ބައި-އިލެކްޝަންތަކުން ފެނުނީ ރައްޔިތުން ބަދަލަކަށް ބޭނުންވެފައިވާ މިންވަރު: މުހައްމަދު އިސްމާއިލް

ނިމިދިޔަ ބައި-އިލެކްޝަންތަކުގެ ނަތީޖާއިން ފެނިގެން ދިޔައީ ރައްޔިތުން ބަދަލަކަށް ބޭނުންވެފައިވާ މިންވަރުކަމަށް އިދިކޮޅު ކޯލިޝަންގެ އެކްޝަން ޑިޕާރޓުމަންޓުގެ ޗެއަރ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވެއްޖެއެވެ.

މުހައްމަދު އިސްމާއިލް މިފަދައިން ވިދާޅުވެފައިވަނީ ޕީޕީއެމް އޮފީހުގައި ބޭއްވި ޖަގަހަ ޖަސްލާގައި ވާހަކަދައްކަވަމުންނެވެ.

މުހައްމަދު އިސްމާއިލް ވިދާޅުވީ ނިމިދިޔަ ބައި-އިލެކްޝަންތަކުގައި ޕީޕީއެމް ހޯދި ނަތީޖާއާއި ދޭތެރޭގައި ހިތްހަމަ ޖެހޭ ކަމަށާއި، އެ ނަތީޖާތައް ބުނެދެނީ މި ސަރުކާރުން ކުރާ ނޭންގާނީ ކަންކަން ރައްޔިތުން ބަލައިނުގަންނަކަން ކަމަށެވެ.

"ތަފާތު އެކި އެކި ބައި-އިލެކްޝަންތައް ބޭއްވިގެން ހިނގައްޖެ. އަޅުގަނޑުމެންނަށް ލިބުނު ނަތީޖާ ގޯހެއް ނޫން. އަޅުގަނޑުމެންނަށް ލިބުނު ނަތީޖާ ރަނގަޅު. ރައްޔިތުން ބަދަލުތަކެއް ބޭނުންވާކަން، މި އޮތް ޖައްބާރު ވެރިކަމުން ކުޅަ މަސައްކަތްތައް ކުރަމުންދާއިރު، އެކަންކަން ރައްޔިތުން ގަބޫލު ނުކުރާކަން، އެ މެސެޖު ލިބޭ" މުހައްމަދު އިސްމާއިލް ވިދާޅުވިއެވެ.

އެ ވާހަކަތަކާއި ގުޅުވާ މުހައްމަދު އިސްމާއިލް ވިދާޅުވީ އިންތިޚާބު ކާމިޔާބުކުރުމަށް އަދި ގިނަ މަސައްކަތްތަކެއް ކުރަން ޖެހޭކަމަށެވެ.

މިހާރުގެ ސަރުކާރުން އިންތިޚާބުތައް ކާމިޔާބުކުރުމަށް މިހާރުވެސް ގިނަ ކަންތައްތަކެއް ބަދަލުކުރާ ވާހަކަ ދައްކަމުން އަންނައިރު، ރައްޔިތުން ބޭނުންވާ ބަޔަކު ވެރިކަމަށް ގެނައުމުގެ ބާރު އޮތީ ރައްޔިތުންގެ އަތްމަތީގައިކަމަށް އޭނާ ވިދާޅުވިއެވެ.

"އެކި ދިމަދިމާލުން އިވޭ އަޑުތަކަށް ބަލާއިރު ބަރުލަމާނީ ގެންނަ ވާހަކަ ދައްކަފާނެ، އީ ވޯޓު ސިސްޓަމެއްގެ ވާހަކަ ދައްކަފާނެ، އެންމެ ގިނަ ވޯޓު ލިބޭ މީހާއަށް ވެރިކަމަށް އާދެވޭގޮތަށް ގާނޫނު ބަދަލުކުރާ ވާހަކަ ދައްކަފާނެ. އެކަން އޮތީ އަޅުގަނޑުމެންގެ އަތްމަތީގައި" މުހައްމަދު އިސްމާއިލް ވިދާޅުވިއެވެ.

ވެރިކަން ފެށިގެން އަންނަނީވެސް އަދި ވެރިކަން ދެމި އޮންނަނީވެސް ރައްޔިތުންގެ ކިބައިގައިކަން މުހައްމަދު އިސްމާއިލްގެ ވާހަކައިގައި ހަނދާން އާކޮށްދެއްވިއެވެ.

އެއަށްފަހު އޭނާ ވިދާޅުވީ ރައީސް ޔާމީންއަށް ދެވަނަ ދައުރެއް ދިނުމަށް މި ސަރުކާރު ގަބޫލުވާނެކަމަށް ރައްޔިތުން ދެކިގެން ނުވާނެކަމަށެވެ. އެހެން ނަމަވެސް ހާލަތު ބަދަލުކުރުމަށް އިދިކޮޅާއި ގުޅިގެން ރައްޔިތުން މަސައްކަތް ކުރަން ތިބި، ރައީސް ޔާމީން ދެވަނަ ދައުރަކަށް ވަޑައިގެން މި ގައުމުގެ ކަންކަން ހަމަ މަގަށް އަޅުއްވާދެއްވާނެކަމުގެ ޔަގީންކަން އޮތްކަމަށް އޭނާ ވިދާޅުވިއެވެ.

ނިމިދިޔަ ބައި-އިލެކްޝަންގެ ނަތީޖާތަކާއި މެދު ހިތްހަމަޖެހިލައްވާކަމަށް މުހައްމަދު އިސްމާއިލް ވިދާޅުވެފައިވާއިރު، ބައި އިލެކްޝަންތަކާއި ދިމާކޮށް ސަރުކާރުން ބޮޑެތި ޚަރަދުތައް ކުރަމުންދާކަންވެސް އިދިކޮޅުން ފާހަގަކުރެއެވެ. އަދި އިންތިޚާބުތަކާއި ދިމާކޮށް ކުންފުނިތަކުން ވަޒީފާތައް ދީ، ބޮޑެތި ކޮރަޕްޝަން ހިންގާކަމަށްވެސް އިދިކޮޅުން ގެންދަނީ ތުހުމަތުކުރަމުންނެވެ.