ފައިލޭރިއާގެ ވޭދަނައެއް ހުޅުމާލެއިން ފެނިއްޖެ
ރާއްޖެ އިން ނައްތާލާފައިވާ ފައިލޭރިއާ ޖެހިފައިވާ އިތުރު ބިދޭސީ މަސައްކަތްތެރިއަކު ހުޅުމާލެ އިން ފެނިއްޖެއެވެ.
މިކަން ވޮއިސްއަށް ކަށަވަރުކޮށްދެއްވާ އެޗްޕީއޭގެ މީޑިއާ އޮފިޝަލް ވިދާޅުވީ، ފައިލޭރިއާއަށް ފައްސިވި އިންޑިއާގެ އެ މަސައްކަތު މީހާ ފެނުނީ ފައިލޭރިއާ އަށް މިހާރު ފަށާފައިވާ ސްކްރީނިން ޕްރޮގްރާމްގެ ތެރެއިން ކަމަށެވެ. އަދި އޭނާ ބައްޔަށް ފައްސިކަން އެނގުމާއެކު ބޭސް ދިނުމުގެ މަސައްކަތް ފަށާފައިވާކަމަށެވެ.
22 ޑިސެމްބަރުގައި ހުޅުމާލޭގައި ކުރިއަށްގެންދިޔަ މައިގްރޭންޑް ފެއަރގައި ޖުމުލަ 13 ބިދޭސީން މި ބައްޔަށް ޓެސްޓު ކުރެވުނު ކަމަށް ވެސް އޭނާ ބުންޏެވެ.
ފައިލޭރިއާގެ ވޭދަނައެއް އެންމެ ފުރަތަމަ ފެނުނީ ހދ ކުޅުދުއްފުށިންނެވެ. މި މަހުގެ މިހާތަނަށް އެ ރަށުން އެކަނި ވެސް ފައިލޭރިއާ ޖެހިފައިވާ 25 މީހަކު ފެނިފައިވެއެވެ.
އެހެންކަމުން މިހާތަނަށް ފައިލޭރިއާ ޖެހިފައިވާ 26 ބިދޭސީއަކު ރާއްޖެ އިން މި ވަނީ ރިޕޯޓުކުރެވިފައެވެ.
އެޗްޕީއޭ އިން ބުނީ، ރާއްޖެއިން ފެނިފައިވާ ފައިލޭރިއާ ވޭދަނަތަކަކީ، އާންމުކޮށް އެ ބަލި ފެންނަ "އެންޑެމިކް" ގައުމުތަކުން އައިސްފައިވާ ވޭދަނަތަކެއް ކަމުގައެވެ. އެގޮތުން އިންޑިއާގެ ބިހާރާއި އުއްތަރު ޕްރަދޭޝް އާއި ގޯޕާލްގަންޖާއި ޓެމިލްނާޑޫގެ އިތުރުން ބަންގްލަދޭޝްގެ ކުމިލާ ކިޔާ ސަރަހައްދުން އައިސްފައިވާ މީހުން އެ 26 ބިދޭސީންގެ ތެރޭގައި ހިމެނޭ ކަމަށް އެޗްޕީއޭން ބުނެއެވެ.
އެޗްޕީއޭން ބުނީ ހދ ކުޅުދުއްފުށީން މި ބައްޔަށް ތަހުލީލު ކުރެވުނު 439 ބިދޭސީންގެ ތެރެއިން 414 މީހަކު ނައްސިވެފައިވާ ކަަމަށެވެ.
މީގެ އިތުރުން ޑިސެމްބަރު 20 އަދި 21 ދެ ދުވަހު އެ ރަށުގެ ރައްޔިތުންނަށް ހުޅުވާލައިގެން ކުރިއަށްގެންދިޔަ ތަހުލީހުން 155 މީހުންގެ ތެރެއިން އެއްވެސް މީހަކަށް މި ބަލި ޖެހިފައިނުވާކަމަށް ވެސް އެ އިދާރާއިން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
