"ނިމިފައި ހުރި ކަންކަމުގެ ރިބަންކަނޑާނަމަ ދައުރުގެ ކޮންމެ ދުވަހެއް ހޭދަކުރަންޖެހޭނީ އެކަމުގައި"
މި ސަރުކާރުގެ މިހާތަނަށް އައި އިރުގައި ކޮށް ނިންމާފައި ހުރި ކަންތައްތައް ހުޅުވަން، ރިބަން ކަނޑަންޖެހޭ ނަމަ، މި ދައުރުގެ ބާކީ އޮތް ކޮންމެ ދުވަހެއް ހޭދަކުރަންޖެހޭނީ އެކަމަށް ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމްޑީޕީ ރިޔާސީ ކެންޕެއިނަށް އއ. ތޮއްޑޫ އަށް ވަޑައިގެން އެ ރަށު އެމްޑީޕީ މެންބަރުންނާއި ބައްދަލު ކުރައްވައި ވާހަކަ ދައްކަވަމުން ރައީސް ޞާލިޙު ވިދާޅުވީ، ރާއްޖޭގެ ވަރަށް ގިނަ ރަށްރަށުގައި ރަނގަޅު ބަނދަރެއް ނެތުމުގެ ސަބަބުން ލަފާފުރުމުގެ ދަތިކަން ވަރަށް ބޮޑަށް ކުރިމަތިވެފައިވާ ކަމަށެވެ. އަދި އެކަން ކަމަށް ޚަރަދު ކުރުމަކީ ބޭކާރު ކަމެއް ކަމުގައި ބައެއް ފަރާތްތަކުން ވިދާޅުވާއިރު، އެކަމުގެ މުހިންމުކަން ހަގީގަތުގައި އެނގޭނީ އެ ރަށްރަށުގައި އުޅޭ މީހުންނަށް ކަމަށް ރައީސް ޞާލިހް ވިދާޅުވިއެވެ.
މިއާއެކު ރައީސް ޞާލިހް ވިދާޅުވީ، މިސަރުކާރުން އެތައް ރަށެއްގައި ބަނދަރު ހެދުމުގެ މަސައްކަތް ކުރަމުންދާ ކަމަށާ، އޭގެ ސަބަބުން އޮނޑި ދޯނި ފަހަރު ގެން ގުޅޭ މީހުންނަށް ދޯނި އަޅާނެ ތަނެއް ނެތީގެން އުޅެން ނުޖެހޭ ކަމަށާ، އެމީހުންނަށް މިހާރު ހަމަ ނިދި ލިބި، ސިކުނޑިއަށް އެތައް ލުޔެއް ލިބިގެން ގޮސްފައިވާ ކަމަށެވެ.
ހަމައެކަނި ބަނދަރުގެ ވާހަކަ ދައްކަން ފެށިޔަސް އަޅުގަނޑުގެ ވާހަކައަށް ބައިގަޑި އިރެއް ވަރު ނަގާނެ. އަޅުގަނޑުމެންގެ ސަރުކާރުގެ މިހާތަނަށް އައި އިރުގައި ކޮށްނިންމާފައި ހުރި ކަންތައްތައް ހުޅުވަންޖެހޭ ކަމަށް ވަންޏާ، ރިބަން ކަނޑަންޖެހޭ ކަމަށް ވަންޏާ، އަޅުގަނޑުގެ މި ދައުރުގެ ބާކީ އޮތް ކޮންމެ ދުވަހެއް ހޭދަކުރަންޖެހޭނީ އެކަމަށް. އެވަރަށް މަސައްކަތް ތައް ނިމިފައި އެބަހުރި. މަސައްކަތްތައް ކުރެވެމުން އެބަދޭ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހް ވިދާޅުވީ، މިއަހަރުގެ ޖުލައި އަދި އޯގަސްޓް މަހާއި ހަމައަށް އަންނައިރު، އެމަނިކުފާނު އެ ވިދާޅުވި ވާހަކައިގެ ތެދުކަން ހާމަވާނެ ކަމަށެވެ. އަދި އެމަނިކުފާނުގެ ވަގުތުތައް އެ މަސައްކަތްތައް ހުޅުވުމަށް ހޭދަކުރާ ކަމުގައިވާނަމަ ދެން އިތުރަށް ކުރާނެ މަސައްކަތެއް ނޯންނާނެ ކަމަށްވެސް ވިދާޅުވި އެވެ.
އަދި އެއީ އަމާޒެއް އޮވެގެން ކަންކަން ކުރައްވާތީ ވާގޮތް ކަމަށް ވިދާޅުވެ ރައީސް ޞާލިހު ވަނީ އެމަނިކުފާނަކީ ވިޝަނަރީ މީހެއް ކަމަށް ގަބޫލު ނުކުރައްވާ ކަަމަށް ކުރީގެ ރައީސް މުހައްމަދު ނަޝީދު ވިދާޅުވި ވިދާޅުވުމަށް ނުސީދާގޮތުން ރައްދުވެއް ދެއްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
