ޔާމީންގެ ސެކިއުރިޓީއަށް ޖޯކު ޖެހި އެމްޑީޕީން ޖަލްސާތަކަށް މީހުނަށްވުރެ ގިނަ ސެކިއުރިޓީން ގެންދޭ: ޑރ. ޖަމީލް

ކުރިން ރައީސް ޔާމީންގެ ސެކިއުރިޓީއަށް ޖޯކު ޖެހި އެމްޑީޕީން މިއަދު ޖަލްސާތަކަށް މީހުނަށްވުރެ ގިނަ ސެކިއުރިޓީން ގެންދާ ކަމަށް ކުރީގެ ނައިބު ރައީސް އަދި ގާނޫނީ ވަކީލު ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.

ޖަމީލް މިހެން ވިދާޅުވީ، މިއަދު ރައީސް ޞާލިހު ކ. ގުރައިދޫއަށް ވަޑައިގެންނެވި އިރު އެރަށުގައި ކުރި މުޒާހަރާ ހުއްޓުވުމަށް އެމްއެންޑީއެފްއިން ގޮސްފައިވާތީ އެކަމަށް އިޝާރާތް ކުރައްވަމުންނެވެ.

"ކުރިން ރ. ޔާމީނުގެ ސެކިއުރިޓީއަށް ޖޯކުޖެހި އެމްޑީޕީ މިއަދު ޖަލްސާއަށްދާ މީހުންނަށްވުރެ ގިނައިން ސެކިއުރިޓީ ފޯސްގެންދޭ. ޕީޕީއެމްއަކީ ޞުލްޙައަަށް ލޯބިކުރާ ހަމައެކަނި ސިޔާސީ ޕާޓީ. ރ.ޔާމީނަށް ކުރާ ސިޔާސީ އަނިޔާ ހުއްޓަންދެން އިޙްތިޖާޖު ފެންނާނެ،" ޖަމީލް ވިދާޅުވިއެވެ.

ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ކ. ގުރައިދޫއަށް ވަޑަގަތުމުން، ކުރީގެ ރައީސް ޔާމީން ދޫކޮށްލަން ގޮވާލާ އެރަށު މީހުން ވަނީ މުޒާހަރާ ކޮށްފައެވެ.

ރައީސް ޞާލިހު އެރަށަށް ވަޑައިގަތުމުން މުޒާހަރާ ފަށައި، ރައީސް އެރަށުން ފުރާ ވަޑައިގަތުމުން މުޒާހަރާ ވަނީ ހުއްޓާލާފައެވެ.

އެރަށު ކައުންސިލްގެ ރައީސް ހުސައިން ޔާމީން މުހައްމަދު "ވޮއިސް" އަށް ވިދާޅުވީ، ފުދޭވަރަކަށް ގިނަ މީހުން މުޒާހަރާގައި ބައިވެރިވި ކަމަށާއި، މުޒާހަރާގެ ބައިވެރިން ގޮވާލަމުން ދިޔައީ ރައީސް ޔާމީނު ދޫކޮށްލުމަށް ކަމަށެވެ.

ޔާމީން ވިދާޅުވީ މުޒާހަރާގެ ބައިވެރިންނަށް ފުލުހުން އަނިޔާ ކުރި ކަމަށެވެ. އަދި ފުލުހުން މަސައްކަތް ކުރަމުން ދިޔައީ، މުޒާހަރާގެ ބައިވެރިންގެ އަޑު، ރައީސް ޞާލިހުގެ ޓީމަށް ނީވޭ ހިސާބަށް ދުރަށް ޖައްސަން ކަމަށް ޔާމީން ވިދާޅުވިއެވެ.

"ފުލުހުން ދެން އަޅުގަނޑުމެންގެ މީހުނަށް ވަރަށް އަނިޔާކުރި. ބާރުގެ ބޭނުންކޮށްގެން ފުލުހުން ވަރަށް އަނިޔާވެރިކޮށް ކަންތައް ކުރީ،" ޔާމީން ވިދާޅުވިއެވެ.

މުޒާހަރާކުރީ ވަރަށް ސުލްހަވެރިކޮށް ކަމަށާއި ނަމަވެސް ފުލުހުން ކަންތައްކުރީ ވަރަށް އަނިޔާވެރިކޮށް ކަމަށް ތަކުރާރުކޮށް ޔާމީން ފާހަގަ ކުރެއްވިއެވެ.