ރާއްޖޭގެ ތާރީހުގައި ވެސް ރިޒާވަށް އެންމެ ބޮޑު އަސަރެއް ކުރީ މިއަހަރު: ވޯލްޑް ބޭންކް

މިއީ ރާއްޖޭގެ ތާރީހުގައި ވެސް ރިޒާވަށް އެންމެ ބޮޑު އަސަރެއް ކުރި އަހަރުކަމަށް ވޯލްޑް ބޭންކުން ބުނެފިއެވެ.

ރާއްޖޭގެ އިގުތިސާދީ އަދާހަމަ, 'ބެޓެން ޑައުން ދަ ހެޗަސް' ރިޕޯޓު ނެރުމަށް ވޯލްޑް ބޭންކުން އިއްޔެ ބޭއްވި ރަސްމިއްޔާތުގައި އިކޮނޮމިސްޓް އާޑަމް އޭޓަސް ވިދާޅުވީ، މި އަހަރަކީ ދިވެހިރާއްޖޭގެ ރިޒާވަށް ވަރަށް ޕްރެޝަރު ބޮޑުވި އަހަރެއްް ކަމަށެވެ. އޭގެ ސަބަބެއްގެ ގޮތުގައި އޭނާ ފާހަގަކުރެއްވީ ތެލަށާއި އެނޫން ގޮތް ގޮތުން ކުރި ޚަރަދުތައް ބޮޑުވުމެވެ. އޭގެ ނަތީޖާއެއްގެ ގޮތުން މިއިން ދުވަހަކު ރިޒާވް ދަށް ނުވާ ވަރަށް މިއަހަރު ތެރޭގައި ދަށްވެފައިވާ ކަމަށް އޭނާ ވިދާޅުވި އެވެ.

"ރާއްޖޭގެ ޓްރޭޑް ޑެފިސިޓް ހުރީ ވަރަށް މަތީގައި. އޭގެ ސަބަބުން ރިޒާވަށް ބޮޑު އަސަރެއް ކުރޭ. ރާއްޖޭގެ ރިޒާވު ވަނީ 592 މިލިއަން ޑޮލަރަށް ކުޑަވެފައި. މިއީ ރާއްޖޭގެ ތާރީހުގައި ވެސް ރިޒާވް އެންމެ ބޮޑަށް ކުޑަވި އެއް ފަހަރު. މި އަދަދުން ހަމައެކަނި ހަމަޖައްސާލެވޭނީ 1.9 މަހުގެ އިމްޕޯޓު،" އިކޮނޮމިސްޓް އާޑަމް އޭޓަސް ވިދާޅުވި އެވެ.

މީގެ އިތުރުން ދައުލަތުގެ ޚަރަދުތައް އިންތިހާއަށް ބޮޑުވެފައިވުމުން، ދައުލަތަށް ލިބޭ އާމްދަނީ އިތުރުވި ނަމަވެސް، އޭގެން މާ ބޮޑު ފައިދާއެއް ދައުލަތަށް ނުވާ ކަމަށް އޭނާ ވިދާޅުވި އެވެ.

ހަމަ އެހެންމެ، ސަޕްލިމެންޓްރީ ބަޖެޓުގެ ގޮތުގައި 6.5 ބިލިއަން ރުފިޔާ ހުށަހަޅާފައިވާއިރު, އެ އަދަދު ހޯދަންވެސް ބޮޑެތި ގޮންޖެހުންތައް ކުރިމަތިވާނެކަން އާޑަމް ފާހަގަކުރައްވައެވެ.

އާޑަމް މިފަދައިން ވިދާޅުވެފައިވާއިރު، ރާއްޖޭގެ އިގުތިސާދީ އަދާހަމަ, 'ބެޓެން ޑައުން ދަ ހެޗަސް' ރިޕޯޓުގައިވެސް ރާއްޖޭގެ ދަރަނި އިތުރުވަމުންދާތީ ވަނީ ކަންބޮޑުވުން ފާޅުކޮށްފަ އެވެ. އަދި ރާއްޖޭގެ ދަރަނި ކުޑަކޮށް އާމްދަނީ އިތުރު ކުރުމަށް އެ ރިޕޯޓްގައި ވަނީ އިސްލާހުތަކެއް ހުށަހަޅާފައެވެ. އޭގެ ތެރޭގައި؛

• އާސަންދައަށް އިސްލާހީ ބަދަލުތައް ގެނައުން

• ހަކަތައާއި ކާބޯތަކެތީގެ ދާއިރާގައި ހަރަކާތްތެރިވާ ސަރުކާރު ހިއްސާވާ ކުންފުނިތަކަށް ދައުލަތުގެ ބަޖެޓުން ދޭ ފައިސާ ބެލެހެެއްޓުން

• ބޭނުންޖެހިފައިވާ މީހުންނަށް އެކަނި ދެވޭ ސަބްސިޑީގެ ނިޒާމަކަށް ވާސިލްވުން

• ތަރައްގީގެ މަޝްރޫއުތައް ވިސްނުންތެރިކަމާއި ރޭވުންތެރިކަމާ އެކު އުމްރާނީ ތަރައްގީގެ ވަސީލަތްތައް ގާއިމްކުރެވޭކަން ކަށަވަރުކުރުމަށް ހަރުދަނާ ޕަބްލިކް އިންވެސްޓްމަންޓް އޮނިގަނޑެއްގާއި ގާއިމް ކުރުން.

• ޓެކްސް ބޭސް ފުޅާ ކުރުން

• ރާއްޖޭގެ އެތެރެއިން އާމްދަނީ ލިބޭނެ ވަސީލަތްތައް އެކަށައެޅުން

• ހަމަހަމަ ޓެކްސްގެ އުސޫލުތައްކުރިއެރުވުން