެވެ.

މިއީ ސިސްޓަމްތަކަށް ހުއްދަނެތި ވަދެ، ނުފޫޒު ފޯރުވުމުގެ ފުރުސަތު ހުޅުވިދާނެ ކަމެއް ކަމަށްވާތީ، ސަލާމަތީ ޕެޗްތައް އެޅުމާއި، ނުރައްކާތައް ކުޑަކުރުމުގެ ގޮތުން އަޅަންޖެހޭ ފިޔަވަޅުތަކުގެ އިތުރުން ސިސްޓަމްތައް އިތުރަށް ހަރުދަނާކުރުމުގެ މަސައްކަތްތައް ކުރެވެމުންދާ ކަމަށް އެމްޑީއެސް އިން ބުނެއެވެ.

މި އިސްނެގުމުގެ މައިގަނޑު ބޭނުމަކީ ކުރިމަތިވެދާނެ ސައިބަރ ހަމަލާތަކުން ރައްކާތެރިވުމާއި، ހުއްދަނެތި ސިސްޓަމްތަކަށް ވަނުން ހުއްޓުވުމެވެ. އަދި ހަމައެއާއެކު، ސަރުކާރުގެ ޑިޖިޓަލް ޚިދުމަތްތަކާއި ވަސީލަތްތަކުގެ ރައްކާތެރިކަމާއި ދެމެހެއްޓެނިވިކަން އިތުރަށް ވަރުގަދަކުރުމެވެ.

މި މައްސަލައާ ގުޅިގެން، ޕީއެޗްޕީ ތަރައްޤީކުރާ ފަރާތްތަކުން ވަނީ މި ނުރައްކާތައް ޙައްލުކުރުމަށް ޚާއްޞަ ސަލާމަތީ އަޕްޑޭޓްތަކެއް ނެރެފައެވެ. އެހެންކަމުން މި ޓެކްނޮލޮޖީ ބޭނުންކުރާ ހުރިހާ ފަރާތްތަކުން ވެސް ލަސްނުކޮށް ސިސްޓަމްތައް އަދާހަމަކުރުމަށް ވަނީ އިލްތިމާސްކޮށްފައެވެ.

މި ސަލާމަތީ ފިޔަވަޅުތައް ތަންފީޒުކުރަމުންދާއިރު، ސަރުކާރުގެ ބައެއް ޑިޖިޓަލް ޚިދުމަތްތަކަށް ވަގުތީގޮތުން ބުރޫއެރުމަކީ އެކަށީގެންވާ ކަމެއް ކަމަށާ، ނަމަވެސް ޚިދުމަތްތަކަށް ދިމާވާ ދަތިތައް ވީހާވެސް ކުޑަކޮށް، ވީއެންމެ އަވަހަކަށް ޚިދުމަތްތައް އާންމު ހާލަތަކަށް ގެނައުމަށް މަސައްކަތް ކުރަމުންދާ ކަމަށް އެމްޑީއެސް ބުނެއެވެ.

ޤައުމީ ފެންވަރުގައި ސައިބަރ ސެކިޔުރިޓީ ވަރުގަދަކޮށް، ސަރުކާރުގެ ޑިޖިޓަލް ޚިދުމަތްތަކަކީ އިތުބާރުހުރި، ރައްކާތެރި އަދި ދެމެހެއްޓެނިވި ޚިދުމަތްތަކެއްކަން ކަށަވަރުކުރުމުގައި މޯލްޑިވްސް ޑިޖިޓަލް ސަރވިސްއާއި ނޭޝަނަލް ސައިބަރ ސެކިއުރިޓީ އޭޖެންސީން ސާބިތުކަމާއެކު ދެމިތިބޭނެ ކަމުގެ ޔަޤީންކަން އެ އިދާރާތަކުން އަރުވައެވެ.