"އިންތިޚާބާ ދިމާކޮށް ހިޔާގެ ކުލި ކުޑަ ކުރަން އުޅޭ ކަމަށް ދައްކަނީ ސަރުކާރުގެ މޫނުމަތި ރީތިކުރަން"

ވެރިކަން ނިމެން ކައިރިވެ، އަންނަ ދައުރުގެ އިންތިހާބު ބޯމަތިވެފައި ވަނިކޮށް، ރައީސް އިބްރާހިމް މުހައްމަދު ޞާލިހު ގެ ‘ހެޔޮފުޅުކަމުން’ ހިޔާ ފްލެޓުތަކުގެ ކުލި ކުޑަކުރަން އުޅޭކަމަށް ދޭހަވާގޮތަށް މީޑިއާ ގައި ޚަބަރުތައް ފަތުރުވަނީ ސަރުކާރުގެ މޫނުމަތި ރީތިކުރުމަށް ކަމަށް އާއްމުންގެ އެކުވެރި ގުޅުން ޖަމިއްޔާއިން ބުނެފިއެވެ.

މިމަހުގެ 19 ވަނަ ދުވަހު އާއްމުންގެ އެކުވެރި ޖަމިއްޔާއިން ވަނީ ރައީސް ޞާލިހާއި ބައްދަލު ކުރައްވާފައެވެ. އެ ބައްދަލުވުމާއި ގުޅިގެން މައުލޫމާތު ދެމުން ވަރަށް ގިނަ ނޫސްތަކުގައި ހިޔާ ފުލެޓުތަކުގެ ކުލި ކުޑަކުރަން އުޅޭ ކަމަށް ރިޕޯޓް ކޮށްފައިވެއެވެ.

އެކަމާއި ގުޅިގެން އާއްމުންގެ އެކުވެރި ޖަމިއްޔާއިން ނެރުނު ނޫސް ބަޔާނެއްގައި ބުނީ ރައީސް ޞާލިހު ވެރިކަމާއި ހަވާލުވެވަޑައިގެން ފުރަތަމަ 100 ދުވަސް ތެރޭގައި ކުރެއްވެވި އެއްކަމަކީ ހިޔާ ފްލެޓުތަކުގެ ‘ކޮތަރުކޮށިކަން’ ކަނޑުވަން ތަނުގެ ޑިޒައިން ބަދަލު ކުރަން ކަމަށް ބުނެ އެ މަޝްރޫއު ހުއްޓުމަކަށް ގެނައުން ކަމަށެވެ.

ހަަމަ އެއާއެކު ހިޔާ ފްލެޓުތައް ބަހާފައިވަނީ ނުހައްގުން ކަމަށް ބުނެ، ފްލެޓު ކޮމެޓީއެއް އުފައްދަވައި އެ ކޮމެޓީން ފްލެޓުތައްް ދިނުމުގެ އުސޫލުތައް ގަޑުބަޑުކޮށް، ލިޔުންތައް މަސްހުނިކޮށް، ޝަކުވާ ހުށަހެޅުމުގެ ފުރުސަތު ނުދީ އާންމުން ‘ތަޅުވަތަޅުވާ’ 2 އަހަރުގެ ވަގުތު ނަގާލުމަށް ފަހު، ނެރުނު ފްލެޓު ލިބޭ މީހުންގެ ލިސްޓާއި 2018 ވަނަ އަހަރު ކުރީީގެ ރައީސް ޔާމީނު އަބްދުލްގައްޔޫމް ގެ ސަރުކާރުން ނެރުނު ލިސްޓާއި ހުރީ %12 ގެ ތަަފާތެއް އެ ޖަމިއްޔާ އިން ފާހަގަކޮށްފައިވެއެވެ.

އަދި އެވީ ދެ އަހަރު ތެރޭގައި ހިޔާ 2500 ފްލެޓުގެ މަޝްރޫއު އަދި ހިޔާ 1 ކޮޓަރީގެ 1000 ފްލެޓުގެ މަޝްރޫއު ސަރުކާރުން ބާތިލް ކޮށްފައިވާ ކަމަށްވެސް އެ ޖަމިއްޔާ އިން ބުނެފައިވެއެވެ.

"އެތައް ހާސް ބައެއްގެ ފްލެޓުތައް ސިޔާސީ ސަބަބުތަކަށްޓަކަައި ފޭރިގަތްއިރު، ބާތިލް ކުރެވެން އަދި ތަޅާލެވެންވެސް ނެތް ހިޔާ 2 ކޮޓަރި 7،000 ޔުނިޓު އާންމުންނާއި ހަވާލު ކުރުން ސަރުކާރުން ދިޔައީ ލަސްކުރަމުންނެވެ. ކަމަާއިގުޅޭ ވަޒީރު އަސްލަމް އަންނަމަސް އަންނަމަސް ވިދާޅުވަމުން އަހަރެއްވަންދެން ހިޔާ ފްލެޓުވެރިން ޖިސްމާނީ އުދަގޫތަކާއި ނަފްސާނީ ވޭނެއްގައި ތެޅުވިއެވެ."

