ރާއްޖޭގެ ސިޔާސީ ލީޑަރުން އިންޑިއާއަށް ވިކުނަސް، ޕީޕީއެމް-ޕީއެންސީގެ ލީޑަރުންނެއް ނުގަނެވޭނެ: ރައީސް ޔާމީން

ދިވެހިރާއްޖޭގައި ތިބި އެކި އެކި ސިޔާސީ ޕާޓީތަކުގެ ލީޑަރުން އިންޑިއާއަށް ވިކުނަސް އިދިކޮޅު އިއްތިހާދުގައި ހިމެނޭ ޕީޕީއެމް-ޕީއެންސީގެ ސިޔާސީ ލީޑަރުންނެއް އިންޑިއާއަކަށް ނުގަނެވޭނެކަމަށް ކުރީގެ ރައީސް އަދި ކުރިއަށް އޮތް ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ.

"ފެލާލައިފި" ގެ ނަމުގައި އިދިކޮޅުން ބޭއްވި ބޮޑު ޖަލްސާއެއްގައި ވާހަކަދައްކަވަމުން ރައީސް ޔާމީން ވަނީ އިންޑިއާގެ ބޮޑު ވަޒީރާއި ދިވެހިރާއްޖޭގައި ހުންނެވި އިންޑިއާގެ ސަފީރަށް ވަރުގަދަ މެސެޖެއް ދެއްވާފައެވެ.

އެ ދެފަރާތާއި މުޚާތަބުކުރައްވާ ރައީސް ޔާމީންގެ ވާހަކަފުޅު ފެއްޓެވީ އިންޑިއާއަށް މުހިންމު ސުވާލެއް އަމާޒުކުރައްވައިގެން ނެވެ. އެގޮތުން އިންޑިއާއިން ރައީސް ޔާމީންދެކެ ނުރުހުންވަނީ ކޮން ސަބަބަކާއި ހުރެތޯ އެމަނިކުފާނު އެއްސެވިއެވެ.

"އިންޑިއާ ތި ކޮން ކަމަކާތޯ އަޅުގަނޑުދެކެ ރުޅި އަންނަނީ؟ މިއީ އަޅުގަނޑުގެ ގައުމޭ. މިއީ އިންޑިއާގެ ޕްރައިމް މިނިސްޓަރު މޯދީގެ ގައުމެއް ނޫނޭ. މޯދީގެ ބާރު ހިނގާ ތަނެއް ނޫނޭ މީކީއެއް. މީ އިންޑިއާގެ ޕްރޮވިންސެއް ނޫނޭ. މީ އިންޑިއާގެ ސްޓޭޓެއްވެސް ނޫނޭ"

ޕީޕީއެމްގެ ރިޔާސީ ކެންޑިދޭޓް ރައީސް ޔާމީން

އެމަނިކުފާނު ވިދާޅުވީ، އެމަނިކުފާނަކީ ދިވެހި ރައްޔިތެއްކަމަށެވެ. ދިވެހިރާއްޖޭގެ މިނިވަންކަމާއި ސިޔާދަތުގެ ވާހަކަ ދައްކަން ޖެހޭކަމަށް އެމަނިކުފާނު ވިދާޅުވިއެވެ.

އެވާހަކައާއި ގުޅުވާ ރައީސް ޔާމީން ވިދާޅުވީ، ދިވެހިރާއްޖޭގައި ތިއްބެވި ބައެއް ސިޔާސީ ލީޑަރުން އިންޑިއާއަށް ވިކުނަސް، އިދިކޮޅު އިއްތިހާދުގައި ހިމެނޭ ޕީޕީއެމް ޕީއެންސީގެ ލީޑަރުން އިންޑިއާއަށް ނުގަނެވޭނެކަމުގެ ޔަގީންކަން އެމަނިކުފާނު ވަނީ ދެއްވާފައެވެ.

އަދި އެމަނިކުފާނުގެ އެ ވާހަކަފުޅު އިންޑިއާގެ ބޮޑު ވަޒީރާއި އިންޑިއާގެ ސަފީރު ރަނގަޅަށް އަޑުއެއްސެވުމަށްވެސް ރައީސް ޔާމީން ވަނީ ގޮވާލައްވާފައެވެ.

"މޯދީއާއި އިންޑިއާގެ ސަފީރު އަޑުއައްސަވާ! ދިވެހިރާއްޖޭގެ ސިޔާސީ ލީޑަރުން ކަލޭމެންނަށް ވިކުނަސް ޕީޕީއެމް-ޕީއެންސީގެ ސިޔާސީ ލީޑަރުންނެއް ކަލޭމެންނަކަށް ނުގަނެވޭނެ"

ޕީޕީއެމްގެ ރިޔާސީ ކެންޑިދޭޓް ރައީސް ޔާމީން

އެއާއެކު އެމަނިކުފާނު ވަނީ ގަވައިދާއި ޚިލާފަށް ދިވެހިރާއްޖޭގައި ތިބި އިންޑިއާ ސިފައިން މި ގައުމުން ބޭލުމަށް އިންޑިއާ ސަރުކާރަށް ގޮވާލާފައެވެ. އިންޑިއާ ސިފައިން ތިބުމާއި އެމަނިކުފާނު ދެކޮޅުކަމާއި، އެކަމާއި ދެކޮޅަށް އަބަދުވެސް އަޑު އުފުއްލަވާނެކަމަށް ރައީސް ޔާމީން ވަނީ ވިދާޅުވެފައެވެ.