ގްރޭޓާ މާލެ ސަރަޙައްދުގައި ފެންބޮޑުވި ސަރަޙައްދުތަކުން 367 ޓަނަށް ވުރެ ގިނަ ފެން، އެމްޓީސީސީން ހިންދައިފި

މިދިޔަ ދެ ދުވަހު ވެހުނު ބޯވިއްސާރައިގައި ގްރޭޓާ މާލެ ސަރަޙައްދުގެ މަގުތަކުގައި ފެންބޮޑުވުމާ ގުޅިގެން ހިންގި ޚާއްޞަ އޮޕަރޭޝަނުގައި، އެކި ސަރަޙައްދުތަކުން 367.82 ޓަނުގެ ފެން ހިންދާފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.

އެމްޓީސީސީން ބުނީ، 21 އިން 22 އޮކްޓޫބަރު 2026 ގެ ނިޔަލަށް އެ ކުންފުނީގެ އިމަޖެންސީ ސަރވިސަސް ޓީމުތަކުން މެދުކެނޑުމެއްނެތި މަސައްކަތްކޮށް، ގްރޭޓާ މާލެ އެކި ސަރަޙައްދުތަކުގައި ފެން ހިންދާފައިވާ ކަމަށެވެ.

އެގޮތުން ފެން ހިންދާފައިވާ މައިގަނޑު ސަރަޙައްދުތަކަކީ؛

• ބޮޑުތަކުރުފާނު މަގު، މަސްވެރިންގެ ޕާކު ސަރަޙައްދުން: 174.99 ޓަނުގެ ފެން

• ސޯމިލް ސަރަޙައްދުން: 89.72 ޓަނުގެ ފެން

• ބޮޑުތަކުރުފާނު މަގު، ހެންވޭރު ފެރީ ޓާމިނަލް ކައިރިން: 53.03 ޓަނުގެ ފެން

• ހުޅުމާލޭ އޯލްޑް ކޭލާ ގެމަތަ ސަރަޙައްދުން: 50.08 ޓަނުގެ ފެން ވަނީ ޕަންޕު ބޭނުންކޮށްގެން ހިންދާފައެވެ.

ފެން ހިންދުމުގެ މަސައްކަތުގެ އިތުރުން، ފެންބޮޑުވުމުގެ ސަބަބުން ގެތަކަށާއި ފިހާރަތަކަށް ފެން ވަނުން ހުއްޓުވުމަށްޓަކައި ވެލިބަސްތާ ޖެހުމަށް ބޭނުންވާ ވެލި ފޯރުކޮށްދިނުމުގެ މަސައްކަތްވެސް އެމްޓީސީސީން ވަނީ ކޮށްފައެވެ.

އެގޮތުން ޑަމްޕް ޓްރަކް ބޭނުންކޮށްގެން ހުޅުމާލެ ފޭސް 2 އިން މާލެއަށް ވެލި އުފުލައިދީފައިވާ ކަމަށް އެ ކުންފުނިން މަޢުލޫމާތު ދެއެވެ.

އެމްޓީސީސީން އިތުރަށް ބުނީ، ޢާންމު ރައްޔިތުންގެ ރައްކާތެރިކަމާއި ލާބައަށްޓަކައި މިފަދަ ކުއްލި ޙާލަތްތަކުގައި އެހީތެރިކަން ފޯރުކޮށްދިނުމުގައި އެ ކުންފުނި އަބަދުވެސް ދެމިއޮންނާނެ ކަމަށެވެ.