ޓައިޓަން އިން ދަތުރުކުރި އެންމެން ކަނޑު އަޑީގައި މަރުވެފައިވާކަމަށް ބުނެފި!

މީގެ 111 އަހަރު ކުރިން ފެތުނު އާރް.އެމް.އެސް ޓައިޓޭނިކް ކައިރިއަށް ފަތުރުވެރިންނާ އެކު ފީނި ޓައިޓަންގެ ނަން ދީފައިވާ ކުޑަ ސަބްމެރިންގައި ދަތުރުކުރި ފަސް މީހުން މަރުވެފައިވާ ކަން ކަށަވަރު ކުރެވިފައިވާ ކަމަށް ބޭރުގެ މީޑިއާ ތަކުން ރިޕޯޓް ކޮށްފިއެވެ.

އޯޝަންގޭޓް އެކްސްޕެޑިޝަންސް ކިޔާ ކުންފުންޏަކުން އޮޕަރޭޓްކުރާ އެ ސަބްމެރިން މީގެ ފަސް ދުވަސް ކުރިން ކެނެޑާގެ އިރުދެކުނު ފަރާތަށް ގެއްލި، އުޅަނދުގެ ޚަބަރު ހުސްވިއިރު އޭގައި ޕައިލެޓުގެ އިތުރުން ހަތަރު ފަތުރުވެރިން ތިއްބެވެ.

އެކަމާއި ގުޅިގެން މިހާތަނަށް ހޯދުނު ހޯދުން ތަކުން ކަށަވަރުވެފައިވާ ގޮތުގައި، އުޅަނދު "އިމްޕްލޯޝަނެއްގެ" ސަބަބުން ވަނީ ގޮވާފައެވެ. އަދި އެ އުޅަނދުގެ ބައިތައްވެސް ފެނިފައިވާއިރު، އެތަކެތި ފެނިފައި ވަނީ ޓައިޓޭނިކާ 1,600 ފޫޓު ދުރުން ކެނެޑާގެ ކޯސްޓްގާޑުގެ ރޮބޮޓިކް ސަބްމެރިނަކަށް ކަމުގައި މީޑިއާ ރިޕޯޓްތައް ބުނެއެވެ.

އެގޮތުން ފެނިފައިވާ ތަކެތީގެ ތެރޭގައި، އުޅަނދުގެ ފަހަތްކޮޅު ވެސް ހިމެނޭ ކަމަށް މިޑީއާ ރިޕޯޓްތައް ބުނާއިރު، އޭގައި ދަތުރުކުރި ފަސް މީހުންގެ ތެރެއިން އެއްވެސް މީހެއްގެ ހަށިގަނޑު ފެނިފައިވާ ކަން އަދި ކަށަވަރެއް ނޫނެވެ. ނަމަވެސް އެމެރިކާގެ ކޯސްޓްގާޑުން ބުނެފައި ވަނީ ސަބްމާސިބަލް ދަތުރު ކުރި މީހުންގެ ހަށިތައް ފެނޭތޯ އަދިވެސް މަސައްކަތް ކުރަމުން ގެންދާނެ ކަމަށެވެ.

މި ހާދިސާގައި މަރުވެފައި ވަނީ އިނގިރޭސިވިލާތުގެ ބިލިޔަނަރެއް ކަމުގައިވާ ހޭމިޝް ހާޑިންގާއި، ޕާކިސްތާނުގެ ވިޔަފާރިވެރިއެއް ކަމުގައިވާ ޝާހުޒާދާ ދާވޫދާއި އޭނާގެ ދަރިފުޅު ސުލައިމާން ދާވޫދާއި، ފަރަންސޭސިވިލާތުގެ ދިރާސާކުރާ މީހެއް ކަމުގައިވާ ޕޯލް-އޮންރީ ނާގޮލޯއެވެ. ސަބްމެރިން ދުއްވަން އިން ޕައިލެޓަކީ އޯޝަންގޭޓް ކުންފުނީގެ ބާނީ އަދި ސީ.އީ.އޯ ސްޓޮކްޓަން ރަޝްއެވެ.