ސަނީފް ރައީސް ނަޝީދަށް: މިވީހާ ދުވަހު އިލެކްޝަން ދަފުތަރާއި ޚިލާފު ދަފުތަރެއް ގެންގުޅުނީ ކީއްވެ؟
އެމްޑީޕީގެ ރައީސް ކަމުގެ މަގާމުގައި ރައީސް ހުންނަވައި، އެތައް ދުވަހެއް ވެގެން ދިޔައިރުވެސް، އިލެކްޝަން ދަފުތަރާއި ޚިލާފު ދަފުތަރެއް ގެންގުޅުއްވީ ކީއްވެތޯ ތިނަދޫ ދެކުނު ދާއިރާގެ މެންބަރު ސަނީފް ސުވާލުކުރައްވައިފިއެވެ.
އެމްޑީޕީގެ ދަފުތަރު ގަޑުބަޑުވެފައިވާ ކަމަށް ރައީސް ނަޝީދު ވިދާޅުވުމާއި ގުޅިގެން، ސަނީފް ކުރެއްވި ޓުވީޓެއްގައި ވަނީ، އެވަރު ކަމެއް ހިނގައިދިޔައިރު 15 އަހަރު ވަންދެން ޕާޓީގެ ރައީސް ކަމުގައި މަގާމުގައި ހުންނެވި، ރައީސް ނަޝީދުގެ ޒިންމާ އަކީ ކޮބައިތޯ ސުވާލު ކުރައްވާފައެވެ. އެވާހަކަ ދައްކަވަނީ އެމަނިކުފާނު ޒިންމާތަކުން ބަރީއަ ވުމަށްތޯވެސް ސުވާލު ކުރައްވާފައެވެ.
"މި ވަރުގެ ކަމެއް ހިނގައި ދިޔަ އިރު އެމްޑީޕީ ގެ ރައީސް ކޮބައިތޯ ؟ 15 އަހަރު ޕާޓީގެ ރައީސް ކަން ކުރިއިރު ކޮބައިތޯ ޒިންމާ . އިންތިޙާބު ބޯމަތި ވީމަތޯ އިނގުނީ. މިވީ ހުރިހައި ދުވަހު އިލެކްޝަން ދަފުތަރާއި ޙިލާފު ދަފުތަރެއް ގެންގުޅުނީ ކިހިނެއް ވެގެންތޯ؟ ޒިންމާތަކުން މަނިކުފާނު ބަރިއްޔަ ވީތޯ؟" ސަނީފް ސުވާލު ކުރައްވާފައިވެއެވެ.
2023 ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ޓިކެޓްގައި ކުރިމަތިލާނެ ކެންޑިޑޭޓެއް ހޮވުމަށް ބާއްވާ ފްރައިމަރީގައި ވާދަކުރައްވާނެކަން އިއުލާންކުރައްވާ ރައީސް ނަޝީދު ވަނީ އެމްޑީޕީގެ ދަފުތަރު ގަޑުބަޑުވެފައިވާ ކަމަށް ވިދާޅުވެފައެވެ. މިކަމުގެ ކަންބޮޑުވުންތައް ފާޅުކުރައްވާ ރައީސް ނަޝީދު އެމްޑީޕީގެ ޗެއާޕާސަން ފައްޔާޒު އިސްމާއިލް އަށް ފޮނުއްވި ސިޓީއެއްގައި ވަނީ އެމްޑީޕީގެ ވޯޓުލާ ދަފުތަރުން ސާޅީސްހާހާ ގާތަށް މެމްބަރުން އެންގުމަކާއިނުލައި ކުއްލިއަކަށް އުނިކޮށްފައިވާކަމަށް ވިދާޅުވެފައެވެ.
އެއާއެކު އެމްޑީޕީގެ ދަފުތަރު ސާފުކުރަންޖެހޭ ވާހަކަ ތަކުރާރުކުރައްވާ ރައީސް ނަޝީދު ވިދާޅުވީ ދަފުތަރު އިސްލާހުކުރުމުގެ ނަމުގައި ޕާޓީން ވަކިކުރީ އެމްޑީޕީގައި ގިނަދުވަސްވީ ޕާޓީގެ އަސްލު މެންބަރުންކަމަށެވެ. އަދި އެއީ އެމްޑީީޕީ ޕްރައިމަރީގައި ރައީސުލްޖުމްހުރިއްޔާ އިބްރާހީމް މުހައްމަދު ޞާލިހަށް ވޯޓް ދޭނެހެން ހީނުވާ މެންބަރުން ކަމަށްވެސް ރައީސް ނަޝީދުވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
