އަލަމްގިރްގެ މައްޗަށް އުފުލި 40 ދައުވާގެ ޝަރީއަތް މާދަމާ ފަށަނީ

އެއްޖިންސުން ގުޅުން ހިންގިކަން ސާބިތުވުމާއި ގުޅިގެން ޖަލު ހުކުމް ތަންފީޒުކުރަމުން އަންނަ ބަންގްލަދޭޝްގެ ރައްޔިތެއްކަމަށްވާ އެމްޑީ އަލަމްގިރީގެ މައްޗަށް އުފުލާފައިވާ 40 ދައުވާގެ ޝަރީއަތް މާދަމާ ފެށުމަށް ކްރިމިނަލް ކޯޓުން ތާވަލު ކޮށްފިއެވެ.

ޕީޖީ އޮފީހުން, ބަނގްލަދޭޝް ރައްޔިތެއްކަމަށްވާ އެމްޑީ އަލަމްގިރްގެ މައްޗަށް، ދިވެހިރާއްޖޭގެ ޤާނޫނުލްޢުޤޫބާތުގެ 622 ވަނަ މާއްދާގެ (ހ) ގެ 7 ވަނަ ނަންބަރާ ޙަވާލާދީ، އެމާއްދާގެ (ބ) ގެ 2 ވަނަ ނަންބަރުގެ ދަށުން، އޮރިޔާން ކާޑު ހެދުމުގެ ކުށުގެ 40 (ސާޅީސް) ދަޢުވާ 17 ސެޕްޓެންބަރު 2022 ދުވަހު ކްރިމިނަލް ކޯޓަށް ހުށަހަޅާފައި ވެއެވެ.

މި ދައުވާގެ ޝަރީއަތް މާދަމާ ހެނދުނު 10:00 ތާވަލް ކޮށްފައި ވާ އިރު ޝަރީއަތުގެ އެ އަޑުއެހުން ކުރިއަށް ގެންދާނީ ސިއްރު ކޮށްގެންނެވެ.

އަލަމްގިރީގެ މައްސަލަ ފުލުހުން ބަލަން ފަށާފައިވަނީ އޭނާ އެތައް ބަޔަކާއެކު އެއްޖިންސުން ގުޅުން ހިންގާ މަންޒަރު ފެނިގެންދާ ވީޑިއޯތަކެއް ސޯޝަލް މީޑިއާގައި އާންމުވުމާއި ގުޅިގެންނެވެ.

އެ ވީޑިއޯތަކުގައި އަލަމްގިރި ރާއްޖޭގެ މަޝްހޫރު ސިޔާސީ ފަރާތްތަކާ ހައިޕްރޮފައިލް ފަރާތްތަކާއެކު އެއްޖިންސުން ގުޅުން ހިންގާތަން ފެނިގެންދެއެވެ. މީގެ އިތުރުން ވެސް އޭނާ އާއިއެކު އެއްޖިންސުން ގުޅުންހިންގި މީހުންގެ ތެރޭގައި ދިފާއީ ބާރުތަކުގައި މަސައްކަތް ކުރާ ފަތާތްތަކާއި، ސަރުކާރުގެ އެކި އިދާރާތަކުގެ އިތުރުން ބައެއް ސުކޫލުތަކުގެ މުދައްރިސުންވެސް ހިމެނެއެވެ.

އެ މައްސަލައާއި ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރުގެ މައްޗަށް ވަނީ 3 މަސް ދުވަހުގެ ގޭ ބަންދުގެ ހުކުމެއް ކޮށްފައެވެ. އަދި އެ މައްސަލައިގައި ޝާމިލުވާ ފުލުހެއް ކަމަށްވާ އަބްދުއްރަހްމާން ރަފީއު އެއް އަހަރާއި ދެމަހަށް ޖަލަށް ލާން ހުކުމް ކޮށްފައިވާއިރު, އިތުރު ބައެއް މީހުންގެ މައްޗަށްވެސް ވަނީ ދައުވާކޮށްފައެވެ.

އާންމު ވީޑިއޯތަކާއި ގުޅިގެން އަލަމްގިރި ފުލުހަށް ހާޒިރުކޮށް ހިންގި ތަހުގީގަށް ދިން ބަޔާނުގައި އޭނާވަނީ 50އަށްހުރެ ގިނަ މީހުންނާއެކު އެއްޖިންސުން ގުޅުން ހިންގިކަމަށާއި، އޭގެ ތެރެއިން 40 އަށް ވުރެ ގިނަ މީހުންނާއެކު އެއްޖިންސުން ގުޅުން ހިންގި ވަގުތު ވީޑިއޯކުރިކަމަށް އިއުތިރާފުވެފައެވެ.

އެހެން ނަމަވެސް އެ ވީޑިއޯތައް ބޭނުންކޮށްގެން އެއްވެސް މީހަކު ބްލެކްމެއިލް ކުރަން މަސައްކަތްކޮށްފައި ނުވާނެކަމަށް އަލަމްގިރި ވަނީ ބުނެފައެވެ. އަދި އެ ވީޑިއޯތައް ހެދީ އޭނާ ގެންގުޅުނު ފޯނެއް ބޭނުންކޮށްގެންކަމަށާއި، އެފަހުން އެ ފޯނުގައި ހުރި ވީޑިއޯތައް ޑިލީޓުކޮށްފައިވާނެކަމަށް އަލަމް ގިރި ވަނީ ބުނެފައެވެ.

އޭގެ އިތުރުން އަލަމްގިރި ބުނީ އޭނާ ނާޒިމް ސައްތާރާއެކު އެއްޖިންސުން ގުޅުން ހިންގާތަން ފެންނަ ވީޑިއޯ ސޯޝަލް މީޑިއާގައި އާންމުވުމާއި ގުޅިގެން، އޭނާގެ ފޯނު އޮތްތޯ ބެލިއިރު، އެ ނެތް ކަމަށާއި، ވީޑިއޯތައް ބޭނުންކޮށްގެން ބަޔަކު ބްލެކްމެއިލްކުރީ ފޯނު ވަގަށް ނެގި ފަރާތުން ކަމަށް ބެލެވޭކަމަށެވެ.

ބްލެކްމެއިލްކުރި މައްސަލައާއި ގުޅިގެން ފުލުހުންގެ އޮފިސަރެއްވެސް ވަނީ މުސާރަ ލިބޭގޮތަށް ސަސްޕެންޑުކޮށްފައެވެ. އެމީހާއަކީ އަލަމްގިރި ދިރިއުޅެމުން ދިޔަ ގޭގެ ވެރިފަރާތުގެ ކޮއްކޮގެ ފިރިމީހާކަމަށް މައުލޫމާތު ލިބެއެބެ. އެހެން ނަމަވެސް އަލަމްގރިީގެ ފޯނު ވަގަށް ނެތީ ސީދާ އެމީހާކަމެއް މިހާތަނަށް ފުލުހުން ހާމަކޮށްފައެއް ނުވެއެވެ.