ދިޔަމިގިލީ ސްކޫލުގައި ސިފައިން އިމާރާތް ކުރަންފެށި 3 ބުރީގެ އިމާރާތުގެ މަސައްކަތް 235 ދުވަހުން ނިންމާލައިފި
10 ކުލާސްރޫމް ހިމެނޭ ގޮތަށް ތ. ދިޔަމިގިލީ ސްކޫލުގައި އެމްއެންޑީއެފް ސަރވިސް ކޯރގެ މިލިޓަރީ އިންޖިނިއަރސް (އެމްއީ) ގެ ސިފައިން ބިނާކުރި ތިން ބުރީގެ އިމާރާތުގެ މަސައްކަތް ނޮވެމްބަރު 21 ވަނަ ދުވަހު ފުރިހަމަކޮށް ނިންމައިފިއެވެ.
މާރިޗު 31 ވަނަ ދުވަހު ފެށި މި މަޝްރޫޢުގެ މަސައްކަތް 235 ދުވަހުގެ ތެރޭގައި ނިންމުމަށް ސިފައިން ރެޔާއިދުވާލު މެދުކެނޑުމެއް ނެތި މަސައްކަތްކޮށްފައިވާ ކަމަށް އެމްއެންޑީއެފުން ބުނެފައިވެއެވެ. ކުރިން ހުރި އިމާރާތުގެ ސްޓްރަކްޗަރަށް ލިބިފައި ހުރި ގެއްލުންތައް މަރާމާތުކޮށް، އިތުރު ކޮލަމްތައް ޖަހައި ސްޓްރަކްޗަރ ވަރުގަދަކުރުމުގެ އިތުރުން ކޮންކްރީޓް މަސައްކަތާއި ރޭނުމާއި ސިމެންތި ޖެހުމާއި ފުރާޅުގެ މަސައްކަތްތައް ވެސް ހިމެނޭ ކަމަށް އެމްއެންޑީއެފުން ބުނެފައިވެއެވެ.
ކުލާސްރޫމްތަކާއި ފާޚާނާތަކާއި ސިޑިގޮޅީގައި ސީލިންގކޮށް ތަށިމުށި ޖެހުމާއި، ކޯރިޑޯތަކާއި ސިޑިތަކުގައި ރެއިލިން ހަރުކުރުމާއި، ފެން ވައިރުކުރުމާއި ފާޚާނާ ހޮޅި އެޅުމާއި ކަރަންޓް ނެޓްވޯކް ޤާއިމުކުރުމާއި، އައިސީޓީ ނަރުތައް އެޅުމާއި ސަރވަރ ރެކް އަދި ޕީއޭ ސިސްޓަމް ހަރުކުރުމާއި ފަޔަރ އެކްސްޓިންގުއިޝާ ބެހެއްޓުމާ ހަމައަށް ސިފައިން ކޮށްފައިވާ ކަމަށް އެމްއެންޑީއެފުން ބުނެފައިވެއެވެ.
މި މަޝްރޫޢުގެ މެނޭޖަރަކީ އެމްއީގެ ވޮރަންޓް އޮފިސަރ 2 ޖަޢުފަރު މުޙައްމަދެވެ. އެސިސްޓެންޓް މެނޭޖަރެއްގެ ގޮތުގައި ހަރަކާތްތެރިވެފައިވަނީ އެމްއީގެ ފަސްޓް ސާޖަންޓް އަޙްމަދު ޚާލިދެވެ. އެމްއެންޑީއެފުން ފާހަގަކުރި ގޮތުގައި ސަރވިސް ކޯރގެ ސިގްނަލްސްއާއި އިލެކްޓްރިކަލް އެންޑް މެކޭނިކަލް އިންޖިނިއަރސް (އީއެމްއީ) ގެ ޓެކްނިކަލް އެހީތެރިކަމާއި އެމްއެންޑީއެފް ސެންޓްރަލް އޭރިއާ ކޮމާންޑުގެ އެއްބާރުލުން ވެސް މި މަޝްރޫޢަށް ލިބިފައިވެއެވެ.
މަސައްކަތް ފެށީއްސުރެ ނިމެންދެން ދިޔަމިގިލީ ރައްޔިތުންގެ ފަރާތުން ބައެއް މަސައްކަތްތަކުގައި ޢަމަލީ ގޮތުން ބައިވެރިވެ، އެކިއެކި ގޮތްގޮތުން ސިފައިންނަށް އެހީތެރިކަން ފޯރުކޮށްދީފައިވާ ކަމަށް އެމްއެންޑީއެފުން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް