އުއްމީދޭ ކިޔައިގެން ދަރަނި އަރަންޏަށް ވަންޏާ އެންމެ ބާރަށް އެހެން ކިޔާނީ އަޅުގަނޑު: އީވާ

2023 ވަނަ އަހަރަށް ހުށަހަޅާފައިވާ ބަޖެޓަކީ އުއްމީދީ ބަޖެޓެއް ކަމަށް ސަރުކަާރަށް ތާއީދު ކުރައްވާ ބައެއް މެންބަރުން ވިދާޅުވާއިރު، އެފައިން އުއްމީދޭ ކިޔައިގެން ދަރަނި އަރަންޏަށް ވަންޏާ އެންމެ ބާރަށް އުއްމީދޭ ކިޔާނީ އޭނާ ކަމަށް ރައްޔިތުންގެ މަޖިލީހުގެ ނައިބް ރައީސް އަދި ގަލޮޅު އުތުރު ދާއިރާގެ މެންބަރު އީވާ ވިދާޅުވެއްޖެއެވެ.

މިހާރު ކުރިއަށްދާ ރައްޔިތުންގެ މަޖިލީހުގެ ތިންވަނަ ދައުރުގެ 42 ވަނަ ޖަލްސާގައި 2023 ވަނަ އަހަރަށް ސަރުކާރުން ހުށަހަޅާފައިވާ ބަޖެޓު ދިރާސާ ކުރުމަށްފަހު ބެޖެޓް ކޮމިޓީން ފޮނުވާފައިވާ ރިޕޯޓާއި ގުޅޭގޮތުން ޖަލްސާގައި ވާހަކަ ދައްކަވަމުން އީވާ ވިދާޅުވީ، ބަޖެޓު އެއްކޮށް ބަލައިނުލާ ވެސް ސަރުކާރަށް ތާއީދު ތާއީދު ކުރައްވާ މެންބަރުން ވިދާޅުވަނީ އެއީ އުއްމީދީ ބަޖެޓެއް ކަމަށެވެ.

"ރަނގަޅަށް ގަނޑުތައް އުކާނުލައި ވިދާޅުވެއްޖެ މިއީ އުއްމީދީ ބަޖެޓެކޭ. 42 ބިލިއަންގެ ބޮޑު ބަޖެޓެކޭ ބުނީމަ ވިދާޅުވެއްޖެ މިއީ އުއްމީދީ ބަޖެޓެކޭ. އުފެއްދުން ތެރިކަމުގެ ނިސްބަތުން ދަރަނި މިހާރު 110 ޕަސެންޓަށް އަރައިފޔޭ ބުނީމާ ބުނީ މިއީ އުއްމީދީ ބަޖެޓެކޭ، ޑެފިސިޓް 11 ބިކިއަނަށް އަރައިފިޔޭ ބުނީމާ ބުނީ، އިއްޒަތްތެރި ރައީސް، މިއީ އުއްމީދީ ބަޖެޓެކޭ."

"އިއްޒަތްތެރި ރައީސް އުއްމީދޭ ކީކީނުންގޮސް ދަރަނި އަރަންޏަށް ހެދެންޏާ އަޅުގަނޑަކަށްވުރެ ވަކި ގިނައިން އުއްމީދޭ ކިޔާނޭ މީހަކު ނުވާނެ. އުއްމީދޭ ކީކީނުންގޮސް ގަލޮޅު އުތުރަށް ބޯހިޔާވަހިކަން ފޯރުކޮށްދެވެންޏާ އިއްޒަތްތެރި ރައީސް، ހަމަ އަސްލަށްވެސް އަޅުގަނޑަކަށްވުރެ ވަކި ބާރަށް އުއްމީދޭ ކިޔާނެ މީހަކު ނުވާނެ." އީވާ ވިދާޅުވިއެވެ.

އެހެންނަމަވެސް ބަޖެޓަކާއި ގުޅޭ ގޮތުން އުއްމީދޭ ކިޔާނަމަ އެފަދައިން ކިޔަންވާނީ ކޮންމެވެެސް ވަރަކަށް އަސްލާއި ހަގީގަތާއި މެދު ވެސް ވިސްނާލާފައި ކަން ފާހަގަކުރައްވައި އީވާ ވަނީ އޭނާ އަށް ފެންނަން ހުރި އަސްލުތައް ކިޔައިދެއްވާފައެވެ.

