މި ހުކުރު ފަސޭހައިން ތައްޔާރު ކޮށްލެވޭ ސްޕެގެޓީ އާލިއޯ އޯލިއޯ ކިހިނެއް ވާނެ؟

ހުކުރު ދުވަހަކީ ބޮޑުކޮށް ކެއްކުމުގެ ދުވަހެއް ނަމަވެސް ބައެއް ފަހަރު ތަންކޮޅެއް ފަސޭހަ، މީރު އެއްޗެއް ތައްޔާރު ކޮށްލުމަކީ ކޮށްލަން ރަނގަޅު ކަމެކެވެ. އެހެންކަމުން، މި ހުކުރު 'ވޮއިސް' ގެ ބަދިގެއިން މި ގެނެސްދެނީ ފަސޭހައިން ތައްޔާރު ކޮށްލެވޭ އާލިއޯ އޯލިއޯ ތައްޔާރުކުރާނެ ގޮތެވެ.

ބޭނުންވާ ތަކެތި

2 ޖޯޑު ކުދިކޮށް ކޮށާފައި ހުރި ރޯ މަސް

10 ބޮޑު ލޮނުމެދު (ކުދިކޮށް ކޮށާފައި)

10 ހިކިމިރުސް (ނޫނީ ބޭނުން ވަރަކަށް)

2 ސައިސަމުސާ ލޮނު (ސްޕެގެޓީ ކައްކަން)

ސްޕެގެޓީ ބޮނޑިއެއް

1/2 ޖޯޑު އޮލިވް އޮއިލް

1 ނޫޑްލްސް ސޫޕް ޕެކެޓް

ހިކަނދި ފަތް

ފެން

1/2 ސައި ސަމުސާ އަސޭމިރުސް

ތެޔޮ (މަސް ކޮޅު ތެލުލަން)

ތައްޔާރުކުރާނެ ގޮތް

1) ލޮނުކޮޅަކާއި އަދި އަސޭމިރުސް ލައިގެން މަސްކޮޅު 5 މިނެޓް ވަރު ވަންދެން މެރިނޭޓް ކޮށްލާށެވެ. ދެން ތެޔޮ ފޮދުގެ ތެރޭގައި މަސްކޮޅު ތެލުލާލާށެވެ.

2) އެއަށްފަހު، ފެނާއި، ލޮނާއި، ކުޑަ ތެޔޮ ފޮދެއް އަޅައިގެން ފެން އެތި ކައްކާލާށެވެ. ފެން ކެކެން ފެށުމުން ސްޕެގެޓީ ކޮޅު އަޅާލައިގެން ސްޕެގެޓީ މަޑު ވަންދެން ކައްކާލާށެވެ.

3) ބޮޑު ތެއްޔަކަށް އޮލިވް އޮއިލްކޮޅު އަޅާ ހޫނު ކުރާށެވެ. ތެޔޮ ހޫނު ވީމައި ލޮނުމެދުކޮޅު އަޅާށެވެ. ލޮނުމެދުކޮޅަށް ރަންކުލަ އަރައި ކުޑަކޮށް މުރަނަ ވަންދެން މެދު ގިނީގައި ކައްކާށެވެ. ދެން ހިކަނދިފަތާއި ހިކިމިރުސް އަޅާފައި 2-3 މިނިޓުވަންދެން އަނެއްކާވެސް ކައްކާލާށެވެ. ކައްކަމުން ދާއިރު ގެންދަންވާނީ ހުރިހާ އެއްޗެއް އެއްކުރަމުންނެވެ.

4) ދެން، ތެލުލާފައި ހުރި ރޯމަސްކޮޅާއި ނޫޑްލްސް ސޫޕް ކޮޅު އެ ތެއްޔަށް އަޅާފައި ރަނގަޅަށް އެއްކޮށްލާށެވެ. ދެން 2 މިނިޓުވަރު ހުރިހާ އެއްޗެއް އެއްކުރަމުން ކައްކާލާށެވެ.

5) ފަހު ކަމަކަށް، ސްޕެގެޓީކޮޅު ތެއްޔަށް އަޅާ އެއްކޮށްލާށެވެ. އެއަށްފަހު 2 މިނެޓް ވަރު ކައްކާލާށެވެ.

އާލިއޯ އޯލިއޯ އެހުރީ ތައްޔާރު ވެފައެވެ.

ނޯޓް: ރޯމަސް ނެތް ނަމަ ވަޅޯމަސް ވެސް ބޭނުން ކޮށްލެވިދާނެއެވެ.