ޗާގޯސް މައްސަލައިގައި ރާއްޖެ މޮރޭޝިއަސްކޮޅަށް ޖެހުން: ފަހަތުގައި އިންޑިއާގެ ނުފޫޒު އޮންނާނެ!

އިނގިރޭސިވިލާތުގެ ބާރުގެ ދަށުގައި، ރާއްޖޭގެ ދެކުނުން އޮންނަ އޮތް ޗާގޯޒް އައިލެންޑްސް އެ ގައުމުގެ ތަނެއްގެ ގޮތުގައި ބޭއްވުމާއި މެދު ރާއްޖެއިން ދެކެމުން އައި ގޮތް ބަދަލުކޮށް މޮރިޝަސް އާ އެއްކޮޅަށް ވޯޓު ދޭން ނިންމި ނިންމުމުގެ ފަހަތުގައި އަވައްޓެރި އިންޑިއާގެ ނުފޫޒު އޮވެދާނެކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެއެވެ.

ތާރިގު މިފަދައިން ވިދާޅުވެފައިވަނީ ޗާގޯސް މައްސަލައިގައި އާންމުންނަށް ނުފެންނަ ކަންތައްތަކެއް ހުރެދާނެކަން ބަޔާންކޮށް ކުރެއްވި ޓްވީޓެއްގައެވެ.

އެ ޓްވީޓުގައި ތާރިގު ވިދާޅުވީ މޮރޭޝިއަސްއަކީ އިންޑިއާގެ ނުފޫޒު ވަރަށް ބޮޑަށް ފޯރުވާ ސަރަހައްދެއްކަމަށެވެ. އެގޮތުން 2015 ވަނަ އަހަރުން ފެށިގެން މޮރެޝިއަސްގައި އިންޑިއާގެ އިންޑިއާގެ މިލިޓަރީ ބޭސްއެއް ހަދަމުންދާކަމަށް އަލްޖަޒީރާއިން ރިޕޯޓުކޮށްފައިވާކަމަށް ތާރިގު ވަނީ ވިދާޅުވެފައެވެ. އަދި އަލް ޖަޒީރާގެ އެ ރިޕޯޓުވެސް ތާރިގު ވަނީ އޭނާގެ ޓްވީޓާއެކު ހިއްސާކުރައްވާފައެވެ.

ނުސީދާކޮށް ތާރިގު އެ ވިދާޅުވީ ޗާގޯސް މައްސަލައިގައި ރާއްޖޭގެ ނިންމުން ބަދަލުކުރުމުގެ ފަހަތުގައި އިންޑިއާގެ ނުފޫޒު އޮވެދާނެ ވާހަކައެވެ.

މި ސަރުކާރަކީ އިންޑިއާއާއި ގާތް ގުޅުމެއް އޮންނަ، އިންޑިއާގެ މަސްލަހަތު އިސްކުރާ ސަރުކާރެއްކަމުން، މި މައްސަލައިގައި މޮރޭޝިއަސްކޮޅަށް ރާއްޖެއިން ވޯޓުދޭން ނިންނި ނިންމުމަކީ އިންޑިއާގެ ނުފޫޒުން، ނުވަތަ އިންޑިއާއިން އެދިގެން ނިންމި ނިންމުމަކަށް ވެދާނެކަމަށް ތާރިގުގެ ޓްވީޓުގައި ވަނީ ސިފަކުރައްވާފައެވެ.

އިނގިރޭސީންގެ ބާރުގެ ދަށުގައި އޮންނަ ޗާގޯސް އައިލެންޑްގެ އެންމެ ފަހުން 2019 ވަނަ އަހަރާއި އަދި އޭގެކުރިން އެ މައްސަލާގައި ނެގި ވޯޓުގައި ވެސް ރާއްޖެއިން ވޯޓު ދިނީ އިނގިރޭސިވިލާތާ އެއްކޮޅަށެވެ.

މީގެ ކުރިން ޗާގޯސްގައި ނެގި ވޯޓުތަކުގައި ރާއްޖެއިން މޮރިޝަސްއާ ދެކޮޅަށް އެރީ ވެސް ރާއްޖޭގެ އިޤްތިޞާދީ ސަރަހައްދު ހިމާޔަތްކޮށް، ބައިނަލްއަގުވާމީ ގާނޫނުތަކާއި ރާއްޖޭގެ ގާނޫނުން ލިބޭ ސަރަހައްދު ކަށަވަރުކުރުމަށް ކަމަށް އޭރު ބުނެފައިވެއެވެ.