"މި ވެރިކަން ބަދަލު ކުރަން ވާހަކަދައްކަން ޖެހޭ ބަޔަކާއެކީގައި ވާހަކަ ދައްކަން ރައީސް ޔާމީން އަންގަވައިފި"

މި ވެރިކަން ބަދަލުކުރަން ވާހަކަ ދައްކަން ޖެހުނު ކޮންމެ ބަޔަކާއެކީ ވާހަކަ ދެއްކެވުމަށް އިދިކޮޅު ލީޑަރު އަދި ކުރީގެ ރައީސް އަބްދުالله ޔާމީން އަބްދުލްގައްޔޫމް، އިދިކޮޅު ޕީޕީއެމް-ޕީއެންސީ ކޯލިޝަނުގެ ލީޑަޝިޕަށް އަންގަވާފައިވާ ކަމަށް، އިދިކޮޅު ކޯލިޝަން ހިންގެވުމާ ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله (އަދުރޭ) ވިދާޅުވެއްޖެ އެވެ.

ރޭ ޕީޕީއެމުން ބޭއްވި ޖަގަހަ ޖަލްސާގައި ވާހަކަދައްކަމުން އަދުރޭ ވިދާޅުވީ މިއަދު ވެރިކަމުގައި ތިއްބެވި ބޭފުޅުންނަކީ އެއްވެސް ކުލުނެއް ނެތް ބައެއް ކަމަށެވެ. އަދި އެވެރިން ރައްޔިތުންނަށް އިހްތިރާމް ނުކުރައްވާ ކަމަށާ، ރައްޔިތުންވެސް ވެރިންނަށް އިހްތިރާމް ނުކުރައްވާ ކަމަށެވެ.

ގައުމުގައި ހަމަޖެހުމައް އޮތީއެއް ނޫން. ސުލްހަވެރިކަމެއް އޮތީއެއް ނޫން. އެކުވެރިކަމެއް އޮތީއެއް ނޫން. އެއްބައިވަންތަ ކަމެއް އޮތީއެއް ނޫން.

އަބްދުއްރަހީމް އަބްދުالله

ކަން މިހެން ހުރުމުން ކޮންމެ ގޮތަކުން ނަމަވެސް މި ވެރިކަން ބަދަލުކޮށް، މި ކަމުން ސަލާމަތްވާން ޖެހޭ ކަމަށް އަދުރޭ ވިދާޅުވިއެެވެ. އަދި މި ވެރިކަން ބަދަލުކުރަން ޖެހެނީ ހަމައެކަނި ޕީޕީއެމް/ ޕީއެންސީއަށް ޓަކައި ނޫން ކަމަށާ، އެއީ މުޅި ދިވެހިރާއްޖޭގެ ލާބައާއި މަންފާއަށްވެސް ކުރަންޖެހޭ ކަމެއް ކަން ފާހަގަކުރައްވައި އަދުރޭ ވިދާޅުވީ، އެކަން ކުރެވޭނީ މި ވެރިކަން ބަދަލު ކުރުމުގެ ރޫހުގައި ތިބި އެންމެނާއި ގުޅިގެން މަސައްކަތް ކޮށްގެން ކަމަށެވެ.

އެހެންކަމުން، ކުރިއަށް އޮތް ދުވަސްތަކުގައި އިދިކޮޅު ލީޑަޝިޕްގެ ބޭފުޅުން ޕީޕީއެމްގެ މެމްބަރުން ވަރަށް ހިތްހަމަނުޖެހޭ ބޭފުޅުންނާއެކު ވާހަކަދައްކަން ތިއްބާ ވެސް ފެނިދާނެ ކަމަށާއި، ގަބޫލު ކުރަން ޖެހޭ ހަގީގަތަކީ އަމިއްލަ މަސްލަހަތަށް ވުރެ ގައުމުގެ މަސްލަހަތު އިސްކުރަންޖެހޭ ކަމަށެވެ.

އަދުރޭ ވިދާޅުވީ، މި ވެރިކަން ބަދަލުކުރަން ޕީޕީއެމްގެ އޮޑިއަށް ލާންޖެހޭ ކޮންމެ ފަޅުވެރިއެއް ވެސް ލުމުގެ އިހުތިޔާރު އާންމު މެމްބަރުން ދޭންޖެހޭ ކަމަށާއި ޔާމީން ވެސް ބޭނުންފުޅުވާ ކަމަކީ އެއީ ކަމަށް އަދުރޭ ވިދާޅުވި އެވެ.

"އެންމެފަހުން އެމަނިކުފާނު އަޅުގަނޑުމެންނަށް ދެއްވި ލަފާފުޅަކީ މި ވެރިކަން ބަދަލުކުރުމަށްޓަކާ، ރާއްޖެ އަށް އަމާންކަމާއި ހަމަޖެހުން ހޯދުމަށްޓަކާ، ގާނޫނާ ގަވާއިދުތަކާ އެއްގޮތަށް ހިނގާ ވެރިކަމެއް ގާއިމުކުރުމަށްޓަކާ، ދިވެހި ރައްޔިތުންގެ މާދަމާގެ މުސްތަގުބަލު އުޖާލާކުރުމަށްޓަކާ ވާހަކަދައްކަންޖެހޭ ކޮންމެ ބަޔަކާއެކީގައި ވާހަކަ ދައްކައިގެން މިކަންކޮށްދޭށޭ، ކުރަމުންގެންދާށޭ. މި ވެރިކަން ބަދަލުކުރުމުގެ މަސައްކަތްތައް ކުރާށޭ،"

އަބްދުއްރަހީމް އަބްދުالله

އަދުރޭ އިތުރަށް ވިދާޅުވީ ޕީޕީއެމުން ކޮންމެ ބަޔަކާއެކީ ވާހަކަ ދެއްކި ނަމަވެސް ޔާމީންގެ ސިޔާސަތު ފަހަނައަޅާ ނުދާނެ ކަމުގެ ޔަގީންކަން އަރުވާ ކަމަށެވެ. އަދި އެއްބަސްވުމެއް ހެދިޔަސް ހަދާނީ އެ އުސޫލުތައް ގަބޫލުކުރާ ބަޔާއެކު ކަމަށްވެސް ވިދާޅުވި އެވެ.

"މިފަހަރު މިއީ ޕީޕީއެމްގެ ފަހަރެއް ނޫން. މިއީ ދިވެހި ރައްޔިތުންގެ ފަހަރު. ދިވެހި ގައުމުގެ ފަހަރު. ދިވެހި ގައުމުގެ ފަހަރަށް، ދިވެހި ރައްޔިތުންގެ ފަހަރަށް މިފަހަރު ހަދައިދެވެން އޮތީ ޕީޕީއެމް-ޕީއެންސީ އަށް،" އަދުރޭ ވިދާޅުވިއެެވެ.