އިސްތިއުފާއަށް ފަހު ސަރުކާރުން މުސާރައާއި އެލަވަންސެއްވެސް ޔުމްނާއަކަށް ނުދޭ: އިމްރާން
ޖެންޑާ މިނިސްޓްރީގެ ނައިބުގެ މަގާމުން ފާތިމަތު ޔުމްނާ އިސްތިއުފާ ދިން ފަހުން، ސަރުކާރުން މުސާރަ އަދި އެލަވަންސެއްވެސް ނުދޭކަމަށް ފިރިކަލުން، ހޯމް މިނިސްޓަރު ޝެއިޚް އިމްރާން ވިދާޅުވެއްޖެއެވެ.
އިމްރާން މިހެން ވިދާޅުވީ، ޔުމްނާއަށް ޖެންޑާ މިނިސްޓްރީގެ ކޮންސަލްޓެންޓްުގެ މަގާމު ދެއްވާފައިވާކަމަށް ބައެއް މީޑިޔާތަކުގައި ރިޕޯޓު ކުރުމާ ގުޅިގެންނެވެ.
ތައިލޭންޑުން ޕީއެޗްޑީ ހާސިލު ކުރުމަށް ވަޑައިގަތުމުން ޖެންޑާރ މިނިސްޓްރީގެ ތެރެއިން އެހެން މަގާމެއް އުފައްދައި ކޮންސަލްޓަންޓުކަން ދީ އެ ގައުމުގައި ހުރެ ހުރިހާ ހަރަދުތައް ހަމަޖެއްސޭ ވަރުގެ މުސާރައެއް ދެމުން ގެންދާކަމަށް ބައެއް މީޑިއާތަކުން ރިޕޯޓު ކުރިއެވެ.
މިކަމާ ގުޅިގެން މިނިސްޓަރ އިމްރާން ވިދާޅުވެފައި ވަނީ، މިދިޔަ އަހަރުގެ ނޮވެމްބަރު މަހުގެ 30 ވަނަ ދުވަހު، ޔުމްނާ އަދާކުރެއްވި މަގާމުން އިސްތިއުފާ ދެއްވާފައިވާ ކަމަށާއި އޭގެ ފަހުން ސަރުކާރުން އެއްވެސް މުސާރައެއް އަދި އެލަވަންސެއް ދެއްވާފައި ނުވާ ކަމަށެވެ.
ޖެންޑާ މިނިސްޓްރީގެ ކޮންސަލްޓެންޓެއްގެ މަޤާމަށް ޔުމްނާ ހަމަޖައްސައި ތައިލޭންޑްގައި ދިރިއުޅުއްވޭވަރުގެ އާމްދަނީއެއް ދައުލަތުގެ ފައިސާއިން ޔުމްނާއަށް ދެމުން އަންނަ ކަމަށް އޮންލައިން ނޫހަކުން އިއްޔެ ލިޔެ އާންމުކޮށްފައިވާ ޚަބަރާ ގުޅިގެން ޖެންޑާ މިނިސްޓްރީން ބުނީ، އެ މިނިސްޓްރީގެ ޑެޕިއުޓީ މިނިސްޓަރެއްގެ ވަޒީފާގައި ކުރިން ހުންނެވި ޔުމްނާ މަތީ ތައުލީމު ހާސިލުކުރުމަށް ރާއްޖޭން ބޭރަށް ވަޑައިގަންނަވާތީވެ، އެ މަޤާމުން އިސްތިއުފާ ދެއްވީ 30 ނޮވެންބަރު 2021 ގައި ކަމަށެވެ.
އަދި އެތާރީހުން ފެށިގެން އެ މިނިސްޓްރީން ޔުމްނާއަށް މުސާރައެއް ވެސް އަދި އެލަވަންސްއެއް ވެސް ދީފާ ނުވާނެކަން ކަށަވަރުކޮށްދޭ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
