ވަޒީފާގެ ބިރު ދެއްކުމަކީ މި ސަރުކާރުން ގަބޫލުކުރާކަމެއް ނޫން: މިއުވާން
އެއްވެސް ފަރާތަކަށް ވަޒީފާގެ ބިރު ދެއްކުމަކީ މި ސަރުކާރުން ގަބޫލުކުރާ، އަދި ބަލައިގަންނާނެ ކަމެއްވެސް ނޫން ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
މިއުވާން މިހެން ވިދާޅުވީ، މިއަދު ރައީސް އޮފީހުގައި ނޫސްވެރިންނާ ބައްދަލުކުރައްވައި، ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.
އެގޮތުން، އެމްޑީޕީގެ އެތެރޭގެ ވަރުގަދަ އިންތިހާބަކަށް ތައްޔާރުވަމުން ދާއިރު، ސަރުކާރުގެ ކުންފުނިތަކުގައި ތިބި އެމްޑީޕީގެ ވަކި ބޭފުޅަކަށް ތާއީދުކުރާ މުވައްޒަފުންނަށް ވަޒީފާގެ ބިރު ދައްކާ ހުރަސްއަޅާ ވާހަކަ އަޑުއިވޭ ކަމަށާއި އެފަދަ އެއްވެސް ކަމެއް ސަރުކާރަށް ފާހަގަވެފައި ވޭތޯ ނޫސްވެރިއަކު ކުރި ސުވާލުގެ ޖަވާބުގައި މިއުވާން ވިދާޅުވީ، އެއްެވެސް އިންތިޚާބަކާ ގުޅިގެން، ސަރުކާރުން އެއްވެސް މީހަކަށް ބިރު ނުދައްކާނެ ކަމަށެވެ.
"ވަޒީފާގެ ބިރެއް އެއްވެސް ފަރާތަކަށް ނުދައްކާނެ މި ސަރުކާރަކުން. އަޅުގަނޑު ހަމަ ޔަގީންކަން މި އަރުވަނީ، ސަރުކާރުގެ އިދާރާތަކުގެ އިތުރުން ސަރުކާރުގެ ކުންފުނިތަކުގަ މަސައްކަތް ކުރައްވާ ފަރާތްތަކަށްވެސް، އެތެރޭގެ އިންތިޚާބު އެކަންޏެއްނޫން، އެއްވެސް އިންތިޚާބަކާ ގުޅިގެން ސަރުކާރުން އެއްވެސްކަހަލަ ބިރެއް ނުދައްކާނެ" މިއުވާން ވިދާޅުވިއެވެ.
މިއުވާން މިފަދައިން ވިދާޅުވެފައިވީ ނަމަވެސް، އެމްޑީީޕީެ ރިޔާސީ ޕްރައިމަރީއާއި ދިމާކޮށް އެޕާޓީގެ ރައީސް މުހައްމަދު ނަޝީދަށް ތާއީދު ކުރާ ޕާޓީ މެންބަރުންނަށް ވަޒީފާގެ ބިރު ދައްކާކަމަށް އެމަނިކުފާނަށް ތާއިދު ކުރާ މެންބަރުން އަންނަނީ ތުހުމަތުކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