"ހިޔާ ފްލެޓުތައް ނުދީ ލަސްކުރަމުންގޮސް، ގުރުލާން ފެށީ ލޯކަލް ކައުންސިލް އިންތިހާބަށް އެއް ދުވަހަށް ވީމައެވެ." އާއްމުންގެ އެކުވެރި ޖަމިއްޔާއިން ނެރުނު ބަޔާނުގައި ބުނެފައިވެ އެވެ.

އަދި ފިނިޝިން ނިންމައި 5،600އަށް ދޭން ނިންމި ފްލެޓްތައް 7،000 ރުފިޔާއަށް ބޮޑު ކޮށް ފިނިޝިން ނުވެސް ނިންމައި ކޮވިޑްގެ ހާލަތުގައި ރައްޔިތުން ދަރަނީގެ އަނދަވަޅަކަށް ވައްޓާލީވެސް މި ސަރުކާރުން ކަމަށް ޖަމިއްޔާގެ ބަޔާނުގައި ބުނެފައިވެއެވެ.

"ތަނަށް މީހުންވަދެ އާންމު ބަސްހިދުމަތްތަކުން ފެށިގެން މިއަދާއި ހަމަޔަށް ކުރަން ޖެހުނު ހުރިހާ އަސާސީ ކަންތަކެއް ކުރުވީ ފްލެޓުވެރިން ނިކުމެ އެކަމަށް އަޑު އުފުލައިގެނެވެ. ބަހުގެ ހިދުމަތް ފެށީ ހާލުގައި އުޅުނު މީހުންގެ ވީޑިއޯ ހެދީމައެވެ. ކުނި އުކައި ސައިޓު ސާފު ކުރީ އާންމުން ނިކުމެއެވެ. 4 އަހަރުން ހެދި ވަގުތީ މިސްކިތް ދާއިމީ ވެެއްޖެއެވެ. 4 އަހަރުން ހެދުނު މަދަރުސާގެ ފެންވަރާއި ހިދުމަތަށް ރިއާޔަތްކޮށް ފްލެޓުވެރިން އެތަނަށް ކިޔައި އުޅެނީ ‘ޓިނު މަދަރުސާ’ އެވެ." އާއްމުންގެ އެކުވެރި ޖަމިއްޔާއިން ބުނެފައިވެއެވެ.

އެ ހުރިހައި ކަމަކީވެސް މި ސަރުކާރުން ފްލެޓުވެރިން ނިކަމެތި ކޮށް، ފްލެޓުވެރިންނަށް ހިޔާގައި އުޅުމަކީ ތަކުލީފަކަށް ހެެދުމަށް ކުރި ކަންކަން ކަމަށްވެސް އެ ޖަމިއްޔާ އިން ބުނެއެވެ.

އެ ޖަމިއްޔާ އިން އިތުރަށް ބުނީ، އެ އެންމެހައި ކަންކަން އެގޮތަށް ކުރުމަށްފަހު، އިންތިހާބު ބޯމަތިވީމައި، ރައީސް ޞާލިހު ގެ ހެޔޮފުޅުކަމުން ކުލި ‘ކުޑަކުރަން’ އުޅޭކަމަށް ބުނެ ވިއްކަން އުޅޭ ސިޔާސީ ޕޯސްޓަރު ބަލައިގަންނަ ވަރަށްވުރެ ފްލެޓުވެރިން ތަހުޒީބު ކަމަށާ، އިންތިހާބަށް ކުއްޔަށް ބަދަލު ގެންނަން ޖެހޭނެކަން، އެއީ ރައީސް މީހާޔަށް އޮތް އޮޕްޝަނެއް ނޫންކަން އެނގޭވަރަށް ފްލެޓުވެރިން ތިބީ ސިޔާސީ ކަންކަމަށް ލޯހުޅިވިފައި ކަމަށެވެ.

މި ހުރިހާކަމެއް މިހެން ހުރުމާއިއެކު ރިޔާސީ އިންތިހާބާއި ދިމާކޮށް އަދި ހުޅުމާލެއިން ގޯތިތަކެއް ހިލޭ ބަހަން ސަރުކާރުން ނިންމާފައިވާ ދަނޑިވަޅެއްގައި ހިޔާ ފްލެޓްތަކުގެ ކުލި ކުޑަކުރަން ސަރުކާރާއިއެކު މަޝްވަރާއަކަށް ނުދާނެ ކަމަށް ޖަމިއްޔާއިންވަނީ ބުނެފައެވެ.

ރިޔާސީ އިންތިހާބު ބޯމަތިވެފައިވަނިކޮށް ހިޔާ ފްލެޓްތަކުގެ ކުލި ކުޑަކުރުމުގެ މަޝްވަރާތައް ސަރުކާރުން ފަށާފައިވާއިރު މީގެ ކުރިން ސަރުކާރުން ބުނަމުންއައީ ހިޔާ ފްލެޓްތަކުގައި ދިރިއުޅޭ ރައްޔިތުން އެދޭ އަދަދަށް ކުލި ކުޑަކޮށްދެވެން ނެތް ކަމަށެވެ.

ހިޔާ ފްލެޓްތަކުގެ ކުލި ކުޑަކޮށްދިނުމަށް ގޮވާލައި ފްލެޓްތަކުގައި ދިރިއުޅޭ ރައްޔިތުން އޭރު ވަނީ ސިލްސިލާ މުޒާހަރާތަކެއްވެސް ކޮށްފައެވެ.