އާސަންދަ ފެލާލައިފި، ހުސްނުވާ އާސަންދަ މިހާރު އޮތީ ހުސްވެފަ: ރައީސް ޔާމީން
މި ސަރުކާރު އައިސް ރައްޔިތުންނަށް ހިލޭ ބޭސްފަރުވާ ކޮށްދިނުމަށް ގާއިމްކުރި ހުސްނުވާ އާސަންދަ ނިޒާމު ހަލާކުކޮށްލައިފިކަމަށް ކުރީގެ ރައީސް އަދި ޕީޕީއެމްގެ ރިޔާސީ ކެންޑިޑޭޓް ޔާމީން އަބްދުލްގައްޔޫމު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައިވަނީ އިދިކޮޅުން ކާނިވާ ސަރަހައްދުގައި ބޭއްވި "ފެލާލައިފި" ޖަލްސާގައި ސަރުކާރަށް ބޮޑެތި ފާޑުކިޔުންތަކެއް އަމާޒުކުރައްވަމުން ނެވެ.
ރައީސް ޔާމީން ވިދާޅުވީ އެމަނިކުފާނު ވެރިކަން ނިންމަވާލެއްވުމަށް ފަހު މި ސަރުކާރާއި ހަވާލުކުރީ ހުސްނުވާ އާސަންދައިގެ ނިޒާމެއްކަމަށެވެ. އެއީ ރައްޔިތުންނަށް ބޭނުންވާ ބޭސްފަރުވާގެ ޚިދުމަތް ތަކުލީފަކާއި ނުލާ ލިބިގެންދާނެ ނިޒާމެއްކަމަށް އެމަނިކުފާނު ވިދާޅުވިއެވެ.
ދެން އެމަނިކުފާނު ވިދާޅުވީ މި ސަރުކާރު އާސަންދަވެސް "ފެލާލައިފި" ކަމަށެވެ. ހުސްނުވާ އާސަންދައިން މިހާރު ރައްޔިތުންނަށް ބޭސްފަރުވާ ކުރުމަކީ ބޮޑު ތަކުލީފަކަށް ހަދާފައިވާކަމަށް އެމަނިކުފާނު ވިދާޅުވިއެވެ. އަދި އެ ވާހަކަތަކާއި ގުޅުވާ މަޒާޖީ ގޮތަކަށް ރައީސް ޔާމީން ވިދާޅުވީ ރައްޔިތުންނަށް ހިލޭ ބޭސްފަރުވާކޮށްދިނުމަށް މިހާރު އޮތީ ހުސްވެފައިވާ އާސަންދައިގެ ނިޒާމެއްކަމަށެވެ.
"އާސަންދަ އެ އޮތީ ހުސްވެފައި. ކީއްވެތޯ އާސަންދަ ހުސްވާންވީ؟ އާސަންދަ ފެލާލީމަ އާސަންދަ ހުސްވެގެން މި އުޅެނީ. ސިއްހީ ނިޒާމު އެ އޮތީ ހަލާކުވެފައި. ރާއްޖޭގައި އުޅޭ ނިކަމެތިންނަށް ބޭސްކުރުމަށްޓަކައި އާސަންދައެއް އުފެއްދީ، ހުސްނުވާ އާސަންދައިގެ ނަމުން އެ ދިޔައީ.. މިހާރު އެއީ ހުސްވެފައި އޮތް އާސަންދަ"
ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން
ރައީސް ޔާމީން ވިދާޅުވީ ރައްޔިތުން ވެރިއަކު އައްޔަން ކުރަނީ އަދި ސަރުކާރެއް އުފައްދަނީ ރައްޔިތުންނަށް ބޭނުންޖެހިފައިވާ ކަންކަން ފަސޭހަކަމާއެކު ފުއްދާދިނުމުގެ މަގްސަދުގައިކަމަށެވެ.
އެގޮތުން އެންމެ ސަރުކާރެއްގެ އެންމެ އަސާސީ ޒިންމާއަކީ ފުދުންތެރިކަމާއެކު ރައްޔިތުންނަށް އަބުރުވެރި ދިރިއުޅުމެއް އުޅެވޭނެ މަގު ތަނަވަސްކޮށްދިނުންކަން އެމަނިކުފާނު ފާހަގަކުރެއްވިއެވެ.
އެއާއެކު ވިދާޅުވީ މި ސަރުކާރުން އެ ޒިންމާ އަދާކުރުމުގައި ފެއިލުވެފައިވާ ކަމަށެވެ. އަދި މިއަދު ރައްޔިތުން އުޅެމުންދަނީ ވަރަށް ނިކަމެތި ހާލެއްގައިކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
