އައްޑޫ ސިޓީން ހައްޔަރުކުރި މީހެއްގެ ގެއިން ނުރައްކާތެރި އެކްޕްލޯސިވް ކެމިކަލް ފެނުނު: ފުލުހުން

އައްޑޫ ސިޓީން ޓެރަރިސްޓް ޖަމާއަތެއްކަމަށްވާ އިސްލާމިކް ސްޓޭޓްއަށް ތާއީދުކުރާ ކަމަށް ބުނެ ހައްޔަރުކުރެވުނު މީހުންގެ ތެރެއިން މީހެއް ދިރިއުޅޭ ގެއެއް ބަލައިފާސްކޮށްގެން ތިން ބާވަތެއްގެ ނުރައްކާތެރި އެކްސްޕްލޯސިވް ކެމިކަލް ފެނިފައިވާ ކަަމަށް ފުލުހުން ބުނެފިއެވެ.

ފުލުހުން މިރޭ ނެރުނު ނޫސް ބަޔާނެއްގައި ބުނީ، އައްޑޫ ސިޓީގައި ހަރުކަށި ފިކުރު ގަބޫލުކުރާ ފަރާތްތަކުން ޓެރަރިސްޓް ޖަމާއަތެއްކަމަށްވާ އިސްލާމިކް ސްޓޭޓްއަށް ތާއީދުކޮށް، ގޮވާތަކެތި ބޭނުންކޮށްގެން ދިވެހިރާއްޖޭގައި ޓެރަރިޒަމްގެ ހަމަލާއެއްދީ، ގައުމީ ސަލާމަތަށް ނުރައްކާކުރުމަށް ރާވަމުންދިޔަކަމުގެ މައުލޫމާތު ދިވެހި ފުލުހުންގެ ޚިދުމަތަށް ލިބުމާ ގުޅިގެން ދިވެހި ރައްޔިތުންގެ ސަލާމަތާއި، ރައްކާތެރިކަން ކަށަވަރުކުރުމަށްޓަކައި ދިވެހި ފުލުހުންގެ ޚިދުމަތާއި، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގުޅިގެން 2022 ނޮވެމްބަރ 11 ވަނަ ދުވަހުން ފެށިގެން އައްޑޫ ސިޓީއާއި، މާލެއާއި، ކ.ގުރައިދޫގައި ހާއްސަ އޮޕަރޭޝަނެއް ކުރިއަށް ގެންގޮސް 14 މީހަކު ހައްޔަރުކޮށްފައިވާ ކަމަށެވެ.

އަދި އެ ހައްޔަރުކުރެވުނު 14 މީހުންގެ ތެރެއިން 05 މީހަކު ޝަރީއަތް ނިމެންދެން ބަންދުކުރެވިފައިވާއިރު، ހައްޔަރުކުރެވުނު މީހުންގެ ތެރެއިން 04 މީހެއްގެ ބަންދުގެ މުއްދަތު 30 ދުވަހަށް އިތުރުކުރެވިފައިވާ ކަމަށާ އަދި ބާކީ 05 މީހުންގެ ބަންދުގެ މުއްދަތު 15 ދުވަހުގެ މުއްދަތަށް އިތުރުކުރެވިފައިވާ ކަމަށް ފުލުހުން ބުނެފައިވެއެވެ.

މިއާއެކު އެ ބަޔާނުގައި ބުނީ، އެ އޮޕަރޭޝަންގައި ހައްޔަރުކުރެވުނު މީހުންގެ ގެތަކުންނާއި، އެފަރާތްތައް ބޭނުންކުރަމުންދާ ބައެއް ގެތަކާއި، ބައެއް ވެހިކަލްތަކާއި، ޑިންގީއެއް ބަލައިފާސްކޮށް، މައްސަލައާ ގުޅުންހުރިކަމަށް ބެލެވޭ ގިނަ އަދަދެއްގެ ތަކެތި މިހާރު ނަގާފައިވާ ކަމަށެވެ.

އަދި އެ ތަކެތި ތަހުލީލުކުރުމުގެ މަސައްކަތް މިހާރު ކުރެވެމުންދާ ކަމަށާ، އެގޮތުން އެ މައްސަލައިގައި ހައްޔަރުކުރެވުނު މީހެއް ދިރިއުޅޭ ގެއެއް ބަލައިފާސްކޮށް ނެގުނު އެކްސްޕްލޯސިވް ކެމިކަލްކަމަށް ޝައްކުކުރެވޭ ތިން ބާވަތެއްގެ ސާމްޕަލް މޯލްޑިވްސް ނޭޝަނަލް ޑިފެންސް ފޯސްގެ އެކްސްޕްލޯސިވް އޯޑްނަންސް ޑިސްޕޯސަލް (އީއޯޑީ) ގެ ފަރާތުން ޗެކްކުރުމުން އެ ސާމްޕަލްތަކުގައި ހައި އެކްސްޕްލޯސިވްގެ މާއްދާތައް ހިމެނޭކަމަށް ދައްކާފައިވާ ކަމަށްވެސް ފުލުހުން ބުނެފައިވެއެވެ.

"މިގޮތުން ސާމްޕަލްތަކުން ފެނުނު އެކްސްޕްލޯސިވްގެ ބާވަތްތަކަކީ މައިގަނޑު ގޮތެއްގައި ބާރުގަދަ ގޮއްވުންތަކަށް ބޭނުންކުރާ ހައި އެކްސްޕްލޯސިވްގެ ވައްތަރުތަކެއްކަމާއި، މިވައްތަރުތަކުގެ އެކްސްޕްލޯސިވްސްގެ މަދު މިންވަރަކުން އިންސާނުންގެ ފުރާނައާއި، މުދަލަށް ބޮޑެތި ގެއްލުން ދެވިދާނެކަމަށް އެމްއެންޑީއެފް އީއޯޑީ ގެ ފަރާތުން ފާހަގަކުރައްވާފައިވެއެވެ." ފުލުހުންގެ ބަޔާނުގައި ބުނެފައިވެއެވެ.

މިއާއެކު އެ ބަޔާނުގައި ބުނީ، އެކްސްޕްލޯސިވްގެ މާއްދާތައް ހިމެނޭކަމަށް ދެއްކި ސާމްޕަލްތައް ރާއްޖެއާއި ރާއްޖެއިން ބޭރުން އިތުރަށް ތަހުލީލުކުރުމުގެ މަސައްކަތް މިހާރު ކުރެވެމުންދާ ކަމަށެވެ.