އދ.ގެ ސަލާމަތީ މަޖިލީހަށް އިންޑިއާ ހޮވަން ރާއްޖެއިން ތާއީދުކުރަން ނިންމައިފި

އދގެ ސެކިއުރިޓީ ކައުންސިލުގެ ވަގުތީ މަގާމަށް އިންޑިއާ ހޮވަން ރާއްޖެއިން ތާއީދުކުރާކަމަށް ފޮރިން މިނިސްޓްރީއިން ބުނެފިއެވެ.

ފޮރިން މިނިސްޓްރީއިން ނެރުނު ނޫސްބަޔާނެއްގައި ބުނީ، 2028-2029 ވަނަ އަހަރަށް އދ ގެ ސެކިއުރިޓީ ކައުންސިލަށް އިންޑިއާ އިން ކުރިމަތިލާފައިވާ ކަމަށެވެ. އަދި އެ ދައުރަށް ސަލާމަތީ މަޖިލީހުގެ ދާއިމީ ނޫން މެންބަރު ދައުލަތް އިންތިޚާބުކުރުން އޮންނާނީ 2027 ވަނަ އަހަރުގައި އޮންނަ އދގެ އާންމު މަޖިލީހުގެ 85 ވަނަ ބައްދަލުވުމުގައި ކަމަށްވެސް ބުނެފައިވެއެވެ.

ފޮރިން މިނިސްޓްރީން އިތުރަށް ބުނީ، އެ މިނިސްޓްރީގެ މި ނިންމުމަކީ އިންޑިއާގެ އެކްސްޓާނަލް އެފެއަރޒް މިނިސްޓަރު ޑރ ސުބްރަމާނިޔަމް ޖަޔަޝަންކަރު މި މަހުގެ 18 ވަނަ ދުވަހުން 19 ވަނަ ދުވަހަށް ރާއްޖެއަށް ކުރެއްވި ޒިޔާރަތުގެ ތެރެއިން ނިންމާފައިވާ ނިންމުމެއްކަމަށެވެ. އެ ޒިޔާރަތަކީ ހދ.ހަނިމާދޫ އެއާޕޯޓު ބޮޑުކުރުމުގެ މަޝްރޫޢު ފެށުމުގެ ރަސްމިއްޔާތުގައި ބައިވެރިވެވަޑައިގަތުމަށް ޖައިޝަންކަރު ކުރެއްވި ދަތުރުފުޅެކެވެ.

އަދި ރާއްޖެއިން އިންޑިއާއަށް ކުރާ ތާއީދަކީ ދެ ގައުމުގެ ދެމެދުގައި އޮތް ވަރުގަދަ ގުޅުމުގެ ސަބަބުން އޮންނަ ތާއީދެއް ކަމަށް ބުނެފައިވެއެވެ.

ފޮރިން މިނިސްޓްރީއިން ބުނީ، ބައިނަލްއަޤުވާމީ ޞުލްޙައާއި ސަލާމަތް ނެގެހެއްޓުމުގައި އިންޑިއާއިންވަނީ ވަރުގަދަ އަދި ހަރުދަނާ ލީޑާޝިޕެއް ދައްކުވައިދީފައި ކަމަށެވެ. އަދި އދގެ ޗާޓަރުގައި ހިމެނޭ އަގުތަކާއި މަބްދައުތަކަށް ވަރުގަދައަށް އިންޑިއާއިން ތާއީދުކުރާކަމަށް އެ ބަޔާނުގައި ބުނެފައިވެއެވެ.

މީގެ އިތުރުން، ސަލާމަތީ މަޖިލީހުގައި ތަރައްޤީވަމުން އަންނަ ހުރިހާ ޤައުމެއްގެ އަޑަށް އިންޑިއާވާނެ ކަމުގެ ޔަޤީންކަން ދިވެހި ސަރުކާރަށް އެބައޮތް ކަމަށްވެސް އެ ބަޔާނުގައި ބުނެފައިވެއެވެ. އަދި ދުނިޔޭގެ ސިޔާސަތުތައް ބައްޓަންކޮށް، ސުލްހަ ގާއިމުކޮށް ރައްކައުތެރިކަން ކަށަވަރު ކުރުމުގައި އެ ގައުމުން ސެކިއުރިޓީ ކައުންސިލުގައި ރަނގަޅު މަސައްކަތްތަކެއް ކުރާނެކަން ކަށަވަރުވާކަމަށްވެސް ބުނެފައިވެއެވެ.