އެގޮތުން އެމްއެމްއޭއިން ނަގާފައިވާ ދަރަނި ސަރުކާރަށް ދައްކާފައި ނުވާއިރު، އެ ދެއްކުމުގެ ޕްލޭން އެއްވެސް ބަޖެޓުން ނުފެންނައިރު، ޚަރަދުތައް ބޮޑުވާއިރު ޚަރަދު ކުރަނީވެސް އިގްތިސާދު ޖެނެރޭޓް ކުރެވޭނެ ފަދަ ކަންކަމަކަށް ނޫން ކަމަށާ އަދި ސަރުކާރުގެ ޚަރަދު ބޮޑުކޮށް ރައްޔިތުންގެ އަތުން ނަގާ ޓެކްސް ވެސް މިހާރު "ރަންބިސް އަޅާ ކުކުޅަށް" ހަދާފައިވާ ކަމަށް އީވާ ވިދާޅުވިއެވެ.

މިއާއެކު އީވާ ވިދާޅުވީ، އެމްޑީޕީ އާއި ގުޅިގެން ރައްޔިތުން ކުރި ހަމަ އެކަނި އުއްމީދަކީ ބަނދަރު ކަމުގައި ވާނަމަ އުއްމީދޭ ކިއިދާނެ ކަމަށެވެ. އަދި ބަނދަރާއި، ފެނާއި ނަރުދަމާ އަކީ އަސާސީ ޚިދުމަތްތައް ކަމަށާ، ކޮންމެ ބަނދަރަކާއި އެކު އެމްޑީޕީގެ ސިފައިގެ އެމްޑީޕީގެ އަސްލު ވައުދެއްވެސް ފުއްދަން ޖެހޭނެކަމަށްވެސް އޭނާ ވިދާޅުވިއެވެ.

"ކޮންމެ ބަނދަރަކާއި ގުޅިގެން އެމްއެމްޕީއާރުސީގެ ވައްކަން ހޯދާތަން ފެންނަންޖެހޭނެ. ކޮންމެ ބަނދަރަކާއި ގުޅިގެން މި ސަރުކަާރުގެ ވެންޓިލޭޓަރު ވައްކަން ހޯދަން އުޅޭތަން ފެންނަން ޖެހޭނެ. ކޮންމެ ބަނދަރަކާއި ގުޅިގެން ގަލޮޅު އުތުރު މާލެއަށް ބޯހިޔާވަހިކަން ފޯރުކޮށްދޭން ޖެހޭނެ. ކޮންމެ ބަނދަރަކާއި ގުޅިގެން ގެއްލިފައިވާ ރިލުވާނާއި މަރާލާފައިވާ ޔާމީން އިންސާފު ހޯދާތަން ފެންނަންޖެހޭނެ. ކޮންމެ ބަނދަރަކާއި ގުޅިގެން އެމްޑީޕީން މަސްވެރިންނަށް ވީ ވައުދުތައް ފުއްދާތަން ފެންނަންޖެހޭނެ." އީވާ ވިދާޅުވިއެވެ.

އީވާ ވިދާޅުވީ އެމްޑީޕީއަށް ރައްޔިތުން ކުރި އުއްމީދު އެއީ ބަނދަރެއް ކަމުގައި ހަދާފައި ނިންމާ ނުލެވޭނެ ކަމަށާ، ދިވެހިރައްޔިތުންގެ އުއްމީދު ނިންމާލެވޭ ހިސާބަކީ ބަނދަކަށް ނުހެދޭނެކަމަށެވެ.

މިއާއެކު އީވާ ވިދާޅުވީ މ، މިފަދަ ވާހަކަތައް ދައްކަވައި، ސަރުކާރުގެ ކަންކަމަށް ފާޑު ވިދާޅުވާ ކޮންމެ މީހަކާއި ދިމާއަށް ސަރުކާރާއި ސަރުކާރަށް ތާއީދު ކުރައްވާ މެންބަރުން ވިދާޅުވަނީ "ތި ހަސަދަވެރިވަނީއޭ" ކަމަށެވެ.