މިވަގުތުގެ ޓާގެޓަކީ އަދި 3000 މެމްބަރުން ހަމަކުރުން: ދަ ޑިމޮކްރެޓްސް
އެމްޑީޕީގެ ފިކުރެއްގެ ދިރުން ގޮފިން އުފައްދާފައިވާ ސިޔާސީ ޕާޓީ "ދަ ޑިމޮކްރެޓްސް" ގެ މިވަގުތުގެ ޓާގެޓަކީ އަދި 3000 މެމްބަރުން ހަމަކުރުން ކަމަށް އެ ޕާޓީން ބުނެފިއެވެ.
ހ. މައިޒާންދޮށުުގޭގައި މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ޕާޓީގެ ތަރުޖަމާނު ފާތިމަތު އަފްޝަން ލަތީފް ވިދާޅުވީ މިވަގުތު މެމްބަރޝިޕް ފޯމުތައް ފުރަމުން ނުދާ ކަމަށާއި އިލެކްޝަންސް ކޮމިޝަނަށް ހުށަހަޅާފައި ވަނީ ޕާޓީ ރަޖިސްޓްރީ ކުރުމުގެ ހުއްދަ ހޯދުމަށް ކަމަށެވެ. އަދި މެމްބަރުން ސޮއިކުރުމުގެ މަސައްކަތް ކުރިއަށް ދާނީ އޭގެ ފަހުން ކަމަށް އަފްޝަން ވިދާޅުވިއެވެ.
"އަޅުގަނޑުމެންނަށް މެމްބަރޝިޕް ފޯމު ފުރޭނީ އެ ހުއްދަ ލިބިގެން. އެހެންމަ އެހިސާބަށް އަޅުގަނޑުމެން މެމްބަރޝިޕް ފޯމު ފުރުމުގެ މަސައްކަތް މިއޮތީ ހުއްޓާލާފަ. ނަމަވެސް އެކަން މަޑުޖެހިފަ އޮތް ކަމުގަވީނަމަވެސް އަޅުގަނޑުމެން ވީހާވެސް ގިނަ ވޮލެންޓިއަރުން މިހާރުވެސް ރަޖިސްޓަރ ކުރަމުން އެބަ ގެންދަން" އަފްޝަން ވިދާޅުވިއެވެ.
މީގެ އިތުރުން އަފްޝަން ވިދާޅުވީ ރަޖިސްޓަރ ކުރަން ބޭނުންވާ ވޮލެންޓިއަރުންނަށް މިހާރުވެސް އެ ފުރުސަތު އޮތް ކަމަށާއި އެ ފަރާތްތަކަށް މާލޭގައި ނަމަ ރަޖިސްޓްރީ ކުރުމުގެ މަސައްކަތް ބޮޑުފެންވަޅުގޭގައި ކުރިއަށް ދާނެ ކަމަށެވެ. އަދި ރަށްރަށުގައި ޖަގަހަ ތަކުގައި އެ މަސައްކަތް ކުރިއަށް ދާނެ ކަމަށެވެ.
ޕާޓީ ރަޖިސްޓަރ ކުރުމުގެ ހުއްދަ ވީހާވެސް އަވަހަށް ދޭނެ ކަމަށް އީސީން ބުނެފައިވާ ކަމަށާއި ހުއްދަ ދިނުމާއެކު މެމްބަރުން ސޮއިކުރުމުގެ މަސައްކަތް ފަށާނެ ކަމަށް އަފްޝަން ވިދާޅުވިއެވެ. އަދި މިވަގުތުގެ ޓާގެޓަކީ ބަރާބަރު 3000 ފޯމު ހަމަކުރުން ކަމަށާއި އިތުރު މެމްބަރުން ސޮއިކުރުމުގެ މަސައްކަތް އޭގެ ފަހުގައިވެސް ކުރިއަށް ދާނެ ކަމަށް އަފްޝަން ފާހަގަ ކުރެއްވިއެވެ.
އެމްޑީޕީގެ ފިކުރެއްގެ ދިރުމުގެ ގޮފީގެ އައު ސިޔާސީ ޕާޓީ އުފައްދަން ބޭނުންވާ ހުއްދައަށް އެދި އިލެކްޝަންސް ކޮމިޝަނަށް ފޯމު ހުށަހަޅާފައި ވަނީ އާދީއްތަ ދުވަހުއެވެ.
ދި ޑިމޮކްރެޓްސް އިން ރެޖިސްޓްރީ ކުރުމަށް އިލެކްޝަންސް އަށް ހުށަހަޅާފައިވާއިރު، އެ ޕާޓީން މިއަހަރުގެ ރިޔާސީ އިންތިހާބުގައި ވާދަކުރަންވެސް ވަނީ ނިންމާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
