އަޅުގަނޑު މަންމަ ބުނުއްވީ ދަރިފުޅު ދެން ވަންނަންވާނީ އެމްޑީޕީއަށޭ: ސަމީރު

ޖުމްހޫރީ ޕާޓީން ވަކިވެވަޑައިގަތުމުން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ގުޅިވަޑައިގަތުމަށް މަންމާފުޅު އެދިލެއްވިކަމަށް ކުރިއަށް އޮތް ރިޔާސީ އިންތިޚާބުގައި ޖޭޕީން ވަކިން ނިކުތުމަށް ނިންމުމާއި ގުޅިގެން އެ ޕާޓީން އިސްތިއުފާދެއްވި ރައީސް އޮފީހުގެ މިނިސްޓަރު އަހުމަދު ސަމީރު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ގުރައިދޫ ބައި-އިލެކްޝަންގެ އެމްޑީޕީގެ ޖަލްސާ ރަސްމީކޮށް ފެއްޓެވުމަށް ރޭ ބޭއްވި ޖަލްސާގައި ބައިވެރިވެވަޑައިގެން ސަމީރު ވިދާޅުވީ އެމްޑީޕީއަކީ ފަހަރެއްގައި އެބޭފުޅާއާއި ދުރު ޕާޓީއެއް ނޫން ކަމަށެވެ.

އެ ބޭފުޅާގެ މަންމާފުޅަކީ އެމްޑީޕީގެ ބޭފުޅެއްކަމަށާއި، ޖުމްޙޫރީ ޕާޓީން ވަކިވެވަޑައިގަތުމުން ދެން އެހެން ޕާޓީއަކާއި ގުޅިވަޑައިގަންނަ ނަމަ މަންމާފުޅުގެ ޕާޓީ އެމްޑީޕީއާއި ގުޅިވަޑައިގަތުމަށް އެދިވަޑައިގެންނެވިކަމަށް އޭނާ ވިދާޅުވި އެވެ.

"ދާދިފަހުން އޭގެ ހާލަތަށް ރިއާޔަތްކޮށް (ޖުމްޙޫރީ ޕާޓީން) އިސްތިއުފާދީފައި ނިކުތުމުން އަޅުގަނޑު މަންމައާއި ބައްދަލުކުރަން ކޮންމެ ރެޔަކުވެސް ދަން. އެގޮތުގެ މަތިން ދިޔަ ދިއުމުގައި މަންމަ ބުނުއްވީ ދަރިފުޅާއޭ ކޮން ޕާޓީއަކަށް ހޭ ވަންނަން ތި އުޅެނީ؟ ދެން އަޅުގަނޑު އަހައިފިން މަންމާ، ކޮން ޕާޓީއަކަށްހޭ އަޅުގަނޑު ވަންނަންވީ؟ ބުނީމަ ބުނީ މަންމަ ޕާޓީއަށޭ ވަންނަން ވާނީ. ދެން އަޅުގަނޑު ސަމާސާކޮށްފައި އަހައިފިން، މަންމަ ޕާޓިއަކީ މިހާރު ކޮބައިހޭ؟ ބުނީމަ ބުނީ އެއީ އެމްޑީޕީއޭ! އެހެންވީމާ އަޅުގަނޑަށް އެމްޑީޕީ އަކީ ދުރު ޕާޓީއެއް ނޫން"

ރައީސް އޮފީހުގެ މިނިސްޓަރު އަހުމަދު ސަމީރު

އެކަން ފާހަގަކުރައްވާ ސަމީރު ވިދާޅުވީ އަދި ރަސްމީކޮށް އޭނާ އެމްޑީޕީއާއި ގުޅިވަޑައިގެންފައި ނުވާކަމަށެވެ. އަދި އޭނާ މިވަގުތު މަސައްކަތްޕުޅު ކުރައްވަނީ ރައީސުލްޖުމްޙޫރިއްޔާ އަންގަވާ ގޮތަކަށްކަމަށް އޭނާ ވިދާޅުވި އެވެ.

ސަމީރުގެ ވާހައިގައި ވަނީ އެމްޑީޕީގެ ރައީސް މުޙައްމަދު ނަޝީދު ޕާޓީގެ ތެރެއިން އުފައްދަވާފައިވާ "ފިކުރެއްގެ ދިރުން" ގޮތްޕަށް ވެސް ފާޑުކިޔުންތައް އަމާޒުކުރައްވާފަ އެވެ.

އެގޮތުން ނަޝީދަށް ފާދުކިޔުން އަމާޒުކުރައްވާ ސަމީރު ވިދާޅުވީ ގުރައިދޫ ދާއިރާގެ ބައި-އިލެކްޝަނުގައި ވޯޓުދެއްވަންވީ އިރުއިރުކޮޅާ ފިކުރު ބަދަލުނުކުރާނެ ބޭފުޅަކަށް ކަމަށެވެ.

ފިކުރު ބަދަލުކުރާ ނުވަތަ އިދިކޮޅު ފަރާތްތަކަށް ވޯޓުދީ އެ ފަދަ މީހަކު މަޖިލީހަށް ހޮވުމަކީ ސަރުކާރުގެ މަސައްކަތްތަކަށް ހުރަސްއެޅިގެންދާނެ ކަމެއްކަމަށް އޭނާ ވިދާޅުވިއެވެ. އަދި މިއަދު ސަރުކާރަށް އެންމެ ބޮޑެތި ފިއްތުންތައް ކުރިމަތިކުރަމުންދަނީ ވާދަވެރި ސިޔާސީ ޕާޓީއަށްވުރެ އެމްޑީޕީގެ އެތެރެއިންކަމަށް އޭނާ ވިދާޅުވި އެވެ.