ރާއްޖޭގެ ޓޫރިޒަމް އިޝްތިހާރު ކުރުމަށް މިއަހަރު 170 އަށްވުރެ ގިނަ ހަރަކާތް ކުރިއަށް ގެންދެވިއްޖެ: މިއުވާން
ރާއްޖޭގެ ޓޫރިޒަމް އިޝްތިހާރު ކުރުމަށް މިއަހަރު 170 އަށްވުރެ ގިނަ ހަރަކާތް ކުރިއަށް ގެންދެވިއްޖެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއެވެ.
ރައީސް އޮފީހުގައި، ނޫސްވެރިންނާ ބައްދަލު ކުރައްވައި ދެއްކެވި ވާހަކަފުޅުގައި މިއުވާން ވިދާޅުވީ، ރައީސް ޞާލިޙު ވިދާޅުވެފައިާ ފަދައިން، ރާއްޖެއަށް 1.6 މިލިއަން ފަތުރުވެރިން މިއަހަރު ޒިޔާރަތް ކޮށްފައިވާ ކަމަށެވެ. އަދި އެ ލަނޑުދަނޑި ހާސިލު ކުރުމަށް ސަރުޚާރުން ކޮށްފައިވާ މަސައްކަތްތައް މިއުވާން ފާހަގަކުރިއެވެ.
"މިއަހަރުގެ ރިޔާސީ ބަޔާނުގައި ރައީސް ފާހަގަ ކުރައްވާފަ ވާނެ، މި އަހަރު ޖުމުލަ 1.6 މިލިއަން ފަތުރުވެރިން ރާއްޖެއަށް ޒިޔާރަތް ކުރާނެ ކަމަށް އަންދާޒާ ކުރައްވާކަމަށް. މި އަމާޒަށް ވާސިލުވެ، ރާއްޖެއަށް ޒިޔާރަތްކުރި 1.6 މިލިއަން ވަނަ ފަތުރުވެރިޔާ އަށް މަރުހަބާ ވިދާޅުވީ ނައިބުރައީސް ފައިސަލް ނަސީމް،" މިދިޔަ އަންގާރަ ދުވަހު ރާއްޖެއަށް 1.6 މިލިއަން ފަތުރުވެރިން އައިސްފައިވާކަން ފާހަގަ ކުރައްވައި މިއުވާން ވިދާޅުވިއެވެ.
1.6 މިލިއަން ޓޫރިސްޓުންގެ އަދަދަކީ މިދިޔަ އަހަރާ އަޅާ ބަލާއިރު 23 އިންސައްތައިގެ ކުރިއެރުމެއް ކަމަށް މިއުވާން ވިދާޅުވިއެވެ.
އެގޮތުން އެ އަމާޒު ހާސިލު ކުރުމަށް ސަރުކާރުގެ މެނިފެސްޓޯއާ އެއްގޮތަށް، ފަތުރުވެރިކަން އިޝްތިހާރު ކުރުމަށް، ބަޖެޓް އިތުރުކޮށް، ރިސޯޓުތަކުގަޔާއި ރަށްރަށާއި ގެސްޓްހައުސްތަކާއި ޔޮޓްފަހަރު އިޝްތިހާރު ކުރަމުން މިހާރުވެސް ކުރިއަށް ދާކަމަށް މިއުވާން ވިދާޅުވިއެވެ.
"އެގޮތުން މި އަަހަރުގެ ހަތަރުވަނަ ކުއާޓަރގެ ނިޔަލަށް އެމްއެމްޕީއާރުސީގެ ފަތުރުވެރިކަމުގެ މަންޒިލެއްގެ ގޮތުގައި ރާއްޖެ އިޝްތިހާރު ކުރުމަށް ދުނިޔޭގެ އެކި ކަންކޮޅުތަކުގައި 88 މާކެޓިންގް ކެމްޕެއިން، އަދި 41 ފެއަރ، 6 ރޯޑް ޝޯ، 10 ވަރޗުއަލް އިވެންޓް، 17 ފެމިލިއަރައިޒޭޝަން ޓްރިޕް، އަދި އެހެނިހެން ނުވަ އިވެންޓް ހިމެނޭ ގޮތަށް 170 އަށްވުރެ ގިނަ މާކެޓިން އަދި ޕްރޮމޯޝަނަލް ހަރަކާތްތައް ބާއްވާފަވޭ،" މިއުވާން ވިދާޅުވިއެވެ.
މީގެ އިތުރުން މިއުވާން ވިދާޅުވީ، ކޮވިޑްގެ ލޮކްޑައުންއަށް ފަހު ރާއްޖޭގެ ފަތުރުވެރިކަން އިޝްތިހާރު ކުރުމަށް އެމްއެމްޕީއާރުސީއިން ގިނަ މަސައްކަތްތަކެއް ކުރި ކަމަށާއި ނަތީއެއްގެ ގޮތުން، އަހަރުގެ ޓޫރިޒަމް ބޯޓުގެ އެވޯޑު އެމްއެމްޕީއާރުސީއަށް ލިބިގެން ދިޔަކަމަށް މިއުވާން ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
