ފުލުސް އޮފިސަރުން ވަކިކުރުން ބާތިލުކުރުމުން ހައިކޯޓަށް

ފުލުސް ބޯޑުގެ ލަފަޔާ އެއްގޮތަށް ފުލުހުންގެ ފަސް އޮފިސަރަކު ވަކިކުރަން ނިންމީ ގޯސްކޮށް ކަމަށް ސިވިލް ކޯޓުން ކުރި ހުކުމް އެޓާނީ ޖެނެރަލް އޮފީސް (އޭޖީ) ގެ ފަރާތުން ހައިކޯޓުގައި އިސްތިއުނާފް ކުރަން ނިންމައިފި އެވެ.

ޕޮލިސް ބޯޑުގެ ލަފައާއެކު މިދިޔަ އަހަރު އޮކްޓޯބަރުމަހު 7 އޮފިސަރަކު ވަނީ ވަޒީފާއިން ވަކިކުރުމުން އޭގެ ތެރެއިން 5 އޮފިސަރަކު ވަނީ ސިވިލް ކޯޓަށް މައްސަލަ ހުށަހަޅާފައެވެ.

މި މައްސަލާގައި ސިވިލް ކޯޓުން ކުރި ހުކުމުގައިވަނީ ދައުވާކުރި ފަސް އޮފިސަރުން ފުލުހުންގެ ވަޒީފާއިން ވަކިކުރަން ނިންމުމުގެ ބާރު ޕޮލިސް ބޯޑަށް ލިބިފައިނުވާ ކަމަށެވެ. އެގޮތުން ފުލުހުންގެ ގާނޫނަށް އަމަލުކުރަން ފަށާއިރު، ސުޕްރިޓެންޑެންޓް ރޭންކުން ފެށިގެން މަތީގެ އޮފިސަރުންނަށް ތުހުމަތު ކުރެވޭ ކަންކަމާއި އެ މީހުންގެ ތައުލީމީ ފެންވަރަށް ބަލަން ޖެހޭނެކަމަށް ގާނޫނުގައި ބުނެފައި އޮތަސް، އެއީ އެފަދަ އޮފިސަރުން ވަކިކުރުމުގެ ބާރު ލިބިދޭ މާއްދާއެއް ނޫން ކަމަށް ހުކުމުގައިވެއެވެ.

މީގެ އިތުރަށް މި މައްސަލާގައި ދައުލަތުން ޕޮލިސް ބޯޑުގެ ނިންމުން ކަމަށް ބުނެ ކޯޓަށް ހުށަހެޅި ދެ ރިޕޯޓަކީ ވެސް އެ ފަސް އޮފިސަރުންނަށް ނިސްބަތްވާ ގޮތަށް ކަމެއް ނިންމާފައިވާ ރިޕޯޓެއް ނޫން ކަމަށާއި އެ ފަސް އޮފިސަރުންނަށް ނިސްބަތްވާ ގޮތަށް ޕޮލިސް ބޯޑުން އެފަދަ ނިންމުމެއް ނިންމާފައިވާކަން އެނގެން ނެތްކަމަށް ހުކުމުގައިވެއެވެ.

މި މައްސަލާގައި އޭޖީ އޮފީހުން މިއަދު ބުނީ ސިވިލް ކޯޓުގެ ހުކުމުގައި ދިވެހި ފުލުހުންގެ ހިދުމަތުގެ ގާނޫނު މާނަކޮށްފައި ވަނީ ގޯސްކޮށް ކަމަށެވެ. އެހެންވެ، އެ ނިންމުން އިސްތިއުނާފް ކުރާނެ ކަމަށެވެ.

"ސިވިލް ކޯޓުގެ ނިންމުން އިސްތިއުނާފުކުރުމަށް މި އޮފީހުން ނިންމާފައި ވަނީ، އެ ނިންމުމުގައި ދިވެހި ފުލުހުންގެ ހިދުމަތުގެ ގާނޫނު މާނަކޮށް ތަންފީޒު ކޮށްފައި ވަނީ ރަނގަޅަށް ނޫން ކަމަށް ފެންނާތީ،" އެ އޮފީހުން ބުންޏެވެ.

ފުލުހުންގެ ގާނޫނުގެ ދަށުން އުފައްދާފައިވާ ޕޮލިސް ބޯޑުން ވަކިކުރަން ނިންމީ އެސިސްޓެންޓް ކޮމިޝަނާ އަހްމަދު މުހައްމަދާއި، އެސިސްޓެންޓް ކޮމިޝަނާ މުހައްމަދު ޖަމްޝީދާއި، އެސިސްޓެންޓް ކޮމިޝަނާ ފަރުހާދު ފިކުރީ އާއި، ޗީފް ސުޕްރިންޓެންޑެންޓް އަހުމަދު ޝުހާދު އާއި، ޗީފް ސުޕްރިންޓެންޑެންޓް ޝަރީފް އާއި، ސުޕްރިންޓެންޑެންޓް އިސްމާއިލް ޝަމީމްގެ އިތުރުން ސުޕްރިންޓެންޑެންޓް މުހައްމަދު ދާއޫދު އެވެ.