މިދިޔަ މަހު 16 ގައިދީއަކަށް މައާފުދިން

ރައީސުލް ޖުމްހޫރިއްޔާ އަށް ލިބިގެންވާ ބާރުގެ ދަށުން މިދިޔަ މަހު 16 ގައިދީއަކަށް މައާފުދިން ކަމަށް މޯލްޑިވްސް ކަރެކްޝަނަލް ސާވިސް އިން ބުނެފިއެވެ.

ކަރެކްޝަންސް އިން މިއަދު އާންމުކުރި ޖެނުއަރީ މަހުގެ ތަފާސްހިސާބުތަކުން ދައްކާ ގޮތުން އެ ޖެނުއަރީ މަސް ތެރޭގައި ބަންދުގެ މުއްދަތު ހަމަވެގެން  24 މީހުން ޖަލުން މިނިވަންކޮށްފައިވެއެވެ. އަދި ރައީސް އަށް ލިބިފައިވާ ބާރުގެ ދަށުން 16 މީހަކަށް މައާފުދީ މިނިވަން ކޮށްފައިވެއެވެ.

މިދިޔަ މަހުގެ ތެރޭގައި 50 އަށްވުރެ ގިނަ މީހުން ޖަލަށް ލައިފައިވެއެވެ. ތަފާސްހިސާބުތައް ދައްކާގޮތުން އޭގެ ތެރޭގައި އެންމެ ގިނައީ މަސްތުވާތަކެތީގެ މައްސަލަތަކުގައި ހައްޔަރުކުރި މީހުންނެވެ. ދެވަނައަށް އެންމެ ގިނައީ ވައްކަމާއި ފޭރުމުގެ މައްސަލަތަކެވެ. މާރާމާރީގެ މައްސަލަތަކުގައި ބަންދުކުރި މީހުން މިދިޔަ މަހު ނިސްބަތުން މަދުކަމަށް ތަފާސްހިސާބުތަކުން ދައްކަ އެވެ.

ޖެނުއަރީ މަހުގެ ތެރޭގައި 16 މީހަކަށް މާފުދީ ބަންދުން ދޫކޮށްލާފައިވާއިރު، މަސްތުވާތަކެތި ޓްރެފިކްކޮށްގެން މިދިޔަ ނޮވެމްބަރު މަހު އުމުރަށް ޖަލަށްލީ މީހެއްގެ ބަންދުގެ މުއްދަތު ރައީސް ކުރުކޮށްދީ މިނިވަންކުރި މައްސަލަ ދާދި ފަހަކުން ފެންމަތިވެފައިވެއެވެ.

މިކަމާއި ގުޅިގެން ސިޔާސީ ގިނަ ފަރާތް ތަކަކުން ދަނީ ރައީސް އަށާއި ސަރުކާރަށް ފާޑު ކިޔަމުންނެވެ.