ހައިކޯޓާއި ކްރިމިނަލް ކޯޓު ރިސެސްއަށް ދަނީ
ހައިކޯޓާއި ކްރިމިނަލް ކޯޓު އެއް މަސް ދުވަހުގެ ރިސެސް އަކަށް ދާ ކަމަށް އެ ދެކޯޓުން ހާމަކޮށްފިއެވެ.
ހައިކޯޓާއި ކްރިމިނަލް ކޯޓުން މިއަދު ބުނީ، އަންނަ ޑިސެމްބަރު މަހުގެ 1 ވަނަ ދުވަހުން ފެށިގެން 31 ވަނަ ދުވަހުގެ ނިޔަލަށް އެ ދެ ކޯޓު ރިސެސްއަށް ދިއުމަށް ދެ ކޯޓުގެ ޤާޟީންގެ އާއްމު މަޖިލީހުން ނިންމާފައިވާ ކަމަށެވެ.
އަދި އެ ދެ ކޯޓު ރިސެސްއަށް ދިޔަ ނަމަވެސް، ބައެއް މައްސަލަތައް ކުރިއަށް ގެންދާނެ ކަމަށް ބުނެފައި ވެއެވެ.
އެގޮތުން، ކްރިމިނަލް ކޯޓުގައި ޖިނާއީ ބޮޑެތި މައްސަލަތަކާއި، ބަންދާއިމެދު ގޮތެއް ނިންމުމާއި، ކޯޓު އަމުރު ދޫކުރުމުގެ މަސައްކަތް ކުރިއަށް ދާނެ ކަމަށް ބުނެފައިވެއެވެ.
އަދި ހައިކޯޓުގައި ގާނޫނުގައި ވަކި މުއްދަތެއްގެ ތެރޭގައި ނިންމުމަށް ކަނޑައެޅިފައިވާ ބާވަތްތަކުގެ މައްސަލަތަކާއި، ހުކުމް ކުރުމަށް ބާއްވާ ޝަރީއަތުގެ މަޖިލީސްތަކާއި، އަވަސް ތަބީއަތުގެ މައްސަލަތަކާއި، އަވަސްކޮށް ހިންގަންޖެހޭ ކަމަށް މައްސަލަ ބަލާ ފަނޑިޔާރުންގެ ބެންޗަށް އެއްބަސްވެވޭ މައްސަލަތައް މި މުއްދަތުގެ ތެރޭގައި ބަލާނެ ކަަމަށް އެ ކޯޓުން ބުނެފައިވެއެވެ.
އާއްމުކޮށް ރިސެސްގެ މުއްދަތުގައި ކޯޓަށް ޝަރީއަތްތައް ނުބާއްވައެވެ. ނަމަވެސް މައްސަލަތައް ބަލައިގަތުމާއި އިދާރީ މަސައްކަތްތައް ކުރިއަށް ދެއެެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
