ޖުމްހޫރީ ޕާޓީއަކީ ރިޔާސީ އިންތިޚާބުގައި ގޮތް ނިންމާ ޕާޓީ: ރިޔާޒު

ޖުމްހޫރީ ޕާޓީއަކީ ރިޔާސީ އިންތިޚާބުތަކުގައި ގޮތް ނިންމާ ޕާޓީކަމަށް ޖޭޕީގެ އެޑްވައިޒަރު އަދި މަޖިލީހުގެ ވިލިފުށީ ދާއިރާގެ ކުރީގެ މެންބަރު ރިޔާޒް ރަޝީދު ވިދާޅުވެއްޖެ އެވެ.

ރިޔާޒު މިފަދައިން ވިދާޅުވެފައިވަނީ ޖުމްހޫރީ ޕާޓީގެ ގައުމީ ކޮންގުރެސް މާދަމާ ފަށާއިރު، އެކަމާއި ގުޅޭ އެންމެ ފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނެވެ.

ރިޔާޒު ވިދާޅުވީ ކުރިއަށް އޮތް ރިޔާސީ އިންތިޚާބުގައި ޖޭޕީއިން އަމަލުކިރާނެ ގޮތާއި ގުޅިގެން ވަރަށް ފުޅާ ދާއިރާއެއްގައި މާދަން ފެށޭ އެ ޕާޓީގެ ގައުމީ ކޮންގުރެސްގައި މަޝްވަރާކުރާނެ ކަމަށެވެ.

ރާއްޖޭގެ އެކި ކަންކޮޅުތަކުން ޖޭޕީގެ މަންދޫބުން އެ ބައްދަލުވުމުގައި ބައިވެރިވާއިރު، ރައްޔިތުންގެ އިހުސާސް ހުރިގޮތް އަދި ރައްޔިތުން ބޭނުންވާ ގޮތް ކޮންގްރެސްގެ ތެރެއިން ސާފުވެގެންދާނެކަމަށް އޭނާ ވިދާޅުވިއެވެ.

އެކަން ފާހަގަކުރައްވާ ރިޔާޒު ވިދާޅުވީ ވޭތުވެދިޔަ ތަނުގައި ރިޔާސީ އިންތިޚާބުތަކުގައި ޖުމްހޫރީ ޕާޓީއިން ވަރަށް ފުޅާ ދައުރެއް އަދާކޮށްފައިވާ ކަމަށެވެ.  ޖުމްހޫރީ ޕާޓީއަކީ ގޮތް ނިންމާ ޕާޓީކަމަށް ގިނަ ބަޔަކު ގަބޫލުކުރާއިރު، އަންނަ ރިޔާސީ އިންތިޚާބުގައި ޖޭޕީއިން ކަންކަން ބައްޓަންކުރާނެ ގޮތްތައް ކޮންގްރެސްގެ ތެރެއިން ކަނޑައެޅިގެންދާނެކަމަށް އޭނާ ވިދާޅުވި އެވެ.

"މީގެ ކުރިންވެސް ޖުމްހޫރީ ޕާޓީއަކީ ވަރަށް ހަރަކާތްތެރި، ޚާއްސަކޮށް ރިޔާސީ އިންތިޚާބުގައި ގޮތް ނިންމާ ޕާޓީގެ ގޮތުގައި ގިނަ ބަޔަކަށް ގަބޫލުކުރެވެނީ. އެއީ އޭގެ ހަގީގަތްވެސް މެ"

ޖުމްހޫރީ ޕާޓީގެ އެޑްވައިޒަރު ރިޔާޒު ރަޝީދު

ރިޔާޒު ވިދާޅުވީ ޖުމްހޫރީ ޕާޓީއަކީ ތަސައްވަރެއް އޮވެގެން، މެނިފެސްޓޯއަކާއެކު ވެރިކަމަށް ވާދަކުރާ ޕާޓީއެއްކަމަށެވެ. ވެރިކަން ކުރުމުގެ ފުރުސަތު މިހާތަނަށް ލިބިފައި ނެތަސް ޖޭޕީގެ ވައުދުތައް އެހެން ސިޔާސީ ޕާޓީތަކުން ކޮޕީކޮށް، ތަންފީޒު ކުރަމުންދާތަން ފެންނަކަން އޭނާ ފާހަގަކުރެއްވި އެވެ.

އެއާއެކު އޭނާ ވިދާޅުވީ ޖުމްހޫރީ ޕާޓީގެ އުންމީދަކީ އެ ޕާޓީއިން ގައުމާއި ރައްޔިތުންގެ ކުރިއެރުމަށް ގެންގުޅޭ ތަސައްވަރު ތަންފީޒު ކުރާނެ ފުރުސަތެއް ލިބިގެން ދިއުންކަމަށެވެ. އަދި އިންތިޚާބަށް ޖޭޕީއިން ނިކުންނާނީ އެފަދަ ހުރިހާ ވިސްނުމެއް ވިސްނާ، ރައްޔިތުން ބޭނުންވާ ގޮތަށްކަމަށް އޭނާ ވިދާޅުވިއެވެ.