ވ އަތޮޅުން ފެނުނު ހަށިގަނޑަކީ ތެޔޮ ބޯޓުން ގެއްލުނު މީހާއެއް ނޫން: ފުލުހުން
ވ. އަތޮޅުން ފެނުނު ހަށިގަނޑަކީ ތެޔޮ ބޯޓުން ގެއްލުނު ބިދޭސީ މީހާ ނޫންކަން ކަށަވަރު ވެފައިވާ ކަމަށް ފުލުހުން ބުނެފިއެވެ.
ވ އަތޮޅު ވެމްޕަރުފަޅު ހުޅަނގު-އުތުރު ކަނޑުން އިންސާނެއްގެ ހަށިގަނޑު ފެނިފައިވާކަމަށް ފުލުހުން ބުނީ މިއަހަރުގެ ޖަނަވަރީ މަހުގެ 2 ވަނަ ދުވަހުއެވެ.
އެ ހަށިގަނޑުގެ ފޮޓޯތައް އޭރު މީސްމީޑިއާގައި ދައުރުވެފައިވާއިރު، ފެންނަ ފެނުމަށް ހަށިގަނޑު އޮތީ ވަރަށް ބޮޑަށް ކުނިވެ ފެން ވަނުމުގެ ސަބަބުން ފުޕިވެސްފައެވެ.
އެ ހަށިގަނޑު ފެނިފައިވަނީ، ތެޔޮ ބޯޓަކުން ދިވެއްސަކާއި އެކު ފުރި ބިދޭސީއެއް ގެއްލުނުތާ ގާތްގަނޑަކަށް ހަފްތާއެއް ވާން ވެފައި ވަނިކޮށް ކަމަށްވާތީ ގިނަ ބަޔަކު ޝައްކު ކުރަމުންދިޔައީ އެ ހަށިގަނޑަކީ ގެއްލުނު ބިދޭސީ މީހާގެ ހަށިގަނޑު ކަމަށެވެ.
އެ ތެޔޮ ބޯޓުން ދަތުރު ކޮށްފައިވަނީ ގދ. ތިނަދޫ / މަނާރު، މުޙައްމަދު ނިޡާމް (45އ) އަދި ބަނގްލަދޭޝް ރައްޔިތެއް ކަމުގައިވާ މޮހައްމަދު ލިޓަން (35އ)އެވެ. އެ ދެމީހުން ވިލިމާލެ އިން ފުރީ ނިމުނު އަހަރުގެ ޑިސެމްބަރު މަހުގެ 28 ވަނަ ދުވަހުއެވެ.
އެތަނުން މުޙައްމަދު ނިޡާމް މިމަހު 3 ވަނަ ދުވަހު މާލޭގައި ހުންނަ ގެސްޓް ހައުސް އަކުން ފެނިފައިވާއިރު ފުލުހުން ވަނީ މީހަކު މަރާލި ކަމުގެ ތުހުމަތުގައި އޭނާ ހައްޔަރުކޮށްފައެވެ.
ނަމަވެސް، ވ އަތޮޅުން ފެނުނު ހަށިގަނޑަކީ ގެއްލުނު ލިޓަންގެ ހަށިގަނޑު ނޫން ކަން ޑީއެންއޭ ޓެސްޓް ތަކުން ދައްކާއިރު، އެ ހަށިގަނޑާއި ބެހޭ އިތުރު މައުލޫމާތު ހޯދުމަށް ފުލުހުން އަންނަނީ މަސައްކަތް ކުރަމުންނެވެ. އެގޮތުން އެއީ އޮޔާއި އައިސްފައިވާ ހަށިގަނޑެއްތޯ ބެލުމަށް އިންޓަނޭޝަނަލް ޕާޓްނަރުންނާއި އެކު މަސައްކަތް ކުރަމުންދާ ކަމަށް ފުލުހުން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
