ސަރުކާރުން ގާނޫނާއި ޚިލާފް ވެފައިވާ ކަމަށް ރައީސް ނަޝީދު ތުހުމަތުކުރައްވައިފި

ސަރުކާރުން ކަންކަން ކުރަންވީ ގޮތް ގާނޫނު އަސާސީގައި ބަޔާންވެފައިވާއިރު، އެގޮތަށް ޢަމަލުކުރުން ނޫން ގޮތެއް ސަރުކާރަށް ނެތް އިރު، އެކަން އެގޮތަށް ނުކުރާނަމަ ސަރުކާރުން އެވަނީ ގާނޫނު އަސާސީއާއި ޚިލާފްވެފައި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ މިހާރު ކުރިއަށްދާ ރައްޔިތުންގެ މަޖިލީހުގެ ތިންވަނަ ދައުރުގެ 41 ވަނަ ޖަލްސާގައި ވާހަކަދައްކަވަމުންނެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ، ހުޅުމާލޭ ޕްލޭނިންގ އަދި އިމާރާތް ކުރުމުގެ ގަވާއިދު، ގަވާއިދު ކޮމިޓީން އިސްލާހުކުރުމަށްފަހު ޕްލޭނިންގ މިނިސްޓްރީއަށް ފޮނުވާފައިވާ އިރުވެސް އެ ގަވާއިދު އަދިވެސް ގެޒެޓު ކުރުމަށް ރައީސް އޮފީހަށް ފޮނުވާފައި ނުވާ މައްސަލަ ގަވާއިދު ކޮމިޓީން ދިރާސާ ނިންމި ގޮތުގެ ރިޕޯޓް އިއްވަވާފައެވެ. އެ ރިޕޯޓް އިއްވެވީ ގަވާއިދު ކޮމިޓީގެ މުގައްރިރު، ކުޑަހުވަދޫ ދާއިރާގެ މެންބަރު އަހުމަދު އާމިރެވެ.

އެ ރިޕޯޓް އިއްވަވަމުން އާމިރު ވިދާޅުވީ ޕްލޭނިންގ މިނިސްޓްރީންގެ އެ އަމަލަކީ ގާނޫނީ ހަމަތަކުންވެސް ކުރެވިދާނެ ކަމެއް ނޫންކަމަށް ކޮމިޓީން ނިންމާފައިވާ ކަމަަށެވެ. އަދި ޕްލޭނިންގ މިނިސްޓްރީން އެކަން ކުރީ ގާނޫނު އަސާސީ އާއި، ރައްޔިތުންގެ މަޖިލީހުގެ ގަވާއިދުތަކާއި ޚިލާފަށްކަން ފާހަގަކުރައްވައި އޭނާ ވިދާޅުވީ، އެއީ ރައްޔިތުންގެ މަޖިލީހަށް ލިބިފައިވާ އިންތިޔާޒް ތަކާއި ބާރުތަކަށް ހުރުމަތްތެރިކޮށް ނުހިތުން ކަމަށެވެ.

މެންބަރު އާމިރު ރިޕޯޓް އިއްވަވައި ނިމުމުން ރިޔާސަތުގައި އިންނަވައި ރައީސް ނަޝީދު ވިދާޅުވީ، ސަރުކާރުން ކަންކަން ކުރަންވީ ގޮތް ގާނޫނު އަސާސީގައި ބަޔާންވެފައިވާއިރު، އެގޮތަށް ޢަމަލުކުރުން ނޫން ގޮތެއް ސަރުކާރަށް ނެތް އިރު، އެކަން އެގޮތަށް ނުކުރާނަމަ ސަރުކާރުން އެވަނީ ގާނޫނު އަސާސީއާއި ޚިލާފްވެފައި ކަމަށެވެ.

"އަނެއްކާވެސް އަޅުގަނޑަށް ވަރަށް އުނދަގޫ މައްސަލައެއް މި ދިމާވީ. ގާނޫނުގައި ވަރަށް ސާފުކޮށް ޢަމަލުކުރަންވީގޮތް އެބައޮތް. ސަރުކާރުން އެގޮތަށް އަމަލުކުރުން ނޫން ގޮތެއް ހަގީގަތުގައި ގާނޫނު ދައްކާފަކާއެއް ނެތް. ދެން އެގޮތަށް އަމަލުނުކުރާ ކަމީ ގާނޫނާއި ޚިލާފް ވުން. އެހެންވީމާ މެންބަރުންނަށް ނިންމެވިދާނެ ޝަރީއަތަށް ވަޑައިގަތުންވެސް. ނުވަތަ ވަޒީރާއި ގުޅޭގޮތުން ބޭފުޅުން ނިންމަވާ ނިންމެވުމެއް ނިންމަވަން ވެސް."

މަޖިލީހުގެ ރައީސް މުހައްމަދު ނަޝީދު

ރައީސް ނަޝީދު ވިދާޅުވީ، ރައްޔިތުންގެ މަޖިލީހަކީ ސަރުކާރު ހިންގާ މައި ޕާޓީ ކަމުގައިވާ އެމްޑީީޕީގެ މެޖޯރިޓީ އޮތް ތަނެއް ކަމަށެވެ. އަދި ޕްލޭނިންގ މިނިސްޓަރަކީވެސް އެމްޑީޕީގެ ވަޒީރެއް ކަމަށެވެ. އެހެންކަމުން، ވާހަކަދައްކަވައިގެން ދެފަރާތުން އެދިވަޑައިގަންނަވާ ގޮތަށް ކަންކަން ކުރިއަށް ގެންދިޔުމުގެ ފުރުސަތު މަޖިލީހުގައި ވަރަށް ފަހިކޮށް ހުޅުވިފައިވާ ކަމަށް އެމަނިކުފާނު ވިދާޅުވިއެވެ.

އެހެންވާއިރުވެސް، ވަރިހަމަ ކުރައްވައި، އަޅާނުލައްވައި ބާއްވަވާފައި، ތިމަންނާއަށް ފެންނަގޮތް އެއީ ގޮތް ކަމަށް ނިންމަވައި އެގޮތަށް އަމަލުކުރައްވަމުން ގެންދެވުމަކީ ރާއްޖޭގެ ގާނޫނު އަސާސީ ތަންދޭ ކަމެއް ނޫން.

މަޖިލީހުގެ ރައީސް މުހައްމަދު ނަޝީދު

ރައީސް ނަޝީދު ވިދާޅުވީ މިއީ އެމަނިކުފާނުގެ ކަންބޮޑުވުން ހުރި ކަމެއް ކަމަށެވެ. އެހެންކަމުން އެ މައްސަލަ ބަލައި، މިނިސްޓްރީން ގާނޫނާއި ޚިލާފްވެފައިވާ މިންވަރު ބަލައި އެކަންކަން އިތުރަށް ކުރިއަށް ގެންދެވުމަށް ވިސްނެވުމަށް މެންބަރުންގެ ކިބައިން އެމަނިކުފާނު ވަނީ އެދިލައްވާފައެވެ.